Ads by Google Ads by Google

Toe tatala tautua ASPA mo lapisi lafoa’i

O le vaiaso nei na toe tatalaina ai le tautua a le Faalapotopotoga o le Eletise ma le Suavai, le ASPA, mo le la’uinaatu o lapisi lafoa’i a le atunuu i le latou polokalame o lo o mafai ona maua ai fesoasoani mo le atunuu.

E tusa ai ma le Konekarate o le masini toe fa’aliliu ai le Palasitika e toe fa’aaoga ai i nisi oloa fou lea sa ofoina mai e le Territorial Energy Office a le tatou malo, na manumalo ai le Kamupani a le  GHC Reid i Tafuna.

E tusa ma le fa’amatalaga mai le sui o le Kamupani ananafi, ua ia fa’ailoa mai ai, “E le’i mautu mai lava se masina e o’o mai ai le Masini ua mae’a okaina mo le toe fa’aliliuina o le Palasitika fa’amanifi, ona fa’ato’a toe fa’apusa lea ma la’u i Taiwan i le Kamupani ua mae’a fa’akonekarate e le TEO mo le gaosia ao o lavalava ta’alo taugata ituaiga o le “Armor” o palanikeke, ato, mitiafu ma ofu mafanafana.”

Pe afai o le a o’o mai lea masini aoga mo i tatou, o le a logo fo’i le atunu’u, ae fa’afetai o lea ua mae’a la’uina i le ASPA a tatou lapisi palasitika nei e fa’aputu i ai mo le toe la’u ane ia i latou e fa’amanifi mulimuli ai!

O se taimi vave e ono o’o mai ai lea masini, ua fa’ailoa mai, e tatau ona o’o atu ia Mati 2013 ua i i’inei lea masini. O vaega tupe sa fa’aaoga mo lea Konekarate o le tupe a le ARRA ae ua mae’a fo’i ona talosagaina le tuai ona fa’aaoga ma amatalia galuega ua atofaina, ona o le tuai o’o mai o le masini tele lea i o tatou laufanua i le lotoa a le GHC Reids i Tafuna.

O itula masani o le tautua lea a le ASPA i ona aso e tolu o vaiaso ta’itasi, o lo’o tumau pea. I le aso Tofi ma aso Faraile e amatalia ona talia i le itula e 7:00 i le taeao se’ia ta le 11:00 i le aoauli, ae o le aso To’ona’i e afua mai le 5:00 seia o’o i le 10:00 i le taeao lava!

E tusa ai ma le talanoa mai o se tasi o tama sa avea ma Pulenu’u o lona afio’aga, sa ia fa’aalia ai, “Se ua ta fiafia lava i lenei avanoa e la’u ai lapisi o so’o se ituaiga i le ASPA, aua ua matua leai se atigi fagu palasitika po’o ni atigi apa ma lapisi o u’amea mamafa ma apa atofale, ma isi mea uma sa salalau i autafa o auala, o tuamaota ma nofoaga faitele, ua iloa e tagata ta’alao le lapisi ma ‘ave e fa’aititia ai latou pili uila.”

O lana saunoaga, ua fa’afaigofie atili ai fo’i le latou galuega o le fa’amamaina o autafa o alatele ma le nu’u atoa, aua ua le tele se lapisi o nei ituaiga e maua atu o salalau mai ma fa’atiga fofoga i le va’ai atu i ai!