I ripoti mai fafo na faasalalauina e le alaata o le BBC ua taua ai le toe tatalaina i tua o le toa 181 o tagata ia na saisaitia ma ave faamalosi, ae ese ai le faitau afe ma afe sa saisaitia i isi tausaga ua mavae.

Faatoa mafai lea e le vasega o Leoleo a Saina ona maua a’ia’i vaega tetele e lua, sa latou faia lea faiga, o le saisaitia ma ‘ave fa’amalosi o tagata e aofia ai ma tamaiti.

Ua fa’apea fo’i la ona saisaitia nei e leoleo le aofa’iga o nei kegi gaoi tagata e tusa ma le 802 o i latou, ma ua fa’ailoa mai e le vaega o leoleo a lea malo, e tele se fa’asalaga o le a o’o i nei sui solitulafono.

O lenei malo, ua matauina lo latou faia pea o nei ituaiga o faiga leaga i tagata, ma ua lauiloa fo’i Saina i le vaivai o le latou vaega o Leoleo e puipui le to’atele o tagatanu’u o le atunu’u. Ua tele ina tu’ua’ia le tulafono a lea malo e fa’ataga ai lava na’o le tasi le tamaititi a le ulugali’i , ma e leai fo’i ni tulafono e puipuia ai tagata mai le fa’atamafai o fanau.

Ona o nei ituaiga o tulafono, ua fa’ailoa mai ai e tagata lautele, ua avea ma mea ua fa’amalosia ai tagata e fa’atau tamaiti ma avea ai ma latou pologa. O le isi fo’i tu a Saina e iloga ai, e le taua tele fanau teine, ae ua na’o suli tama e mo’omia e aiga e tau’avea ai gafa o aiga.

O le tele o taimi o tama’ita’i lava ma fanau teine laiti e ave fa’amalosia ma fa’atau atu e avea ma pologa, ae ua sefe lava na’o fanau tama mo aiga.

I le osofa’iga a le vaega o leoleo, na fa’ailoa mai ai le fanau ua toe maua mai ae ua amata ona faia i ai fa’atauga a i latou na avea fa’amalosia, ma e 15 itumalo sa faia ai nei fefa’ataua’iga o tagata e aofia ai ma Hebei,  Shandong, Henan, Sichuan ma Yunnan.

Fai mai o na mafua ona fa’aoso lea sailiga a leoleo i le masina o Tesema 2011, ina ua maua taitaia lava le to’afa o ali’i o latou taumafai ona fa’atau atu o pepe e fa i le itumalo o Henan.  Na fa’asalalauina ata o le ali’i na masalomia o Shao Zhongyuan, na fa’ato’a maua lea i le itumalo o Pingyi.

Ua maua ane e leoleo, o ia lea o se sui tamoe o le kegi na latou ‘ave fa’amalosia le silia ma le 100 tamaiti, ma ua mafai ai ona maua ma le isi vaega tele o le latou kegi fa’atau tamaiti lea ua matu atu i le falepuipui e tatalia ai le fa’ai’uga e faia i ai e le fa’amasinoga.

Mai le lipoti i le masina o Mati 2012 na fa’asalalauina mai e le Ministry of Police a Saina, ua latou fa’ailoa mai, ua toe fa’asaoina mai le faitau 10,000 o tamaiti sa avea fa’amalosi mai o latou aiga, e aofia ai ma fafine ma teine i lenei aotelega.

Ua maua taitaia fo’i ma le taumafaiga a le isi kegi e lua ai vaega ia ua saisaitia nei, o taumafai ona uta le fanau iti fa’atasi ma fafine e fia fa’ao’o i Angola e avea ma teine talitane. Ua maea toe fa’afo’ia tina e 19 ma teineiti e 16 mai luga o le va’a.

O lenei aga’i atu ina fa’asa’oloto tagata o lo’o pagatia pea o le atunu’u i le tele o faiga sese o loo fa’atautaia ae le o faia i ai se galuega a leoleo, o se vaega fou lea o le toe fa’asa’oga o tulaga tau le tamaoaiga o le atunu’u ma le fa’aleleiga o le saogalemu fa’alotoifale o atunu’u o Saina i le taimi nei.

saunia: Leua Aiono Frost