O se ta’aloga mataina le sa’iliga siamupini i le vaa o le ‘au a Vaiala B.B.E mai i Samoa ma le ‘au malosi a le Fiji Red Rock mai Fiti, i le Ta’ito’a 7 a le TMO Marist Pago 7, lea sa faia i le Aso Toonai na se’i mavae atu nei, lea na manumalo ai Vaiala, 14-12, ma toe sola ai ma le talita.

E le’i umi ona amata le afa muamua o le taaloga ae sikoa le alii o Faalemiga Selesele o Vaiala, o se tasi o sui o le au ta’itoa 7 a le Manu Samoa, o ia fo’i lea na mauaina le faailoga o le Tama Taalo o le Taamilosaga (MVP), ma tula’i mai ai ulua’i ‘ai o le taaloga, 7-0, peitai toe 27 sekone mae’a le afa muamua, ae laasia loa e le kapeteni a le Red Rock mai Fiti ia Viliame Navanua le laina sikoa a Vaiala, ma tutusa ai ‘ai o le taaloga i le taimi o le malologa.

Na fiu le Red Rock e faaaoga le latou metotia o le kiki le polo ae tuli, peitai na matua mataalia le puipui a Vaiala ma o latou faaaoga ai mea sese a Fiti i totonu o le taaloga e saili mai ai so latou avanoa.

E le’i umi ona amata le afa mulimuli ae toe laasia e Vaiala le laina sikoa a Fiti, ma tula’i ai ‘ai, Vaiala 14 ae tumau pea Fiti i le 7, ae na faamalosi lava Fiti i nai toe sekone mulimuli o le taaloga ma latou toe laasia ai loa le laina sikoa a Vaiala, peitai e le’i manuia le kiki i le pou, ma tula’i mai ai loa ‘ai faai’u e 14-12.

E ui i le faiaina ai o le au masii mai Fiti, peitai na faafetaia e le faiaoga o le au ia Lote Rasiga le tulaga sa i ai le taumafai a lana au.

Fai mai Rasiga, “sa matou taumafai e faaaoga le sikaili o le kiki o le polo ae tuli, peitai sa mataalia mai fo’i Vaiala i  soo se taimi na faia ai a matou gaioiga, ma latou toe faafo’i mai le polo i le matou itu.”

I le avea ai o le Fiji Red Rock o le siamupini i au kalapu i totonu o Fiti, na taua ai e Rasiga e faapea, “e le o toe faigofie le tulaga ua i ai le lakapi i Samoa, tusa lava pe e te taalo i ni au kalapu, ua lelei uma ‘au i Samoa, ae o le ‘au lava e faatamala o le ‘au lena e le manumalo.”

Na faaaoga e Rasiga le taamilosaga lenei a koleni atu ai lana au mo le isi taamilosaga ta’ito’a 7 a Fiti lea e faia i le vaiaso fou, e saili ai sa latou a’u mo vae e lua o le taamilosaga ta’itoa 7 a le IRB lea ua faamoemoe e faia i Sikotilani ma Enelagi i le vaiaso muamua ma le vaiaso lona lua o le masina fou.

Na faafetaia e Rasiga le kalapu a le Marist St. Joseph i Amerika Samoa nei, ona o le avanoa na valaaulia faaaloalo ai la latou ‘au e malaga mai e tausinio i lenei ta’amilosaga.

Ina ua fesiligia pe toe malaga mai i le tausaga fou, na tali Rasiga, “ o le a vaavaai lava i ai.”

Ae na taua e le faiaoga a Vaiala ia Rudy Leavasa e faapea, e ui sa i ai ni nai faaletonu i gaioiga a lana ‘au i le taimi o le taaloga, ae o le itu taua ua toe faamanuiaina i latou i le taamilosaga lona lua a le TMO Marist Pago i lenei tausaga.

Fai mai Leavasa, “e lelei ma malosi le au a Fiti, peitai sa ia i lava fo’i nai a latou measese sa faia i le taimi o le taaloga, ma faaaoga ai loa e Vaiala le polo e saili ai so latou ‘ai.”

Na faafetaia Leavasa le kalapu a le Marist St. Joseph i Amerika Samoa nei, ona o le avanoa ua mafai ai ona latou malaga mai e tausinio i lenei faamoemoe.

O sui o le ‘au taitoa 7 a le Manu Samoa na taaalo i le ‘au a Vaiala e aofia ai Alatasi; Faalemiga; Patrick Faapale ma Robert Lilomaiava.

E le gata ua toe see atu le Ipu o le siamupini i Vaiala, ae ua faapea fo’i ona toe avatu ai ma le faailoga tupe e $10,000, ae $5,000 mo le au mai Fiti.

E lua au mai Amerika Samoa nei na au i sailiga siamupini o le Talita ma le Ipu Mafolafola (bowl), peita’i e le’i i ai se au na faamanuiaina.

O Fagatogo Blues na taalo ma Satitoa i le sailiga o le Talita ((shield) ma manumalo ai Satitoa i ‘ai e 19-15 a Fagatogo.

O Laulii-Pago na taalo ma Apia Maroon i le sailiga o le Ipu ‘bowl’ ma manumalo ai Apia Maroon i ‘ai e 211-0; ma le faailoga o le ‘plati’ na sailia e le au malosi a le Tepatasi mai Aleipata ma le Marist St. Joseph, ma manumalo ai le Tepatasi i ‘ai e 24-14.

O le afioga i le kovana sili ia Lolo Matalasi Moliga, faapea ai le ta’ita’ifono o le Iuni lakapi a Amerika Samoa ia Togiola Tulafono na auai i le tauaaoina atu o faailoga i ‘au sa lautogia.

I le faaiuga o lenei faamoemoe, na faafetaia ai e le Peresetene o le kalapu a Malisi Sagato Iosefo i Amerika Samoa, afioga Toleafoa Isitolo Wulf le susuga ia Frank Gaisoa ma le kamupani a le Tautua Mo Oe (TMO), ona o le lagolagoina malosi o lenei faamoemoe. Sa ia faafetaia fo’i isi pisinisi sa mafai ona lagolago atu mo le faataunuuina o lenei faamoemoe.