Ads by Google Ads by Google

Toe saafiafiga mo Rev. Elder Masalosalo Sopoaga

O saafiafiga o le faletua ia Simoe i lona alii, le susuga i le alii faifeau ia Rev. Elder Masalosalo Sopoaga, na tuu faatasia uma lea i lagona ma mafaufauga sa ia faasoa i ona toe sauniga.

Na soifua mai o ia i le aso 13 Aokuso, 1938 peita’i, ua maliu o ia Iuni 6, 2012. O ona matua o Fiu Sopo’aga mai Salelologa Savaii ma Ema Mata’afa o Sale’aula i Savaii fo’i. O ona matua tausi o Iafeta Touli mai Salelologa Savaii ma Solamaina Iafeta Touli o Nofoali’i, Upolu.

I le taimi nei ua toe to’atolu i latou o uso ma tuafafine o totoe, Upuia Sopo’aga, Rev. Salamumu Sopoaga ma Fiu Falo Sopo’aga, ae to’avalu isi o ona tuafafine ma uso ua muamua ia te ia: Fesili Sopoaga, Touli Rosa Sopoaga, Silipa Sopoaga, Tusiga Sopoaga, Fagaese Sopoaga, Sopoaga Fiu Sopoaga, Touli Fa’agatama Sopoaga ma Tuaoipa Sopoaga.

Na fa’aipoipo atu o ia i le alo o le Fa’afeagaiga Mila Sapolu, Simoe Sapolu Sopoaga ma e to’afa lava le fanau: Memorah Ema Sopoaga, Hasedh Masalosalo & Ivette Sopoaga, Masalosalo Jr. Ah See ma Sabrina Tolo. E to’alua o la’ua fanau a fanau: Mareh Rojelio Hasedh Sopoaga  & Melekh D’Angelo Sopoaga.

I lo la’ua soifua tautua i le Atua e ala i lana auaunaga a’oa’o o le fanau i le Upu a le Atua, e to’a 16 o la’ua alo i le galuega, ma o ni fetu fo’i nei i lona pale i luma o le Atua, aua o ana taulaga ola ia i le avea ai ma “failauga o le Upu.”

Ua i ai fo’i le lisi e to’a 31 i latou ua avea o ana fanau tausi ma le faletua, ma ua iloga ai, lona soifua tu’utoina e a’oa’o le fanau talavou i le finagalo o le Atua. “Aua lava ne’i ia te’i matou le Ali’i e, aua lava ne’i ia te’i matou, ae o le vi’iga ia fo’i i lau Afio, e ona le galuega o lo’o faia nei.”

O nisi nei o mea e tautalagia e ia e tima’i atili ai i lana fanau ua mae’a fa’au’uina ia avea ma Faife’au Samoa o le EFKAS. Ua fa’ailoa mai e se tasi i lana molimau, “E fa’asala i matou i le taimi e sasi ai, e le alo le fa’asala ona o i matou ua fa’ailo o lana fanau i le galuega! Fa’afetai mo lena a’oa’oga sili i o matou ola tautua ai i le Atua!”

O le soifua a’oa’oina o le Tama na amata mai i le A’oga Faife’au i Nofoali’i. Soso’o ai ma le a’oga i le Nofoali’i Primary School. Au mai ai lea i le a’oga a Maluafou ale Ekalesia Tele i Samoa. Ulufale ai loa i le Kolisi i Leulumoega ma ulufale ai i le A’oga Fa’afaife’au i Malua Theological College maua ai lona fa’ailoga Diploma of Theology. 1963 Ulufale i le Iunivesite o Lonetona ma maua ai lona fa’ailoga Religious Knowledge Certificate. 1965 Ulufale i le Congregational Religious College i Niu Sila, maua lona fa’ailoga: Diploma of Theology. 1966-1968 Ulufale Pacific Theological College i Suva Fiti, maua lona fa’ailoga Bachelor of Divinity. 1972-1973 Ulufale i le McCormick University [USA] maua ai lona fa’ailoga Master of Theology. 1975 Ulufale i le Iunivesite o Hebrew i Isaraelu maua lona fa’ailoga Diploma of Language: Teaching Area: Old Testament Theology & Languages - Eperu, Eleni ma Latina.

E ese mai ona tiute na, sa avea o ia ma Taitaifono o le Komiti Fa’afoe a le PCC, o se faia’oga fo’i i le Kanana Fou Seminare. O ia fo’i o le Taitaikomiti o le Ofisa o le Palola a le tatou malo, o se sui fo’i o le komiti iloilo o le Tusi Pa’ia Samoa.

“Aue, ua maliliu Toa, ua maumau ai auupega o le taua,” peita’i, o lou oti o lou manuia lea, e pei o la Paulo se tasi fo’i o pelofeta o le Upu moni a le Atua.

“Lo’u agaga e, ia e fa’amanu atu ia Ieova, o mea uma fo’i o i totonu ia te a’u, ia fa’amanu atu i lona suafa pa’ia. Lo’u agaga e, ia e fa’amanu atu ia Ieova, aua fo’i nei galo se mea e tasi o ana meaalofa!”

O le aso ananafi na faia ai toe sauniga o le susuga Rev. Sopoaga i lana ekalesia o le Talalelei o le Faaolataga i Happy Valley.