Toe Sa’afiafiga - Sasa Celestine Foster Langkilde

“Aua e mulimuli mai ia te a’u o lou alofa ma le agalelei i aso uma, ou te nofo fo’i i le fale o Ieova i aso e tele lava!” Salamo 23:6

 

O upu ia o se molimau a le tama o le aiga, Vaito’a Hans Langkilde, o nisi fo’i sa latou fa’amoni i lea molimau, o i latou sa tele taimi na fa’alogoina ai lea fa’aupuga, i talanoaga ma toe tau sa’afi i le tina ua moe, ma ua malolo nei. “O le mea lea e tau o le ata e fa’ailoa ai le fiafia ma le agalelei, ailoga ua va’ai se tasi o ita lea tina?”

 

“Amuia fo’i se tama, sa ia maua se ava amio lelei, e silisili lona tau i penina, ae toe lalelei fo’i, e leai se faitioga i lea fo’i itu, pau a o lea, e le o umi na’ua le mafutaga e pei ona momo’o ai le to’atele ia ausia.” O se tasi lea molimau sa fofogaina i le taimi o le sauniga a le aiga sa fa’apito augafa i le fa’amoemoe e sa’afi ai le aiga atoa mo le latou pelega ua tu’ua le mafutaga.

 

O Sasa Celestine o le alo tama’ita’i o Fanene Filoisamoa Foster ma le faletua o Noela Hall Foster o Lalopu’a i Pago Pago na soifua mai ia Me 16,1948 ae ua maliu ia Oketopa 29, 2013.

 

 E to’a lima tuagane ae to’atolu ona uso. I le taimi nei, ua to’atasi lona uso, Jane Foster Faumuina, ma lona tuagane Peter Diehl Kile Foster, o lo’o soifua mai pea, ae o isi uma na muamua ia te ia.

 

“E ui ina pisi lenei tina i le tausiga ma le va’aiga o le fanau, e leai se mea e tasi e na te le faia mo le fanau, i aso fa’apitoa o latou a’oga, fonotaga a PTA ma le tele o sailiga tupe ma mea fa’atino mo a’oga a le fanua, e le misia lava!”

 

 Na fa’ato’a toe taliu mai i Amerika Samoa i le tausaga e 1976 ma na amatalia loa le pisinisi a le aiga o Langkilde i Fagatogo o le Icewich, o ia lea sa fa’amoemoe i ai lea fo’i pisinisi i lona fa’atautaiga i aso ta’itasi. O se pisinisi sa matua iloga fo’i lana tautua i tagata o le atunu’u i lona tula’i mai, ma o i’ina sa fa’ato’a fagaina ai fo’i le atunu’u i le “Fish’n’Chips & tata sauce!”

 

E ui ina tele taimi e fa’aalu i le fa’agaoioiga o pisinisi a lona aiga, ae sa le tu’ua ai tiute fa’atina ma faletua o se Tama a le Malo ma se tasi e iloga i tulaga o le soifua fa’afiafia e ala i musika.

 

E ui i le tele o lu’iga i le tausiga o le fanau ma aiga, ae sa mua’i fa’ato’ai fa’afitauli tau le soifua maloloina o Sasa i le tausaga 1996, ae sa le motusia ai ona foliga fiafia.

 

Ua amata ona fa’atonuina ia nofo fale, ae e le tu’ua ai lana tiute fa’apoutu o le aiga, e fesiligia i mea uma, e taofi mamau i lona tofi o le fautua i le fanau ae maise le tama o le aiga i ona tiute fa’atino o se sa filifilia fo’i e lona itumalo e avea ma latou sui i le Maota o Sui o le Fono Faitulafono.

 

“A i ai Sasa i ni tapenaga e mautinoa lava e matagofie mea uma, e o’o lava i tapenaga o mea tausami ma le tulaga mautu o tonu e fa’atino ai so’o se fa’amoemoe, e iloga lava e i’u i le lelei mea uma. O se tina tapenapena mamao mo mea uma! Fa’afetai Mama.”

 

Na amata ana a’oga i le St Francis i Lepua ma ulufale ai fo’i i le A’oga Fa’apisinisi a le St Francis lava ina ua mae’a ama a’oga amata i tulaga lua. O lana ulua’i galuega sa avea ai ma tama’ita’i faigaluega i le Air New Zealand, Samu’s Ice Cream Shoppe, Icewich ma le Pepaco.

 

O se tina e mautu lona fa’atuatua i lona Atua ma ua faapea fo’i ona malosi lona agaga e mata’u ai i lona Atua. E to’a fitu o la’ua alo, ae 14 o fanau a la’ua fanau.

Comment Here