Ads by Google Ads by Google

Toe sa’afi mo Moeile’ele Mafo’e Fuimaono

“Ua ou tau le taua lelei, ua i’u ia te a’u le tausinioga. Ua ou taofi le upu o le fa’atuatua. O lenei ua teuina mo a’u le pale o le amiotonu, e foa’iina mai ia te a’u i lea lava aso, o le Ali’i le fa’amasinoga amiotonu, e le gata foi ia te a’u, ae o i latou ma lava o e fiafia i lona fa’aali mai.”

 

2 Timoteo 4:7

 

“Ua tonu ia te ia lea mau, aua o lona soifuaga, o se tasi e tala’i na’ua, e fiafia tele e fetufa’i ma le to’atele i le Upu a le Atua Soifua, ma e ia te ia lava le mata’u, ua i ona tagata!” O se fuitau taua lea sa i ai i le molimau a le susuga le Faifea’u Pr. Sauni Tuito’elau o le AOG i Nuuuli, lea o lo’o fesaga’i tonu lona malumalu ma le maota o le susuga Moeile’ele Fuimaono.

 

“E le fefe o ia e molimau i le Upu a le Atua, ma ina ua mae’a ona fa’amatala ia te a’u ona lagona ma lana misiona, sa ia fa’ailoa mai, ‘o lo ua tulata i le taimi e te va’aia ai ua ou fa’apipi’ia uma mau o le Tusi Pa’ia ma fa’asasaga mai i le alatele, ina ia mafai ona fesoasoani i tagata e faitau se upu o le afioga a le Atua i taimi uma e va’aia ai!”

 

“Lea ua tatou va’aia, ua mae’a ona ia faia, e tusa ai o le musumusuga lelei o le agaga ia te ia, ua fa’auma fo’i ona faiva, ma ua fa’amalolo e lona Matai, ae ua tu’uina pea nei fa’ailo mo i tatou uma.”

 

Mai lona soifuaga na soifua ane ai ia Ianuari 14, 1926 ma ua toe goto lona laia Mati 11, 2014. O ona matua o Laupu’a Fuimaono mai Uafato Samoa, ma Tiute Kiliata Fuimaono. E to’aono ona tuafafine e to’alua lava i la’ua o soifua mai pea; Malamalama Purcell ma Toetu Tauasa, ae toafitu ona uso uma ua maliliu uma lava. E tautua o ia ma lona aiga i lona aiga Sa Soli’ai, lea e toe to’atasi ai lava lona uso o soifua mai, Toloa’i Soli’ai, ae ua maliliu uma lava nai ona uso ma tuafafine ia.

 

O le la’ua fanau e to’a 12 o la’ua alo, ae to’a lima o la’ua alo tausi ma atoa ai le to’a 17 o i latou uma. O le aotelega o fanau a fanau a lenei tama ua atoa le 55 o i latou, ae o fanau a fanau a la’ua alo ua tula’i mai i le to’a 44.

 

“E mavae lenei lenei Tama, ae tumau le fa’avae sa ia fausia ai lona aiga, ia ola saili i le Atua ma lona finagalo, ia ola tala’i ma ‘au’auna i le Atua!” O se tala lea a Mafo’e Jr Fuimaono, o se ali’i faia’oga. Peita’i, i lana molimau, sa ia fa’ailoa ai, “Masalo o le taimi lenei, o le ale toe fa’asasaga i fafo laupapa na tusia ma fa’asalalau e le tama mo le mamalu lautele, ae o le a fa’asaga mai aga’i i le matou fale, ina ia tima’i atili ai o matou olaga!”

 

O ona toe sauniga sa fa’atautaia lea i le Malumalu LDS i Malaeimi, ma sa tumu lea sauniga i ona aiga, lana fanau ma latou aiga, ae maise o uo mamae ma e masani ia Fuimaono. O i latou fo’i e matua vavalalata le latou mafutaga ma Fuimaono i le latou Ekalesia a Iesu ole Au Pa’ia o Aso E Gata Ai, ae maise o aiga o lona faletua ua muamua atu ia te ia. I lona Sa, sa va’aia ai le leoina lea e le afioga Tuna Sotoa Ma’ae, o le fa’atamasa o lona aiga mai le Motusa.

 

Ina ua mae’a lona toe sauniga mamalu i le Malumalu sa molimoli atu lona tino i lona oliolisaga tumau i le Maota i Petesa ma lagomau ai.