Ads by Google Ads by Google

Toe Sa’afi mo Judy Fa’asiliga Tanuvasa - Fakatoumafi

“Sa ou tau le taua lelei, ua i’u fo’i ia te a’u le tausinioga!”

 

Ina ua mae’a le tausiga o lona tina matua, lea sa soifua mo le 90 tausaga, na’o le lua masina na toe nofo mai ai Judy e mafuta ma lona aiga, ae tu’ua fo’i e ia lona aiga i Vaitogi. E le’i fagofie i lana fanau lea tulaga, peita’i sa toe taliu mai uma i latou, e fa’amavae ma auai i ona toe sauniga sa faia i le Ekalesia a Tonga i Vaitogi, le ekalesia sa fa’amautuina e Judy Fa’asiliga ma Noa Fakatoumafi.

 

O le olaga o lenei tina, sa molimauina lona tausi malo lelei, o ona uiga e le fa’avasega tagata e alofa i ai, ma e le fefe fo’i e fa’aali ona lagona i so’o se tasi. I ona tuagane sa molimauina, lona lima malosi i mea e fa’atino mo le aiga potopoto, e fa’amoemoe i ai i latou i so’o se mea i le lotoifale o le afioga le Sa’o Auaumamana ma le pa’ia o Aiga.

 

O se tina e kuka lelei, e gaosi taumafa manogi ma e fiafia tagata uma e tausasami i ana tapenaga i so’o se taimi e talimalo ai. O ia o se tina e tausi matua na’ua, ma e fa’aalia lea, i lona lima ola i le tausiga o lona tina, fa’apea ana togala’au matagofie i lumafale.

 

“E tele tausaga sa faigaluega ai pea Judy i le Matagaluega o A’oga i le vaega a le School Lunch Program, ae pau lea o se tama’ita’i sifi kuka, e le puta lava ia. O ana taleni o le Kuka ma le fai togala’au matagofie, e fiafia uma i ai tagata.” O se molimau mai lea a si ana tama teine matua sa fai ma sui o le fanau e molimau mo Judy i lona aiga.

 

“E le’i tausia e Judy na’o lona tina, peita’i, sa fa’asalafa lona lea agaga i matua matutua o lona aiga i le isi itu o le alatele, o o’u matua, ao o ou a’oga i fafo ma nofo ai, ae tausi lava Judy o’u matua. E i ai fo’i se ulugali’i papalagi, na i’u lava soifua o lea aiga o ia tausia. O ana ia taleni sa fa’asoa mai e le Atua, fa’afetai e le’i fa’avaivai ai, ae sa ia tula’i ma fai!”

 

Na fa’amatala, “O isi uiga o lenei tama’ita’i, a’o talavou, e le fia faia’ina lana ti’eti’e solofanua i se tasi i totonu o Vaitogi, na ia ausia lava lea matati’a se’ia o’o ina le toe i ai ni solofanua i le afio’aga.”

 

O lana fanau e to’a 8, e lima tama ma le tolu teine, ma ua atoa le 13 o fanau a lana fanau. Na amata ana a’oga i le Lupelele, soso’o ai ma le a’oga i Mapusaga High, lea e fiafia tele e fa’asoa ai i ona tausoga ina ia a’o’oga i Mapusaga e pei o ia. O ia o se tina tausi fanau, ma e fiafia e tausia i latou. E maliu lava o ia, o avea ma Peresetene o le PTA o le ECE a Lupelele o lo’o a’oga i ai lona alo tama’ita’i ui’i, Aipunou Fakatoumafi.