“Aue, aisea ua moemoe loloa ai le Tina matua? Ua moemoe loloa aua ua malie i lona ola na foa’ina mai e le Atua mo ia e ola ai, i tausaga e tele ua ia molimauina ai lona olaga ma le fanau, o fanau a fanau a fanau a lana fanau, Fa’afetaia e ia le Atua mo le 93 o tasuaga o lona soifua sa ola ai. Ua malie lava o ia i le pule to a lona Atua!”

O nisi ia o tuleiga saunoa a le susuga le Fa’afeagaiga o le Ekalesia Fa’apotopotoga Kerisiano sa molimau i le saungia mulimuli o le tina o Suataga Tausaga Tagaloa, lea sa faia i le aso Tofi, Aukuso 27, 2015, 9:00 i le taeao i le malumalu o le ‘La’au o le Ola’ i Faga’alu.

E moni lava le molimau i lea tina, aua sa mua’i avea o ia ma totino o le Ekalesia Fa’apotopotoga Kerisiano i Amerika Samoa (EFKAS) a’o avea ma LMS i le tausaga 1945 i le atoaga o lona 23 o tausaga o lona soifua i Faga’alu lava i le La’au o le Ola. Ona soso’o lea ma le avea o i la’ua ma le tama o le aiga ma Tiakono ia Aperila 20, 1960.

Ua silia ma le 55 tausaga o lana auaunaga i lona Atua i lona tofi tiakono lea, ma o le tasuaga fo’i lea na fausia ai le malumalu tuai sa tutula’i mai se’ia pa’ia le tasuaga e 1996 ae suia ai i le malumalu fou lea ua i ai nei.

Na soifua a’e o ia i ona matua i le aso 4 Iulai, 1922 ae ua ia tu’ua nei le mafutaga mafana ma le fanau ma lo latou aiga ia Aukuso 3, 2015. O ona matua o le tofa Olofua Tausaga Lutelu  ma Leaia Tausaga Tuiolosega ma Olosega Manu’a.

I lona soifua aoa’oina na mae’a lava a’oa’oga i le A’oga i Olosega, si’itia mai i le a’oga a Tama’ita’i a le Ekalesia LMS lea ua fa’aigoaina o le EFKAS i Atauloma, ae tomuli ai ina a’oa’oina fa’atama’ita’i Tausima’i a le tatou malo.

Ona avea lea o ia ma tina e tausia lana fanau e to’atele lava, i le la’ua mafutaga ma le tama o le aiga, Tausaga Niui Tagaloa.  O le laua fanau e to’a 7, e to’afa tama ae to’atolu tama’ita’i, ae maise o lana fanau tausi e to’a 21 tama ae to’a 12 tamaitai. “O ia o se tina e fa’afoliga i se la’au mafala, e ofaga i ai fanau uma a si ona aiga fa’apea aiga o le tama o le aiga, ma sa fai fo’i lona fale ma nofoaga e fa’anofo a’oga i ai fanau uma ua lisia o lana fanau i lenei polokalama.” O ni molimau ola ia sa fa’afofogaina i lona toe sauniga.

Peita’i i le molimau a le fanau, sa avea ai se tasi o alo tama’ita’i o  Lise & Vailele Fa’asoa ma le fanau, e fa’ao’o mai se tala mo le silafia a le mamalu sa aofia mo lona toe sauniga fa’apea le pa’ia o aiga, aua o i latou sa avea ma tausi tina mo Suataga Tagaloa i lona soifuaga matua atoa.

“O Mama e taua tele ia te ia i matou le fanau a lana fanau. Matou te fia o uma lava ia te ia i le tu’uaga o a’oga, a’o i ai i Manu’a, e matou te vala’au ia te ia, e fa’anoi mai i matou i matou matua se’i matou o ai e tafafao ma mafuta ma ia i Olosega. Ua o’o fo’i ina si’itia mai i Faga’alu, ua le toe motusia ai le mafutaga ma ia.”

“O se tina e ote ma e a’oa’o i matou uma, ia faitau le Tusi Pa’ia, ma faia le talosaga afiafi ma le taeao. O lana lava tusi faitau o le Tusi Pa’ia i aso uma ma le nusipepa.”

O se tina e alofa tutusa ia i matou uma lava, e na te le faia fo’i ni tala e fa’aauau i se tasi o lana fanau, e tutusa lava lona alofa matou te va’aia mo lana fanau uma. E le tautala so’o, ae tautala sa’o ma fa’atonu i matou, pe a le usiusita’i le tagata i le fa’atonuga. E matou te misia tele o ia i lo matou olaga e afua i lenei aso o le a mou malie ese atu ai ma le mafutaga o ia.” O le molimau lea sa saunia lelei e le fanau a le fanau.

O le molimau na tapena e le fanau sa fai ai Mauigoa Reupena Tagaloa ma molimau fa’apitoa. “O le tina sa tu’u tasi le tausiga o ia i aso uma ua matua i lo matou tuafafine o Lise ma le tama o Vailele Fa’asoa. Ua fa’afetaia fo’i e i matou uma, le tausiga matalasi sa fa’atino e le tuafafine ma lona aiga mo lea vaitaimi umi. O se tina e le fa’alogologo tiga i se matou tausiga ae maise i sona gasegase. Masalo fa’ato’a matou va’aia lava ua ma’i lo matou tina, ina ua o’o mai ia Me 2015 ma ua sau ai, ma va’aia o ia ua tausia i lona moega.”

Sa fa’aauau le molimau, “O se tina e le tele ni upu e tautala ai, ae ua matou iloa lona naunau i le nofo fealofani o lana fanau. E fa’apelepele ma auau i fanau a ona tuagane, nai lo i matou lana fanau. E iloga lea, i ana fa’ai’uga fai i suafa matai o le matou aiga, e fa’auia uma ia Malemo Lafoia Tausaga, ae fa’atu’utu’u ese i matou lana fanau.”

“O se tina fo’i e ola taumafai, ma e mautu lona fa’atuatua i le Atua e faamanuia mai i lana fanau, aua e fa’afia ona mae’a le Tusi Pa’ia atoa o faitauina, ma poloa’i mai lava ia faitau i le Tusi Pa’ia.”

O le pese e fiafia i ai na molimauina e lana fanau o le “Nofoa afi e alu i le lagi” ma lana pasese o tagata alofa, tagata fa’atuatua ma le tagata amiotonu e o ai. O lea fo’i le vi’iga na pepese ai lana fanau ma fanau a lana fanau, ina ua mae’a latou molimau.

O le molimau a le susuga le Faife’au Misipouena Tagaloa, sa ia toe fa’ailoa mai ai le soifua tausi tama o lenei tina. “Sa avea o ia ma to’omaga o aiga mai si matou nu’u o Olosega, e nonofo ma a’o’oga ai i lo la’ua fale sa i ai i Faga’alu.”

“O sana auaunaga ua matou ofoina atu i ni tiute ma faiva ese’ese ua matou tautua ai nei i le atunu’u ma ona tagata, i setete i fafo ma le tatou nei teritori. O lana mau, ia outou ola fealofani i totonu o le matou aiga atoa. Fa’afetai ia Vise ma le aiga mo le tausiga, o i latou ia e pa’u i ai le mamafa o le mafutaga ua motusia nei, aua ua amia le sa avea ma tumutumuga i le mafutaga fa’aleaiga. Taunu’u ia i latou le mau, amuia e fa’anoanoa, aua e fa’amafanafanaina i latou.”

O e na tutupu mai lenei tina e to’a fitu i latou, ma fanau a fanau a fanau a lana fanau e 42 i latou. O ona uso e to’a tolu toe to’atasi o lo’o soifua pea, Lusia Tauolo Taiepisi. O ona tuagane e toatolu ua maliliu uma. Ua lagomau nei o ia i lona oliolisaga tumau i lo la’ua maota i Ottoville, Tafuna.