Ua lagia Malaeoletalu, ua lagia fo’i le mea e afio ai le Sa’o Usoali’i. Afifio ai afioga i Tapunu’u, afio ai le Toeali’i, afio ai le afioga le Aloali’i, ae tainane le fetalaiga maualuga a Ta’amuovaigafa ma Taesaliali’i ma le pa’ia o le Launiunasaelua.

O lana afioga sa 'avea ma fofoga o le Itumalo fa’apea le afio’aga i le Maota Maualuga o le Fono Faitulafono mai le tausaga 2005 se’ia o’o i le tausaga 2008. E le gata i lea tofi maualuga, sa tele isi vaega o lona malo, ae maise lona afio’aga ma lona aiga potopoto sa tautua ai, a’o soifua, ma ua 'avea ma pine fa’amau o lona soifua aoga i ona tagata, aiga ma lona malo, fa’apea fo’i lana Ekalesia sa tautua ai i le Atua, Ekalesia Katoliko Roma i Fagatogo lava.

Na soifua mai le afioga Ma’ilo Atonio Pulunone i ona matua, Afioga ‘Mailo’ Saiga Pio ma Iulia Lui Uta’i i le aso 6 Oketopa, 1937. Peita’i, ua amia o ia e lona Atua e malolo i a Ianuari 17, 2012. E to’atasi lava lona uso o Sauni Paulo Ma’ilo [maliu] ae to’a lima ona tuafafine: Rosa Mailo [maliu], Ioana Atualevao[maliu], Makerita Laban [maliu], Rosa Rogich ma Isapela Warren.

O lona faletua na fa’aipoipo i ai o le faletua o Fa’ava Matalena Fonoti ma e to’afitu o la’ua alo, to’a 4 tama ae to’atolu tama’ita’i. Marcellinus, James, Tony, Julius Caesar, Mary, Barbara ma Virginia. E to’a 22 fanau a o la’ua alo, ae to’atasi lava le fanau a fanau a o la’ua alo, le tama’ita’i o SunshineMailo  Ma’aolona.

I lona soifua galue ai mo le Ekalesia, na afua mai lava ina ua 'avea o ia ma tamaitiiti a’oga i le Marist Felela, Amerika Samoa. Ina ua mae’a sa fa’aa’e o ia i le a’oga maualuga a Sagato Iosefo i Lotopa i Apia, Samoa. Soso’o ai ma le auina atu o ia e aoga i a’oga Maualuluga i Sacred Heart i Karaiesetete, Niu Sila. Ae toe fa’ai’u mai ai ana a’oa’oga i le Iunivesite o Portland i le Iunaite Setete o Amerika.

O lona soifua faigaluega i Matata sa 'au'auna ai i lona Malo ma le Malo tele na mua’i 'avea lava o ia ma Faia’oga.

Na amata faia’oga o ia i Aukilani, Niu Sila i le Marelin College i le tausaga 1959. Soso’o ai ma le 'avea ma faia’oga i le Utulei High School a Samoana lea ua i ai nei i le tausaga 1961-63. Toe 'avea lea ma Faia’oga i le Poyer Junior High School i le tausaga1965. Si’itia lea e 'avea ma faia’oga i le Lane Elementary School i Eugene, Oregon i le tausaga 1966. Toe 'avea ma faia’oga i le Holy Cross Elementary i Oregon i le 1966 lava. 'Avea ma faia’oga i Leone High i le tausaga 1969, toe 'avea ma faia’oga i le Samoana High i le tausaga e 1970. Si’itia fo’i lea i Seattle, Uosigitone ma 'avea ai ma faia’oga i le Seattle Central Community College 1975-1976.

E i ai isi ana galuega sa tautua ai mo lona malo ma ona tagata ma sa 'avea o ia ma Supavaisa e iloiloina Sikolasipi a le Vasega o fanau fa’au’u mai A’oga Maualuluga i Amerika Samoa. Na 'avea o ia ma faufautua fa’apitoa mo le Matagaluega o A’oga a le Malo i le tausaga 1973-75.

Na 'avea ma Fa’atonu o le Financial Aid Program i le tausaga 1973-76. Na 'avea fo’i o ia ma fa’atonu o le  Polokalama fa’apitoa mo fanau e lua gagana e tautala ma tusitusi ai i le A’oga i Seattle Uosigitone i le tausaga 1976-1980.

Na 'avea o ia ma fa’aliliu 'upu a le vaega o Fa’amasinoga i le tausaga 1976 -1980. Sa 'avea fo’i o ia ma Fautua fa’apitoa a le Fa’amasinoga Maualuga a Amerika Samoa 1970-1980. O ia fo’i sa se’ei i le tofiga Admin. Comptroller mai le tausaga e 1982-1992.

Na 'avea ma Fa’amasino Lagolago i le vaega o Fa’amasinoga i le tausaga 1990-1994. O ia sa 'avea ma Senatoa o le Itumalo o le Ma’oputasi #6 i le Fono Faitulafono i le tausaga e 2005-2008.

E pei ona lau silafia i lona Aiga Potopoto, Afio’aga o Fagatogo ma le Itumalo o le Ma’oputasi. O lana afioga le Sa’o mo lona Aiga Sa Ma’ilo, ma sa tautua ai mo le silia ma le 30 tausaga o lona soifua. Sa 'avea o ia ma Ta’ita’ifono o le Pule’aga Samoa Pago Pago, fa’apea fo’i ma le Matagaluega Sagato Iosefo.

I lona soifua galue, sa maua lona avanoa matagofie na te tusia fa’atasia ai se tusi ma lona tua’a, Ma’ilo Saiga Pio - “Palefuiono” Ia taofi mau lau Aganu’u!

O ia o se tagata faipisinisi, aua e tele ana pisinisi i lo tatou nei malo: Faletusi, fale’aiga, Fale'oloa ma Fale Mautotogi, ae maise lava, sa 'avea o ia ma Faifa’ato’aga i Hawaii mo ni tausaga e tele.

O le a i ai lona Sa i le Maota Pavillion i le Malaeoletalu i Fagatogo, e amatalia ai ona sauniga i lana Ekalesia i Fagatogo lava.  O le a ta’ita’i lona toe sauniga e lana afioga Patele Viane Etuale VG, ae lagolagosua i ai faife’au o le Pule’aga. O le a fa’aaogaina le 'Aufaigaluega Tali Misisa a Sagato Iosefo i Fagatogo, ma o le a fofogaina fo’i vi’iga o le Atua e lana 'aufaipese mamalu i Fagatogo lava.