Ads by Google Ads by Google

Toe Sa’afi’afiga mo Aipunou Luava’asi’itia Auaumamana

Na soifua a’e o ia i Fasito’outa, Samoa, i ona matua o Auaumamana Foe ma lona tina o Te’evao Le’a Aiono Auau mai Fasito’outa, Samoa i le aso23 Me, 1923, peita’i ua maliu i le aso 16 Tesema, 2013 ua atoa lelei fo’i le 90 o ona tausaga.

 

Na pa’au mamao mai lona uso, fanau ma latou fanau, ma aiga i ona itu tetele ma ona itu taulagi mo le toe taimi o le mafutaga ma le tina i lenei olaga, ma sa iloga fo’i ona nofo fa’anoanoa fanau ma latou fanau, aua o se tina faitama ua mou malie ese atu nei mai le va’ai ma le mafutaga mafana i le alofa.

 

I ni molimau a le fanau sa fa’afofogaina i le taimi o lona toe sauniga i le malumalu EFKAS i Vaitogi, sa fa’ailoa ai e le fanau, “O lenei tina e osi aiga tele, e tausi aiga fo’i, e auau ana mea uma e fa’atino ai le auaunaga i le Galuega a le Atua fa’apea ma le nu’u. E tapena to’atasi lava e Aipunou mea uma a’o i ai lona tama i le suafa o aiga, “Auaumamana” soso’o mai ma lona tuagane ua maliu atu fo’i, sa fa’apea lava ona osiosi e lenei tina le aiga, ona e faituagane tele.”

 

I lona toe sauniga sa tula’i ai lava le susuga le Faife’au Toeaina Kalepo Vaitautolu e ta’ita’ia, ae tofu sao isi fa’afeagaiga o fata faitaulaga e fia i le afio’aga o Vaitogi i isi vaega o le sauniga mamalu na amatalia i le itula e 9:00 i le taeao o le aso 30 Tesema, 2013.

 

O vi’iga o lea sauniga mamalu sa tofu sao fo’i i ai aufaipese e lua a le EFKAS i Vaitogi, le Aufaipese e Lua a le Ekalesia Tonga i Vaitogi ma sa felanulanua’i manuia o le Atua i gagana e lua sa fa’afofogaina ai le tatalo ma pesega o lea sauniga.

 

“E leai lava se mea e popole ai fua le aiga, e o mai ua mae’a tapena mea uma e Aipunou, e i ai ona uiga tausa’afia e fiafia lona olaga, ma e galue malosi tele. O se tina e teuteu tino ma e le masepu se mea i ona la’ei ilaila ma teuga fa’afetauia lelei ai.” O nai toe sa’afi ia a le fanau, peita’i, e matauina tele le fetagisi o fanau a fanau i taimi uma o lea toe aso ma le tina matua.

 

“O lenei tina, po’o ai lava se tasi o matou fanau e va’aia e le usita’i pe faigata lona olaga, ona ‘ave loa lea e nofo ma Mama. O i’ina e matua le toe fa’alogoina ai se tala o toe faia e lea tamaititi ma teineiti se uiga fa’aletonu. E tele na’ua lona taimi e va’aia ai lana fanau, ma fanau a lana fanau.” O se molimau lea a lana ulumatua, Tau Tanuvasa.

 

I le soifua fai aiga o Aipunou Auaumamana; na fa’aipoipo ai i le ali’i faipisinisi o Tanuvasa Fati AhFar ma e to’a 8 ai lana fanau, ma ana fanau tausi e to’atolu: Tau Tanuvasa; Malo Tanuvasa, Seuga Tanuvasa; Falesiliga Judy Ah Far; Mose Tanuvasa; Jerry Tanuvasa; Levi Tanuvasa [maliu]; Tiare Reid, Tanya Fatilua ma Iosua Sefo. Fanau a fanau e to’a 37 ma fanau a fanau a lana fanau e to’a 28.

 

E iloga le tautua a lenei tina i le Ekalesia, ma sa saunoa le ta’ita’i o le sauniga, Rev. Elder Kalepo Vaitautolu, “So’o se tasi e fa’afualoa lona soifua i le nu’u na foa’iina e le Atua ia te ia e ola ai i lenei lalolagi, e lava lana tautua ia te ia, ma sa soifua mata’u fo’i.”

 

O le molimau a lona uso moni e to’alua ai i la’ua o totoe mai fanau a latou matua e to’a 9, sa fa’apea ai Falefitu Auau, “O se uso e tausi aiga, e le fa’ailoga esea e ia ni mea mo ia ma lana fanau, e matamau ia i matou o uso ma ona tuagane, fa’aeaea ia i matou ae maise le tuagane sa se’ei mai le suafa a le aiga “Auaumamana.”