Toe molia se alii pagota i le tulafono

Ua toe molia nei se alii pagota i le tulafono, e mafua mai i le faalavelave lea na ia fesoasoani ai e faasosola alii pagota e toalua lea na la osofaia le lala o le Faletupe o Hawaii i Tafuna i le tausaga na te’a nei, faapea ai ma le faleaiga o le KFC ma le Pizza Hut.

 

O le alii o Val Ofoia ua molia nei e le malo i le solitulafono mamafa o lona fesoasoani lea i se pagota ina ia sola ese ma le toese, ma o lea solitulafono e mafai ona faasala ai se tasi i le toese mo le umi e le silia i le lima tausaga, pe faasala foi i le salatupe e le silia i le $5,000, po o le faasala foi i faasalaga uma ia e lua.

 

O tuuaiga faasaga ia Ofoia na afua mai i le faalavelave lea ua molia ai Ryan Pite ma Joe Leota i le tulafono, ina ua la osofai ma talepe fale lala o le faletupe o Hawaii i Tafuna, faapea ai ma le faleaiga o le KFC ma le Pizza Hut o lo o sosoo atu ai, i le po o le aso 6 Iulai, 2012.

 

I faamaumauga a le faamasinoga o lo o taua ai e faapea, o se alii leoleopo o le ofisa autu o le Faletupe o Hawaii i Honolulu, na vili mai i le ofisa o leoleo i Amerika Samoa i le vaveao o le aso 6 Iulai 2012, ma faailoa mai ai le talepe e ni tagata o le lala o le faletupe i Tafuna.

 

I ni ata sa pu’eina e masini pu’eata a le faletupe a Hawaii i Tafuna i le 3:57 i le vaveao o le aso e pei ona taua, sa vaaia ai ni tagata o feoa’i i totonu o le potu o lo o teu ai tupe, ae pe tusa o le 4:06 i le vaveao lava lea na vaaia ai loa se lima o taumafai e tatala le sefe u’amea o lo o teu ai tupe i totonu o le faletupe, ae o le itula e 4:37 na faatoa taunuu ai loa leoleo mo a latou suesuega.

 

E tusa ma le $1,146.50 le tau atoa o mea sa faaleagaina i le faletupe o Hawaii e aofia ai faamalama ma masini pueata sa faaleagaina.

 

O le vaveao lava foi lea na logoina ai e se tagata faigaluega a le KFC le ofisa o leoleo i Tafuna mo se fesoasoani, ona o le latou faleaiga ua talepe e ni tagata, faatasi ai ma le faleaiga o le Pizza Hut.

 

O mea na gaoia mai le Pizza Hut e aofia ai ni lavalava, o se naifi, moli uila ma se DVD, ma e tusa ma le $456 le tau atoa o mea sa faaleagaina i le Pizza Hut ina ua tata’e le faitoto’a tioata ma faaleaga isi mea totino i totonu, ae o le KFC e $300 le tau aofa’i o mea sa faaleagaina i lea osofaiga.

 

A’o taumafai leoleo e saili ni faamatalaga e fesootai ma nei solitulafono, na faafuase’i ai ona faailoa e se alii pagota o lo o loka i le toese i Tafuna le ofisa o leoleo ma faailoa i ai faamatalaga uma o lo o ia iloa e uiga i lenei mataupu, faapea ai le naifi ma le moli uila na tuu atu e Pite ia te ia.

 

Na taua foi e le molimau i leoleo e faapea, sa tautino atu Pite ma Leota ia te ia, o laua na sosola i tua ma talepe le lala o le faletupe o Hawaii i Tafuna, faapea ai le KFC ma le Pizza Hut i le vaveao lava lea e tasi, e ala i le fesoasoani a le alii pagota o Ofoia i le tatalaina o le faitoto’a o le sela sa loka ai laua.

 

Ina ua fesiligia e leoleo le alii o Ofoia e uiga i lenei mataupu, sa ia taua ai e faapea, i le aso na sosoo ma le aso na tulai mai ai le faalavelave, na fai atu ai Pite ma Leota, e manaomia lana fesoasoani, o laua o lo o fia sosola i tua ma le toese mo se po se tasi.

 

O Ofoia sa avea ma se tasi o pagota faatuatuaina (trustee) i totonu o le toese i le taimi lea, ma sa faaaoga e Ofoia lona tulaga lea e maua mai ai ki o le toese mai leoleo o le falepuipui.

 

Na faailoa e Ofoia le manaoga a Pite ma Leota i le alii leoleo o le falepuipui ia Rocky Tua, ma tatala ai loa lea e Tua o le sela sa loka ai Ofoia, toe tuu i ai ma le ki e tatala ai le sela ina ia mafai ai ona sosola Pite ma Leota i tua.

 

Na taua e Ofoia i leoleo lona iloaina o le taimi na sosola ese ai Pite ma Leota i tua mai le toese, ma le taimi o le vaveao na toe fo’i atu ai i totonu.

 

O lo o taofia pea i le toese i Tafuna ia Ofoia e aunoa ma se tupe ua faatulaga e le famasinoga e tatala ai o ia, e faatali ai le aso lea ua faatulaga

Comment Here