O se alii pagota o loo tuli sona faasalaga faafalepuipui i Tafuna mo le 10 tausaga, ua toe molia e le malo i le isi mataupu fou, o le sola lea ao tatala o ia i tua e alu e faigaluega.

O le vaiaso na te’a nei na tulai ai le alii o Marlon Uli i luma o le faamasinoga faaitumalo mo lana mataupu fou e pei ona tuuaia ai o ia e le malo, ma ua faatulaga o le vaiaso nei e faia ai lana uluai iloiloga e iloa ai pe lava mau a le malo e tuu atu ai lana mataupu i luma o le faamasinoga maualuga.

E tusa ai ma faamaumauga a le faamasinoga, o se uluai pagota lea ua molia i le solitulafono lenei, o le sola ao tatala i tua e faigaluega.

O le vaega a le Vice and Narcotics sa tuu atu i ai le suesueina o lenei mataupu, ina ua tuuaia le sola soo o le ua molia i taimi sa tatala ai e alu e faigaluega. O le alii leoleo suesue ia Det. Ioane Paselio sa suesueina lenei mataupu.

I faamaumauga a le faamasinoga o lo o taua ai e faapea, o le aso 25 Iuni 2010 na talia ai Marlon e tatala i tua e faigaluega i le 3M Burger, ae o le aso 26 Mati 2012 na talia ai o ia e tatala i tua e faigaluga i le Matrix Landromat & Store.

Ao lei tatala Marlon e alu e faigaluega, sa faamalamalama ia te ia aiaiga uma o le polokalame, ma sa faailoa foi e le ua molia lona malamalama atoatoa i ai, ae ina ua osofaia e leoleo le falepuipui i Tafuna i le aso 22 Iuni 2012, sa maua ai i totonu o le sela o loo loka ai Marlon nisi o mea e le tatau ona i ai i totonu, ma o nisi o ia mea sa masalomia ai le auai o le ua molia i nisi o gaioiga mai le taimi e alu ai e faigaluega.

Sa maua i totonu o lona potu ni risiti mo ni faatauga sa faia i le ACE Hardware, lea e amata mai i le masina o Novema 2011 e oo mai ia Me 2012 aso o loo i luga o risiti nei.

Na fesiligia e leoleo se supervisor o le faleoloa o le ACE Hardware ma ia faamaonia ai le tatalaina lea o se account a le ua molia i le latou faleoloa. Sa faapea foi ona fesiligia nisi o talitupe o lo o taua o latou igoa i luga o risiti ma faamaonia mai ai le vaaia o le ua molia i totonu o le faleoloa pe silia ma le faa 10.

Na taua e le isi talitupe lona vaaia o le ua molia i le masina o  Mati 2012. Sa ia taua e faapea, na te iloaina le ua molia ma lona uso masaga leaga sa faalogo ai i luga o le news, ae o le isi talitupe na ia taua i leoleo, e silia ma le faa 20 ona ia vaai i le ua molia i totonu o le faleoloa.

Sa maua foi i le osofaiga a leoleo i le falepuipui se laisene ave taavale sa tuuina atu i le ua molia i le aso 14 Setema 2011, o lo o i ai ma lona ata i luga o lea laisene. Na taua e se tagata faigaluega a le OMV ia Sam Kolone lona vaaia o le ua molia i le aso 14 Setema 2011 o alu atu e pu’e lana laisene ave taavale.

O le isi risiti na maua e leoleo o lo o i ai le igoa o le kamupani a le CSL, ma mafua ai loa ona fesiligia e leoleo se tagata faigaluega o lea kamupani, ma ia faamaonia ai i leoleo lo la galulue faatasi ma le ua molia mo le faatulaiina o se pisinisi Fale Tata Lavalava a le ua molia i tua o le faletalimalo o le Tradewinds.

Na faailoa e le molimau i leoleo e faapea, e 20 masina e tata ai lavalava ma masini faamamago lavalava e 15 na oka e le ua molia. O ia oloa uma sa faatau e le molimau ae ua malie le ua molia e toe totogi atu lana tupe.

O Marlon ma lona uso masaga o Merlin Uli na ta’usala e se vaega iloilo iuga i moliaga o le umia o fualaau faasaina, ma poloaina ai le faasala o i laua i le toese mo le tai 10 tausaga.

O le moliaga fou lea ua tuuaia ai le ua molia, o se solitulafono mamafa o le vaega C, lea e mafai ona faasala ai se tasi pe a faamaonia i le toese mo le 5 tausaga, pe faasala foi i se salatupe e le silia i le $5,000, poo le faasala foi i faasalaga uma ia e lua.