Toe molia i e tulafono se ali’i sa avea ma leoleo

O le ali’i leoleo lea na faa falepuipui e le faamasinoga i le 2009 mo le tausaga atoa, ina ua faamaonia moliaga o le faaoolima, ua toe molia nei e le malo i moliaga mamafa e lua o le faaoolima i le tulaga muamua ma le faaaoga faasolitulafono o se a’upega mamafa.

 

O le vaiaso nei na faila ai e le malo moliaga faasaga i le ali’i o John Tialavea, e mafua mai i se faalavelave na tula’i mai i Amouli i le aso 12 o Me, 2102 ina ua faapa e le ua molia se fana i se fafine ma sana tama sa faia se la galuega i se fanua o lo o finau ai aiga e lua.

 

Sa valaau lenei tina ma lana tama i le Ofisa o Leoleo i Fagaitua ina ua fanaina i la’ua e Tialavea ma na fa’aaia e le tina i leoleo e faapea, o le fanua lea na tula’i mai ai le faalavelave, o lo o faaauau pea ona tulai mai ai se eseesega i le va o le latou aiga ma le aiga a Tialavea, e ui ua maea ona lesitala e le Sa’o o le aiga le fanua i le igoa o le latou aiga i le 60 aso talu ai, o le mafuaaga lea na la o ai ma lana tama e tapena le fanua.

 

Na taua e le tama a le fafine i leoleo e faapea, ao la pisi ma lona tina i le tapenaina o le fanua, sa ia vaaia se asu o sau mai le isi itu o le fanua, e lei umi ae ona vaaia Tialavea ma lona toalua o lo o susunu vao mai i le itu lea o le fanua, ma o le taimi lea na amata ai ona palauvale atu le ua molia ia te ia ma lona tina ma fai atu ia i laua e o ese ma le fanua.

 

Na ta’ua foi e le tama a le fafine i leoleo lona faalogoina o Tialavea ua valaau i lona atalii e avatu le fana ma na ia vaaia le tuuina e le tamaititi o le fana ia Tialavea ma e le’i umia ae ona faalogoina le pa o le fana.

 

Na fa’aauau le faamatalaga a le tama a le fafine e faapea, sa ia fesiligia le tamaititi (atalii a Tialavea) i ni nai aso na sosoo ai, pe aisea na alu ai aumai le fana ma na tali lea alii, na ia usita’i ina ne’i fasi o ia.

 

Na taua e Tialavea i leoleo e faapea, o ia o lo o nofovaavaaia i luma o le faamasinoga, ma o se tasi o tuutuuga o lana nofovaavaaia o le faasa lea ona ia umia o se aupega matautia, sa ia faailoa foi i leoleo, e le o lesitalaina se fana i le Ofisa o Leoleo i lona igoa.

 

O le tausaga e 2008 na molia ai e le malo Tialavea i le moliaga o le faaoolima, ona o se faalavelave na manu’a ai se ali’i i luma o le fale kalapu a le Evalani i Pago Pago, ina ua faao’olima i ai le ua molia e ala i lona taina lea o ona foliga i se moli uila.

 

E $20,000 lea ua faatulaga e le faamasinoga e totogi ona faatoa mafai lea ona tatala Tialavea i tua mai le toese i Tafuna, lea e pei ona taofia ai e oo mai i le taimi nei.

 

Comment Here