Toe molia fo’i isi i le faaleagaina masini McConnell Dowell

O le vaiaso nei na toe faila ai foi e le malo se isi mataupu i luma o le faamasinoga, faasaga i ni alii se toalua i lo la faaleagaina lea o masini fai auala e tolu a le kamupani fai auala o le McConnell Dowell, sa paka i Leone mo le faaleleiina o se vaega o le auala.

 

O le aso Gafua na te’a nei na faasala ai e le faamasinoga maualuga ni alii talavou se toalua mai Aua, ina ua ta’usala i laua i le faaleagaina o masini fai auala se lua a le kamupani lava lenei sa paka i Aua, mo le tau faaleleia o auala i lea itu o le atunuu.

 

O i laua ua molia i le mataupu fou lenei e aofia ai Simi Vesi lea ua molia i le moliaga mamafa o le faaleaga meatotino i le tulaga lua, ma Fred Maloata lea ua molia i le moliaga mamafa o le faaleaga meatotino i le tulaga muamua, ma ua fuafua o le taeao nei e tutula’i ai i laua nei i luma o le fafamasinoga maualuga, mo le valaauina ai o le la mataupu.

 

O le mataupu lenei na tofu atu i le Ofisa o Leoleo, ina ua talosagaina e se sui o le McConnell Dowell leoleo mo se feosoasoani, i le suesueina lea o i latou na faaleagaina a latou masini fai auala e tolu sa paka i Leone, ma tofia ai loa le tamaitai leoleo suesue ia Det. Alisha Godinet na te suesueina lenei mataupu.

 

E tusa ai o faamaumauga a le faamasinoga, o masini e tolu a le McConnell Dowell sa paka i luma o le faleoloa o Kristopher Store i Leone, ma o le po o le aso 31 Oketopa, 2013 o lo o masalomia na faaleagaina ai e ni tagata.

 

Na fesiligia e leoleo nisi o molimau e uiga i lenei mataupu, ma taua ai e nisi o molimau lo latou vaaia o Maloata ma Vesi o nofonofo i le bus stop lea e sosoo ma le nofoaga na faaleaga ai masini i le po na tula’i mai ai lenei faalavelave, ae o le isi molimau sa ia taua lo latou vaaia o Maloata ma Vesi o lo o laua faaleagaina masini, ona ia faatonu lea o i laua ua molia e o ese ma le nofoaga o lo o i ai masini.

 

Na taua e le isi molimau sa i ai i le bus stop i le po na tula’i mai ai le faalavelave, pe tusa o le itula e 2:00 i le vaveao a’o nofonofo i le bus stop, sa ia vaaia ai le tapuni o le afi o le isi masini o lo o matala, e le’i umi ae ona vaaia Maloata ma Vesi o savavali atu i le vaega o lo o nofonofo ai ma la lima o lo o eleelea uma.

 

Ae na taua e le isi molimau i leoleo e faapea, i le po na tulai mai ai le faalavelave, sa ia vaaia ai i laua ua molia o savavali aga’i atu i le vaega o lo o i ai masini, o lo o uu atu e le isi o i laua se mea i lona lima, e foliga mai o se mea faigaluega.

 

E le’i umi ona pasi atu i laua ua molia e pei ona taua e le molimau, ae ona faalogoina loa se pao e sau mai le vaega o lo o paka ai masini a le McConnell Dowell, ina ua tu i luga e autilo, sa ia vaaia ai i laua ua molia o lo o feofeoa’i mai i le vaega o lo o paka ai masini fai auala.

 

Ina ua fesiligia e leoleo i laua ua molia e tusa ai o lenei mataupu, sa la ioeina ai lo la faaleagaina o masini e tolu a le McConnell Dowell, ona o le o atu fua ma paka i lo latou fanua.

 

O vaega o masini na faaleagaina e aofia ai tioata, tapuni o le afi o le isi masini, o le fagu tape afi (fire extinguisher) mo le isi masini.

 

Na teena e Maloata ma Vesi tuuaiga a le malo faasaga ia te i laua, ina ua tutula’i i luma o le faamasinoga maualuga ananafi. I lo la teena ai o tuuaiga a le malo, ua faatulaga ai loa le la ulua’i iloiloga e faia lea i le masina o Ianuari 2014.

 

E $5,000 le tupe lea ua faatulaga e totogi ona faatoa mafai lea ona tatala Maloata i tua mai le toese, ae o Vesi e $3,500.

Comment Here