Ads by Google Ads by Google

TOE MAUA LE SILIA $25,000 SA TOTONU PUSA NA GAOI

Na toe maua e le pulega a le kamupani o le FJ & P Kruse tupe  uma sa i totonu o le pusa tupe u’amea lea na gaoia e ni tagata mai totonu o le latou faleoloa i Leone, ina ua le mafai e le au ula ia na gaoia le pusa ona o latou tatalaina le pusa u’amea.

Fai mai faamaumauga a le faamasinoga, ina ua toe maua mai e leoleo le pusa tupe u’amea na gaoia atu i le faleoloa, o loo i ai pea lava i totonu le tinoitupe e $24,129.95; $1,828 o tupe siaki, ma le $5,492 o food stamp e lei mafai ona gaoia, sei vagana ai luma o le pusa tupe ua faaleagaina, ma e masalomia na taumafai le au gaoi e talepe peitai e le’i mafai.

O se tasi o alii o loo aafia ai i lenei mataupu na taofia faapagota e leoleo i le vaiaso nei, ma tulai ai luma o le faamasinoga faaitumalo, ona o le tuuaiga o lona taliaina lea o ni mea sa ave faagaoi e nisi tagata ma tuu atu ia te ia.

E tasi le moliaga mamafa ua tuuaia ai e le malo le alii o Lokeni Nuusolia, o le moliaga lea o lona taliaina o oloa sa ave faagaoi. O lea moliaga e mafai ona faasala ai se tasi i le toese mo le umi e le sili atu i le 7 tausaga, poo le faasala foi i le salatupe e le sili atu i le $5,000, poo le faasala foi i faasalaga uma ia e lua.

I faamaumauga a le faamasinoga o loo taua ai e faapea, e toalua alii na o la talepe ma osofaia le faleoloa o Kruse i le po o le aso 13 Setema 2009 i Leone, ma o i laua ia ua maea ona ta’usala e le faamasinoga i lenei mataupu.

Fai mai le malo, ina ua maea ona talepe e le au ula ia e toalua le faleoloa, sa alu atu loa Nuuulia ua piki mai i laua faatasi ai ma le pusa tupe u’amea o loo i ai totonu se tupe tele, ma tuu i se fale tuufua o loo i luga o le fanua o le ua molia i Faleniu.

I le taimi atoa ao i ai le pusa tupe i lalo o le vaavaaiga a le ua molia, sa pisi ai leoleo e fesiligia molimau ona o le tau sailiina lea o ni faamatalaga e uiga i lenei mataupu, peitai mulimuli ane ina ua manino le mata o le vai, na aga’i sa’o atu loa leoleo ma toe piki mai le pusa tupe i le fale tuufua i le fanua a le ua molia i Faleniu.

Na taua e le malo le faaleagaina o luma o le pusa tupe, foliga mai sa taumafai se isi e talepe peitai e le’i mafai.

Ina ua agai atu sui oi le kamupani a Kruse i le ofisa o leoleo, sa latou faamaonia ai o le pusa tupe o loo i ai, o le latou pusa tupe lea na gaoia ese mai i le latou faleoloa.

O alii e toalua na amataina le osofaiga sa galulue muamua i le kamupani a Kruse, peitai na faate’a ona o nisi o mafuaaga e le’i faailoaina e le malo.

E $10,000 le tupe lea ua faatulaga e le faamasinoga e totogi ona faatoa mafai lea ona tatala Nuusolia i tua, e faatali ai taualumaga o lana faamasinoga lea ua amata i luma o le faamasinoga faaitumalo i le taimi nei.