A’o sauni le afioga i le matua ia Togiola Tulafono e tuus le tofi Kovana o le atunuu i le aso a taeao, sa ia toe faasoa mai i le vaiaso na te’a nei ni isi o taimi faigata faapea ai ma taimi fiafia, a’o avea ai o ia ma taitai o le atunuu mo le tele o tausaga.

Ina ua fesiligia o ia i luga o lana polokalama i le faaiuga o le vaiaso na te’a nei, na saunoa ai Togiola e faapea, “o le taimi sa pito sili ona ou faanoanoa ma maligi ai o’u loimata, o le taimi na ou vaai atu ai ia Kovana Tauese ua maliu ae le’i mae’a taimi o lana nofoaiga lona lua.”

O le tofa Tauese Pita Sunia na avea ma kovana sili o Amerika Samoa i le 1996 ma le 2000, ae na tuumalo i le aso 26 o Mati 2003 i le 61 tausaga o lona soifua.

Na taua e Togiola e faapea, o le la mafutaga ma Tauese, o se mafutaga sa sili ona vavalalata, e le gata o ia o lana paga sa sili ona faalagolago i ai, ae o ia foi o se taitai e sili ona finau ma loto alofa i lona atunuu.

Ae afai na te manatuaina se taimi sa pito sili ona ia fiafia ma ata ai, o le taimi lea na tutuina ai le sulu e amata aloaia ai Taaloga a le Pasefika i Amerika Samoa (Pacific Mini Games), ina ua mafai ona taunuu le faamoemoe sa galulue faatasi uma ai le atunuu.

Na toe manatua e le alii kovana taimi faigata i le tau sailiga o ni tupe e faamaea ai galuega mo le tali o au taaalo mai atumotu eseese o le Pasefika, ma ia valaauina ai le atunuu atoa, o pisinisi atoa ai ma i latou e fia ofo fua atu o latou tupe, meatotino ma taimi e fesoasoani ai i le malo, ina ia tulai atu e faaali lo latou lotonuu.

“Sa le’i faigofie le tau faaumaina o le galuega, ae ina ua ma vaaia ma Mary le taimi na tutu ai le sulu o le a amata taaloga o le Mini Games, sa le mafai ona taofi le maligi o o’u loimata ma ou faapea ane, ana leai tagata uma o le atunuu faapea ai ma pisinisi na tutu faatasi e le taunuu lenei faamoeome,” o le saunoaga lea a le alii kovana.

O se tasi o taimi fiafia na toe manatua e le alii kovana, o le taimi na faauuina ai i laua ma le afioga a Ipulasi e fai ma kovana ma lutena kovana o le atunuu i le 2004.

Sa ia toe manatua le taimi na oso faasausau mai ai i fafo ma le taavale, ma lona tino ua iila atoa i le faguu, o lana tama’i tootoo i lona lima atoa ai ma le siapo o lo o fusi i lona sulugatiti, a’o ia vaavaai atu i le anoanoa’i o le atunuu o lo o latou molimauina lea sauniga taua.

I le toe manatua ai e Togiola o le taimi o le faauuina o ia e fai ma kovana, sa ia taua ai e faapea, o lana ata a’o savali atu i luga o le malae, ua lava lea e ta’u atu ai i tagata uma sa lagolago le la taumafaiga ma Ipulasi faapea ai ma le atunuu atoa, ua la mafaia ma ua taunuu manuia le faamoemoe.

Ina ua fesiligia Togiola i sana fautuaga mo le nofoaiga fou o le a tulai mai, sa ia tali ai e faapea, “Mika 6:8.”

O le tusi o Mika i le Feagaiga Tuai o lo o tusia ai upu nei, “Sole, ua faaali atu e ia ia te oe le mea lelei, se a foi se mea e finagalo i ai Ieova ia te oe, pe a le o ia mea, ia fai le amiotonu, ia naunau i le alofa, ma ia feoai ma lou Atua ma le loto faamaulalo.”

I le sauni ai o Togiola e tuua le nofoa ae toe fo’i atu i lona aiga, sa ia faataoto ai ni isi o fautuaga ma ta’iala e ao i le faigamalo o lo o mulimuli mai ona tausisi i ai.

O se tasi o ia ta’iala o le tatau lea i le nofoaiga o lo o mulimuli ona galulue malosi i le unaia lea o le poto faaonaponei (technology) ma ia galulue faatasi taitai, le malo ma le atunuu atoa.

Fai mai Togiola, o se tasi o ona faanoanoaga tele sa ia te ia, o le taimi na tipi motu ai e le Fono Faitulafono le Paketi a le Ofisa o Faamatalaga mo Tekonolosi (Information Technology - IT), ae o se tasi lenei o Ofisa pito sili ona taua i le malo.

O lana fautuaga, e tatau ona faaauau le aoaoina o auala e faaleleia ai fesootaiga faaonaponei i ofis eseese o le malo, ina ia faafaigofie ai ona faia fesootaiga i soo se manaoga e tulai mai.

Ae ina ua fesiligia Togiola i sona finagalo i se vaega sa pito sili ona faamanuiaina ai o ia ao tulai mai i le tofi, sa ia taua ai le faamanuiaina o i laua ma Mary i le tele o taimi sa laua galulue faatasi ai i le unaia o polokalame mo tupulaga talavou.

Fai mai Togiola, afai e lelei le aoaoina o le mafaufau o tupulaga ma lelei le puipuiina o latou mafaufau ma lagona, o le a avea i latou na ma faamoemoega sili o le atunuu i le lumanai.

Sa ia taua e faapea, o le atinaeina o tupulaga ma fanau talavou i totonu o aiga ma le atunuu, o le teugatupe pito sili lea ona lelei mo aiga ma le atunuu atoa.