Ads by Google Ads by Google

TOE LOKA FBI AMITUANAU’I MIKA KELEMETE I HONOLULU

Ua toe taofia nei i le falepuipui a le Feterale i Honlulu le afioga ia Amituana’i Mika Kelemete i le taeao ananafi, ona o tuuaiga i lona le usitaia lea o tuutuuga o lana nofovaavaaia.

O ni isi o ia tuuaiga e aofia ai lona tuua lea o le teritori o Amerika Samoa ae malaga atu i Samoa e aunoa ma le logoina o lana Ofisa Faanofovaavaaia e pei ona poloaina ai o ia e le Faamasinoga Feterale.

I lana iloiloga sa faia i luma o le alii faamasino o le Faamasinoga Feterale i Honolulu, susuga David Alan Ezra, na ioeina ai e Amituana’i lona le usitaia o tuutuuga o lana nofovaavaaia.

Na faamaonia mai e le Pulesili o le Ofisa Faanofovaavaaia a Amerika Samoa, le afioga Tauiliili Silivelio Iosefo, le toe taofia faapagota o Amituana’i e U.S Marshall ina ua taunuu i Honolulu le malaga a le Hawaiian Air lea na malaga atu ai i Amerika Samoa nei i le po o le aso Tofi, ma auina sa’o atu loa i le falepuipui e faatali ai le taimi o lana iloiloga i le itula e 11:00 i le taeao ananafi.

E le’i toe maua mai se isi ripoti i le tulaga na oo i ai le iloiloga a Amituana’i lea faia i le aso ananafi.

E 24 masina na faafalepuipiu ai Amituana’i i le falepuipui a le Feterale i Hawaii, ona o le faalavelave lea na tuuaia ai o ia i lona faaoolima lea i se alii pagota i le nofoaga o le falepuipui i Tafuna, a’o avea ai o ia ma Pulesili o le Falepuipui.

E ese mai i lana faasalaga faafalepuipui sa tuliina, e 3 tausaga sa nofovaavaaia ai o ia i lalo o tuutuuga a le faamasinoga feterale e ao ona usitai i ai, e pei o le faafesootai lea o lana Ofisa Faanofovaavaaia i soo se taimi na te tuua ai le teritori ae malaga atu i ni isi atunuu.

O le iloiloga a Amituana’i sa faatulaga mo le aso 30 o Novema na te’a nei, o le mafuaaga foi lena na malaga ai Amituana’i i Honolulu, i lona taunuu ai i le malae vaalele i Honolulu, sa faamaonia mai ai e le susuga Iosefo le i ai o sui o le Feterale o lo o faatali mai ai mo le lokaina lea o Amituana’i, ma auina sa’o atu loa i le falepuipui e faatali ai le taimi o lana iloiloga i le aso ananafi.

Ina ua fesiligia e le Samoa News le loia fautua a Amituana’i o Alexander Silvert sa ia taua ai e faapea, o tuuaiga i le le usitaia e le ua molia o poloaiga a le faamasinoga, e mafua mai i le faatele lea ona ia tuua o le teritori o Amerika Samoa ma faimalaga atu i Samoa, e aunoa ma le logoina o le Ofisa Faanofovaavaaia i le teritori nei.

Na taua e Silvert i se faatalatalanoaga i luga o le telefoni ananafi, na ioeina e Amituana’i lona tuua o le teritori ae malaga atu i Samoa mo mataupu tau i matai a lona aiga, lea foi e suafa matai mai ai.

Fai mai Silvert, e mafai lava ona malaga Amituana’i i Samoa, peitai o le mea ua tula’i mai, na te lei logoina le Ofisa Faanofovaavaaia e uiga i ana malaga, o le mafuaaga lena ua ia le usitaia ai tuutuuga o le tatala ai o ia i tua i lalo o le vaavaaiga a le Ofisa Faanofovaavaaia.

Na taua e Silvert i le Samoa News e faapea, e malamalama faamasino a le feterale i tulaga o matai i totonu o aiga Samoa atoa ai ma latou tiute tauave, peitai o le le usitaia o le poloaiga sa tuuina atu a le faamasinoga na te tausia, ua mafua ai ona poloaina Amituana’i ina ia taofia o ia i le falepuipui i Honolulu mo le 6 aso, lea ua faamoemoe e maea i le aso Lulu o le vaiaso fou.

I le otootoga o faamaumauga e uiga i lenei mataupu o lo o taua ai e faapea, o Amituana’i na lau faatasi a laua faasalaga ma le isi alii sa avea muamua ma leoleo o le falepuipui, o ia lea o Siaumau Mapu, i lo la aafia ai i le faalavelave lea na fasi faamoamoa ai se alii pagota sa taofia i le falepuipui i Tafuna i le 2003.

E 24 masina na faasala ai e le faamasinoga Amituana’i i le falepuipui ae 39 masina na faasala ai Mapu e pei ona taua i faamaumauga a le faamasinoga feterale.

O le aso 15 Aokuso 2007 na tali ioe ai Amituana’i i tuuaiga a le malo feterale i lalo o se maliliega sa ia sainia ma le malo feterale ma talia e le faamasinoga.

I lona tali ioe ai i lea mataupu, sa ia taua ai e faapea, i le masina o Aokuso 2003, sa ia faatonuina ai ni pagota se toalua ina ia aumai i fafo mai le sela o lo o loka ai le alii pagota na aafia, ma tuuina atu i le ogatotonu o le lotoa, lea na ia loka ai ona lima i handcuff agai i se pou, ae ona faaaoga le laupapa e sasa ai lona ulu ma lona papatua seia oo ina gau le laupapa.

Ae o Mapu sa ia tautino i le faamasinoga feterale e faapea, sa ia faaaoga lona malosi o se alii leoleo o le falepuipui e faaoolima ai i le alii pagota, e ala i lona sasaina o lona ulu ma iu ina manua tigaina ai lea alii pagota.

Sa ioe foi Mapu i lona pepeloina lea o alii FBI sa fesiligia o ia i le suesueina o se isi foi mataupu tau faaoolima.

saunia: Ausage Fausia