Ads by Google Ads by Google

Toe lalaga Auuso Fealofani Fagatogo measina a Samoa ua mou atu

O le toe lalagaina mai o measina a Samoa sa ola mai ai tuaa i aso ua mavae lea ua aga’i ina mou atu, o le autu lea o se galuega tele a tina o le Au Uso Fealofani a le Ekalesia Metotisi i Fagatogo, lea na faalauiloa i le taeao ananafi i le maota o le Ekalesia.

 

O le Tina o le Galuega ia Faapio Pasili Farani ma sui uma o le Auso Fealofani sa auai i lenei faamoemoe, lea fo’i na faatasi atu i ai ma le sui o le Ofisa a le American Samoa Humanities Council (ASHC), le faletua ia Tauaisafune Niualama Faifane, ona o le latou Ofisa lea sa faatupeina lenei faamoemoe.

 

Na taua e Faapio i le Samoa News e faapea, o le autu o le latou poloketi o le vaavaaia o ni auala e toe fafagu mai ai galuega taulima a Samoa ua tauau ina mou ese atu, e le gata fo’i i lea, ia mafai ona faaaoga a latou taleni ma meaalofa i le galueaina o soo se galuega taulima e maua ai tupe e fesoasoani ai i manaoga a le mafutaga.

 

“O ni isi o tina o le Auuso Fealofani ua malolo litaea mai galuega sa galulue ai, ma o le toatele foi ua nofo fale, o le aoga la lena o le faamoemoe lenei, ia faaaoga i ai o latou taimi avanoa ae galulue ai i galuega laiti nei ina ia maua ai tupe e fesoasoani ai i le aiga aemaise ai o manaoga a le Auso Fealofani,” o le saunoaga lea a Faapio.

 

O galuega e pei ona galulue i ai tina o le Auso Fealofani e aofia ai le toe lalagaina o le ietoga; o le Elei; o le su’iina o ie solovae; ma le aoaoina o le su’isu’i.

 

Na taua e le Matuau’u ia Faleatiu Time e faapea, e silia ma le tausaga na latou galulue ai mo le totoina o le laufala, ma ina ua matua le laufala, sa ta ta loa ma ave ua saka ae faalala, ma faaaoga ai loa i le lalagaina o le ietoga tele lea o lo o latou galulue ai nei.

 

O le ietoga e 27 aga le umi ae 15 aga le lautele, ua silia ma le lua vaiaso talu ona amata ma le faamoemoe e faamaeaina i le vaiaso fou.

 

“E te le tau alu i le faleoloa e aumai ai ni ie e su’i ai sau ie solovae, ae na o lou alu lava i fale su’isu’i ma aumai ai ni fasi ie ie ua le toe aoga, po o ni lavalava fo’i ua le toe aoga i totonu o lona aiga, ona tipi tipi lea (tulou) ae su’i ai lau ie solovae,” o le saunoaga lea a le faletua ia Pepe Faletoi.

 

O le tomai e pei ona maua e Pepe, sa ia aoaoina mai i se tina matua mai le afioaga o Leone i le tausaga na te’a nei, ma ua ia faasoaina atu i tina o le Auuso Fealofani i Fagatogo.

 

Na taua e Tauaisafune e faapea, e $5,000 le tupe na tuuina atu e le ASHC e faatupe ai lenei  poloketi ma e mafai ona talia e le ASHC talosaga a faalapotopotoga e le o galulue mo ni polofiti (non profit organisation) e tuuina atu, mo ni vaega tupe e amata ai ni galuega mo le lumana’i o faalapotopotoga po o ni mafutaga fou.

 

Pau le itu taua, ia ausia aiaiga uma e pei ona faatulaga mai e le ASHC, i auala e faatautaia ai le atina’e atoa ai ma le faaaogaina o le tupe.

 

Ua toatele faalapotopotoga ma mafutaga i totonu o le atunuu ua fesoasoani i ai le ASHC, ma ua vaaia foi tulaga manuia ia latou galuega sa faatupeina e lea vaega a le malo.