Ads by Google Ads by Google

Toe laga e Puleleiite mataupu i le tofiga o komiti a le Maota o Sui

E le gata na teena e le Fofoga Fetalai o le Maota o Sui i le taeao ananafi se saunoaga a le afioga i le alii faipule ia Puleleiite Li’amatua Tufele Jr., e faapea, o lo o i ai ni ‘Faipule Faatuiese’ i totonu o le maota, ae sa ia teena foi ni lagona o ni isi o faipule e faapea, o sailiga tofi a le maota o sui lea na faavae ai le filifiliga o komiti e pei ona faalauiloa i le vaiaso nei.

“E lei faavaea le tofiaina o komiti a le maota i ni sailiga tofi sa faia, e leai foi se manatu faapena o lo o i ai ni faipule faatuiese,” o le saunoaga lea a Savali Talavou Ale e tali fuaitau atu ai i se finagalo na faaalia e le alii faipule ia Puleleiite i le taeao ananafi.

O le Aso Lua na te’a nei na laga ai e le afioga i le alii faipule ia Taotasi Archie Soliai le mataupu e faatatau i komiti a le maota ua maea ona tofia, ina ua aumai lisi o komiti e le o i ai lona igoa ma faipule e to’aono na lagolagoina lona faamoemoe i le sailiga tofi a le maota o sui e sailia ai se fofoga fetalai.

O se tasi o faipule e le o i ai se komiti o aafia ai lona suafa na toe lagaina le mataupu lenei i le taeao ananafi, o Puleleiite.

Na taua e Puleleiite e faapea, na mafua ona le faia sona finagalo i le Aso Lua ina ua faatoa faalauiloa komiti a le maota, ona sa le’i maua sona finagalo i lea taimi, peitai e lagona le ootia o lona loto pe a vaavaai atu i le tulaga ua i ai tofiga o komiti a le maota o sui.

Saunoa Puleleiite, e tatau i le fofoga fetalai ona fai alofa i sui filifilia o Itumalo eseese o le atunuu, leaga e le’i te’i te’i maua lo latou avanoa e nofoia ai nofoa o le Fono Faitulafono, ae na mafua ona ua filifilia i latou e o latou Itumalo.

Sa ia taua foi lona faanoanoa tele ona o ni isi o tusitusiga ma faaupuga e faapea, o i latou ua leai ni komiti o galulue ai, o latou ia o faipule faatuiese.

“E le o matou o ni faipule faatuiese,” o le saunoaga lea a Puleleiite, “O matou o sui filifilia mai o matou Itumalo, o le finagalo foi o matou Itumalo lea ua mafua ai ona matou seei i nofoa o le Fono, tatou te tumua’i tutusa foi i tulaga o upufai o malo,” o le saunoaga lea a Puleleiite.

E le gata na faafetai le afioga a Puleleiite i le Fofoga Fetalai e tusa ai o tofiga a le maota, ae sa ia faaoloolo maau foi mo se avanoa e maua ai ni komiti latou te galulue ai mo lenei nofoaiga.

Na taua e Puleleiite e faapea, e ui e tumuai tutusa faipule i upufai o malo, peitai a tuutuu i le loloto, o le tofa a Savali, e le gata o ia o le Fetu Pupula, ae o ia foi o le tau tootoo e tua i ai le Itumalo i taimi e sousou ai le vasa.

Na faaiu le saunoaga a Puleleiite i lona faapea atu i le Fofoga Fetalai, “E ui o lea ua taoto lou finagalo, ae ou te toe faaoloolomaau atu i lau afioga, e fia tautua foi lenei auauna, o tulaga foi i sailiga tofi sa alo atu i ai le maota, taoto ia na fatia ua sola aua o lea ua tasi le filiga e pei ona toe filifilia ai lau tofa i le tau tootoo.”

I le tali fuaitau a le fofoga fetalai na ia taua ai e faapea, “o ia e musu e tautala soo i le mataupu lenei,” ae talu ai o le aafia soo i saunoaga a ni isi o sui mamalu, o le mafuaaga foi lea o lona talanoa so’o i ai.

Na faamanino e Savali i faipule e toa 7 e le o i ai ni komiti o aofia ai e faapea, e le avea le leai o ni komiti e galulue ai ma itu e taofia ai lo latou auai i iloiloga ma galuega faatino a le maota, ina ne’i le tusa ai ma ala o le tulafono.

I lona talitonuga, e aia tutusa faipule uma i le faatinoina o galuega, ae o komiti ua maea ona filifilia, ua faatulaga mo le faatinoina o galuega a le maota.

Na faaiu le saunoaga a Savali i lona faapea atu ia Puleleiite, “Ae o lau talosaga ua tuuina mai, taoto maia se’i o’u manatunatu atili i ai.”