Ads by Google Ads by Google

Toe filifilia Savali e avea ma Fofoga Fetalai o le Maota Sui

Ua toe filifilia nei le afioga i le alii Faipule mai le Itumalo o Alataua, le tofa Savali Talavou Ale e fai ma Fofoga Fetalai o le Maota o Sui mo le Nofoaiga lona 33 a le Fono Faitulafono.

Ina ua sailia se Fofoga Fetalai o le maota i le maea ai o le faatautoina o Faipule e toa 21 i le aoauli ananafi, na manumalo ai Savali ina ua ia maua palota e 13 i le 7 a le afioga i le alii faipule mai le Itumalo o Ituau, le tofa Taotasi Archie Soliai, o i laua ia na tuuina atu o la suafa e saili mai ai se Fofoga Fetalai o le maota.

O le afioga i le alii faipule ia Atualevao Gafatasi Afalava na tulai e faatu le suafa o Savali e fai ma Fofoga Fetalai, ae o le afioga i le alii faipule ia Puleleiite Tufele Li’amatua na tulai e faatu le suafa o le tofa Taotasi e fai ma Fofoga Fetalai.

Ua silia ma le 30 tausaga talu ona avea Savali ma faipule o lona itumalo, talu mai le tausaga e 1981.

O le itula e 12:00 i le aoauli ananafi na faataunuuina ai le sauniga mo le faatautoga o Faipule o le maota o sui mo le nofoaiga lona 33 a le Fono Faitulafono.  O le afioga i le Faamasino Sili ia Lealaialoa Michael Kruse na gafa ma le faatautoina o alii faipule.

Na matua faatumulia luga o le potu fono o le maota o sui i uo ma aiga o faipule ua filifilia.

Ina ua maea le faatautoina o afioga i alii faipule, na sosoo ai ma le sailia o tofi a le maota o sui, e ala i le Failautusi ma le Satini.

Na fulisia faipule e toe filifilia le faletua ia Fialupe Lutu e avea ma Failautusi, a’o le susuga Vavao Sualoa e avea ma Satini o le maota.

O le Aso Gafua o le vaiaso fou lea ua faamoemoe e amata aloaia  galuega faamasani mo faipule fou, a’o lumana’i ai le tatala aloaia o le Ulua’i Tauaofiaga o le Nofoaiga lona 33 a le Fono Faitulafono, i le Aso Gafua, Ianuari 14, 2013.