Ads by Google Ads by Google

Toe filifilia Gaoteote avea ma Senatoa

Ua tasi nei le filiga i le paia o le Itumalo atoa o Vaifanua, o le a toe faaauau e le afioga i le Tamaitai o le Ao ia Gaoteote Palaie Tofau, o ia foi lea o lo o avea ma Perestene o le Senate i le Fono Faitulafono i le taimi nei, le tofi Senatoa o le Itumalo mo le isi 4 tausaga o lo o lumana’i nei.

O se faaiuga e le’i faigofie ona autasi i ai le itumalo atoa i le fonotaga lea na usuia i le malae i Laloulu i le Aso To’ona’i na te’a nei, ina ua naunau atu fo’i ni isi o Faasuaga o le Itumalo i le fia tautua lea mo le itumalo e ala i le tofi, e pei ona faamaonia mai e le afioga i le Anava o taua ia Te’o J. Fuavai i se faatalatalanoaga ma le Samoa News i le Aso To’ona’i na te’a nei.

“O lea ua tasi le finagalo o le itumalo o le Vaifanua, o le a toe faaauau e le afioga ia Gaoteote le tofi o le itumalo mo le isi 4 tausaga,” o le saunoaga lea a le afioga Te’o.

Saunoa Te’o, sa finau malosi le afioaga o Alao e tuu atu le tofi latou te tauaveina, peitai ina ua maea ona fefaaalia’i finagalo o tamalii o le itumalo, na tasi ai loa i le toe filifilia o Gaoteote e fai ma Senatoa.

“E tele ni isi o mafuaaga na silasila i ai le itumalo ao lei faia lana faaiuga, e le gata o le afioga ia Gaoteote o lo o seei i le nofoa o le Peresetene mo le Maota Maualuga i le Fono Faitulafono, ae manatu foi le itumalo ina ia faatumauina pea lea faaeaea mo le itumalo atoa, aua o le Fono Faitulafono, o le isi lea vaega maoti o le tafatolu o le faigamalo a Tutuila ma Manu’a,” o le saunoaga lea a Te’o.

E silia laititi lava ma le lua itula le umi o le fono a le itumalo sa faia, e talanoaina ai le tofi o le itumalo, e pei ona taua e se molimau i le Samoa News.

Na tatala lava le fonotaga i le lauina lea o se tusi mai le afioga Salanoa Aumoeualogo, e faailoa atu ai lona lagolagoina o le afioga ia Gaoteote e toe faaauauina le tofi o le itumalo, ina ua maea ona tolaulauina le tusi, sa tatala ai loa le avanoa mo le faaalia o finagalo o taitai o le itumalo.

Fai mai le molimau, o le afioga ia Iuli mai le afioaga o Tula na finau e fia alu i le tofi, peitai sa finau mai foi le afioga ia Tavai mai Alao o ia foi e fia alu i le tofi. O le itumalo o Vaifanua e aofia ai le afioga o Vatia, Aoa, Tula, Alao ma Onenoa.

E le’i umi ona faagasolo le fono ae tasi loa le finagalo o Tula, Aoa ma Vatia e lagolago le toe filifilia o Gaoteote i le tofi Senatoa, ma sa taoto atu ai loa i se faaiuga a le afioga a Satele Lili’o ma le afioga a Toomalatai i so laua finagalo e tusa ai o le faaiuga ua tasi i ai isi afioaga o le itumalo.

“Ina ua le maua se tasi, sa saunoa ai loa Satele e sili pe a moe le toa, ae toe taoto atu le mataupu i le faletolu sei toe iloilo ma soalaupule, ae na faateia Satele ina ua saunoa Toomalatai, ua ia lagolagoina le toe filifilia o Gaoteote, ma tulai mai ai loa le lagolagoina e nuu e 4 o le faaiuga sei vagana ai Alao o lo o faatuiese pea,” o le faamatalaga lea a le molimau.

“E faalua ona faaoloolomaau Gaoteote ia Satele i sona finagalo e faatatau i le faaiuga ua tasi i ai isi nuu o le itumalo, ma e ui i se finagalo faatuatuai o le afioga a Satele, ae na toe liua lona finagalo ma ia lagolagoina ai loa le faaiuga ua autasi i ai le itumalo, fai mai Satele, o lona alofa i le itumalo atoa ai ma le tofi ua mafua ai lana faaiuga,” o le faamatalaga lea a le molimau.

O le isi laasaga lea o le a laa atu i ai le tofi o le Itumalo, e tatau ona saini uma faauluuluga o le itumalo i le latou faaiuga ua faia ona faamaonia lea e le Faalupega, ma tuu atu ai loa lea faaiuga i le Ofisa o Mataupu Tau Samoa ma le Senate.

O le faamaoniaina o tofi mo Senatoa faatoa faia i le aso 3 Ianuari 2013 i le itula e 12:00, i le taimi e faatautoina ai i latou mo le isi nofoaiga fou.

O le Aso Lulu o le vaiaso nei, le aso 5 Tesema ua faamoemoe e fono ai le afioaga o Pago Pago, mo le sailia o se tasi e fai ma sui o le afioaga i le maota maualuga a le Senate.

O le afioga i le Alii o Aiga ia Asuega Faamamata Lauvai o lo o nofoia le nofoa o le itumalo i le taimi nei.

A maea le fonotaga a Pago Pago i le vaiaso nei, ona faamoemoe ai loa lea o le Aso Gafua, 17 o Tesema o le a fono ai loa le itumalo atoa, mo le faalauiloaina o tofi a le itumalo mo le isi nofoaiga a le Senate.

E tolu nofoa o le itumalo o le Maoputasi i totonu o le Senate, ma o ia nofoa e tolu o lo o nofoia e le afioga i le Maoputasi ia Mauga Tasi Asuega, afioga ia Asuega atoa ai ma le afioga i le tamaitai Senatoa ia Tiumalu Telesia Scanlan.