Ads by Google Ads by Google

Toe filifilia Faleomavaega, Teena suiga Fa’avae

I le faaiuga e le aloaia ua tuuina mai e le Ofisa o Palotaga a le atunuu mo le nofoa i le laumua i Uosigitone, atoa ai ma le mataupu e uiga i le suiga o le Faavae, ua manino mai ai le toe filifilia e le atunuu o le tofa ia Faleomavaega Eni Hunkin e fai ma o tatou sui i le Konekeresi a le malo tele, ae teena suiga sa taumafai i ai mo le Fa’avae.

O le toe manumalo ai o le tofa ia Faleomavaega i le nofoa a le atunuu i le laumua i Uosigitone, ua atagia mai ai lona umia o lenei nofoa mo le lona 13 lenei o nofoaiga soso’o.

O sui e to’a 5 na tausinio mo le nofoa i Uosigitone e aofia ai Aumua Amata; Faleomavaega Eni Hunkin; Fatumalala Leulua’iali’i A. Al-Shehri; Kereti Mata’utia Jr ma Rosie F. Tago Lancaster.

Mai le to’a 10,000 o palota sa faamauina na palota mo se sui i le laumua i Uosigitone, o le to’a 7,221 na palota mo Faleomavaega, tusa lea o le 56.0% o le au palota; o le to’a 4,420 na paota mo Amata, tusa lea o le 34.3% o le au palota; o le to’a 300 na palota mo Fatumalala, tusa lea o le 2.3% o le au palota; e to’a 411 na palota mo Kereti, tusa lea o le 3.2 % o le au palota, ma le to’a 543 na palota mo Rosie, tusa lea o le 4.2% o le au palota.

Mai itumalo faa palota e 17 i totonu o le atunuu, e 6 itumalo faapalota na manumalo mai ai palota a Amata ia Faleomavaega, ae o le 11 o itumalo faapalota na manumalo ai Faleomavaega, e aofia ai ma itumalo e 4 na sili mamao ai ana palota ia Amata i le lata i le ta’i 300 ma ona tupu palota.

Na manumalo foi Faleomavaega i palota mai fafo i le aofa’i o palota e 619 na ia maua, ae 458 mo Amata.

I le afioaga a le tofa Faleomavaega i Leone, e 500 palota na eseese ai a la palota ma Amata na maua, o Tualauta e 975 palota na eseese ai, o Tualatai e 329, ma Ituaumalosi e 308.

I le palota o le 2010, e toatolu sui sa tauva ai mo le nofoa i lea tausaga, peitai i le faaiuga o le palota, na toe manumalo mai ai Faleomavaega i le latou taufetuliga sa faia ma Aumua Amata faapea ai Tuika Tuika.

Mai le to’a 10,971 o tagata palota mo le sui i le konekeresi, o le to’a 6,895 poo le 56.3% na palota mo Faleomavaega, o le to’a 4,438 poo le 40.5% na palota mo Amata, a’o le to’a 357 poo le 3.3% na palota mo Tuika.

Ae o le palota i le 2008 e pei ona taua i faamaumauga, na manumalo mai ai fo’i Faleomavaega mai sui e to’atolu sa tausinio mo le nofoa i lea tausaga.

Mai le aofaiga e 11,342 o palota sa faamauina i le 2008, o le toa 6,895 sa palota mo Faleomavaega, soso’o ai Aumua Amata i le aofai o palota e 4,004, ma Fualaau Rosie Tago Lancaster e 443 ana palota na maua.

Ae o le palota i le tausaga e 2006 e pei ona taua i faamaumauga, na manumalo ai Faleomavaega mai sui e toatolu sa latou tausinio.

Mai le aofaiga e 11,033 o palota sa faamauina, e 5,195 na maua e Faleomavaega, sosoo ai Aumua Amata e 4,493, ma Muavaefa’atasi Ae Ae Jr i le aofa’i o palota na ia maua e 1,345.

SUIGA O LE FA’AVAE

I le mataupu i le suiga o le Faavae e pei ona i ai le fesili sa tuuina atu i le au palota, pe manana’o e tuu atu le malosi i le Fono Faitulafono, latou te suia ai le faaiuga a le kovana sili e teena ai se tulafono taufaaofi na pasia e le Fono Faitulafono, ua manumalo ai le palota ‘leai’ i le palota ‘ioe’, ma ua tumau pea tulaga o lo o i ai le Faavae e le o suia.

Mai le aofai o tagata palota sa faamauina e 10,000 na palota, o le toa 7,177 na palota ‘leai’, a’o le toa 5,854 na palota ‘ioe’

O le palota i le 2008 na mua’i tuuina atu ai le fesili lenei i le au palota, pe manana’o e fai se suiga i le Faavae, ae tuu atu le malosi i le Fono Faitulafono latou te suia ai le faaiuga a le kovana na te teena ai pili poo tulafono taufaaofi e pasia atu e le Fono Faitulafono.

Mai le to’a 12,296 o tagata palota sa faamauina a latou palota i lenei mataupu i le 2008, o le 50.1% o i latou palota, tusa lea o le to’a 6,159 na palota ‘leai’, ae o le 49.9% tusa lea o le to’a 6,137 na palota ‘ioe’, ma toe faatumauina ai loa le Faavae i le tulaga e pei ona amata mai ai