Ua toe filifilia nei le Senatoa mai le Itumalo o Vaifanua, le afioga i le Tamaitai o le Ao ia Gaoteote Palaie Tofau e avea ma Peresetene o le Maota Maualuga mo le isi fa tausaga, ina ua lafo i ai e le Senatoa mai le Itumalo o le Maoputasi, le afioga i le Maoputasi ia Mauga Tasi Asuega le tofi na te toe faaauauina.

Sa faapea foi ona faamuta ai ma finauga na tulai mai i tofi o Itumalo o Alataua ma Manu’a #2, ina ua filifilia le afioga ia Faletagoa’i Iati Tuiolemotu e avea ma Senatoa o Alataua, ae o le afioga i le Faatui ia Laolagi Fonoti Savali Vaeao e fai ma Senatoa o Manu’ua #2.

O le afioga i le Faamasino Sili ia Lealaialoa Michael Kruse na faatautoina Senatoa e toa 18 i le taeao ananafi, ao molimauina e le toatele o uo ma aiga na faatumulia ai luga o le maota fono a le Senate, faapea ai ma sui o le au faasalalau.

O le Failautusi o le Senate ia Leo’o Va’a Ma’o, lea foi ua toe tula'i mai mo leisi fa tausaga, sa ia tolaulauina suafa o Senatoa ua filifilia, ae sa ia saunoa e faapea i le Senatoa o le Manu'a #2, e le o manino po o ai tonu le Senatoa o le itumalo lea.

Ina ia tusa ai ma tulafono a le Senate, e tatau ona filifilia se taitai le tumau na te faatautaia taualumaga a le maota, ma faatu ai e le afioga a Nua Saoluaga T. Nua le suafa o Gaoteote, lea foi na faalua e le afioga a Letuligasenoa Soli, peitai, na saunoa le afioga Soliai Tuipine Fuimaono ina ia taoto atu lea tulaga i afioga i Faasuaga e toalua o lo o i totonu o le maota, ia Mauga Tasi Asuega ma Galea’i Tuufuli la te faia se faaiuga.

I le saunoaga a le Maoputasi ia Mauga, sa ia taua ai e faapea, e le tatau ona faia se palota i lenei mataupu, ae tatau ona faia i le ava ma le faaaloalo ona ua aafia le aganuu i faiga faapolokiki, ma ia tuuina atu ai loa le tofi ia Gaoteote.

Na saunoa Mauga e faatatau ia Gaoteote, o lona taimi lenei e taitai ai le maota. Sa ia tofia foi Soliai e fai ma sui peresetene o le maota maualuga, sa fesiligia ai e Mauga ia Galeai ina ia lagolago i lana faaiuga.

I le saunoaga a Galeai e lagolagoina ai le finagalo o Mauga, ina ia faavae tofiga a le maota maualuga i tu ma aga faaleaganuu e manuia ai, aemaise ai foi, e le tatau ona toe palotaina le tofi peresetene o le Senate, ae tatau ona filifili i auala faaleaganuu, ma o le faaiuga ua faia i le nofoaiga lenei, e tatau ona faamau i tala faamaumau o le Fono Faitulafono.

Ina ua tulai Gaoteote e fai ma peresetene o le Senate, sa ia tofia ai se komiti latou te iloiloina le mataupu a Manu’a #2, ma o le komiti sa taitaifono ai Nua, o Tuiasina Siolosega ma Alo Faauuga.

Na fa'aalia e Nua, o le filifiliga o Malemo sa faia e le itumalo o Olosega/Sili ae faamaonia e le Faalupega o le itumalo, ae o le tofiga o Laolagi, sa sainia e sui o Ofu ma Sili ae faamaonia e le Ofisa o Mataupu Tau Samoa.  I le faaiuga o le iloiloga a le komiti, sa taualoa ai loa le avea o Laolagi e fai ma Senatoa o Manu’a #2.

Ae i le saunoaga a Soliai, sa ia fautuaina ai le tatau ona toe foi o le tofi o Manu’a #2 e toe filifili mai e le itumalo, ona o le fono mulimuli a le itumalo sa faia i Tutuila nei, ma o se tulaga e le talafeagai. O lea finagalo a Soliai na lagolagoina lea e Mauga.

Na saunoa Gaoteote e faapea, e le o se taimi muamua lea ua tulai mai ai le faafitauli lenei i le tofi a Manu’a #2, ae o le faaiuga e tatau ona faia e le Senate, aua o lea ua aofia uma i ai taitai o Itumalo.

I le maea ai o le saunoaga a Gaoteote, sa tuuina atu ai loa i le palota lenei mataupu, ma fulisia ai loa le toa 12 e lagolagoina le faaiuga a Nua ma lana komiti.

Ua toe filifilia foi le afioga ia Amituana’i Vini Atofau e fai ma Satini a le maota.

faaliliu Ausage Fausia