Ads by Google Ads by Google

Toe filifilia afioga Avegalio e avea ma Senatoa Itumalo Fofo

Ua maea nei ona taoto le faaiuga a le afioaga o Leone i le latou fonotaga sa faia i le faaiuga o le vaiaso na te’a nei, e toe filifilia ai le afioga i le alii Senatoa ia Avegalio Aigamaua na te toe faaauauina le tofi o le Itumalo mo le isi fa tausaga o lo o lumana’i.

O le fonotaga na usuia i le maota o Fai’ivae i Pouono, mo le sailia o ni isi e tauaveina tofi o le Itumalo e pei o le tofi Leoleo o le Nuu, Pulenuu, Faalupega ma le Senatoa.

“O se fonotaga toafilemu ma faigofie sa alo atu i ai le matou nuu, ina ua latou talia la’u talosaga sa tuu atu i ai, ina ia toe tuu mai le tofu ou te toe tauaveina,” o le saunoaga lea a le afioga ia Avegalio i se faatalatalanoaga ma le Samoa News i luga o le telefoni i le aoauli ananafi.

Saunoa Avegalio e faapea, o le tofi Senatoa o lo o ia tauaveina i le taimi nei, o le tofi lea o le afioga ia Tuitele T. Tuitele ua tuumalo, lea na ia faaauau mai i le tausaga e 2009, peitai o le fonotaga a le Itumalo i le faaiuga o le vaiaso na te’a nei, sa ia talosagaina ai le tatau lea ona i ai sana ia lava nofoaiga i le tofi Senatoa.

“O la’u talosaga tuu sa’o lea na avatu i le matou nuu o Leone, e tatau ona i ai sa’u lava nofoaiga aua o lea sa ou faaauauina mai le nofoaiga a le afioga ia Tuitele, ma o la’u talosaga na talisapaia e lo’u nuu,” o le saunoaga lea a Avegalio.

Na taua e le alii Senatoa le faagaeetia o lona loto ina ua toe tafa le finagalo o lona afioaga, o ia o le a toe filifilia mo le nofoa o le itumalo.

O lana tatalo, talosia le alofa o le Alii ina ia maua ai pea le ola ma le malosi, e faaauau ai lana auaunaga mo le atunuu ma le malo.

I isi tofi na sailia, ua tofia ai le susuga ia Pio Sooto e avea ma Leoleo o le Nuu; o le susuga ia Alii Alofa ma Senio Alaiasa ua filifilia e fai ma Pulenuu: a’o Salave’a Pale lea ua toe  tofia i le tofiga o le Faalupega.

O le isi laasaga lea o le a sosoo nei o le faamaonia lea e le Faalupega o le Itumalo o se pepa o le a faailoa atu ai sainigalima a taitai o le Itumalo e lagolagoina ai la latou faaiuga, ona tuuina atu loa lea o lea faaiuga i le Ofisa o Mataupu Tau Samoa,  ma se kopi i le peresetene o le Senate a le maota maualuga.

O le afioga ia Avegalio o lo o avea o ia ma taitaifono o le Komiti o Mataupu Tau Samoa, sui taitaifono i le Komiti o le Falema’i ma le Soifua Maloloina, atoa ai ma komiti o le Paketi, Faletelefoni ma le Litaea o lo o avea ai o ia ma totino i ia komiti.