O le taeao ananafi na toe tulai ai i luma o le Faamasinoga Faaitumalo le afioga i le Kovana o le Falelima i Sisifo ia Satele Galu Satele, mo le tuuina atu o sana tali e tusa ai o moliaga e afua mai i se faalavelave na tulai mai i le tausaga na tea nei, lea ua toe faila e le malo.

O le loia a le afioga Satele na faaleoina le tali tetee a le ua molia i luma o le faamasinoga faaitumalo, lea foi e lei tetee i ai le loia a le malo. O le moliaga fou ua tuuaia ai nei e le malo Satele e aofia ai le faaleaga meatotino i le tulaga lua, lea e mafai ona faasala ai se tasi i le toese mo le umi e le silia ma le tasi le tausaga, pe faasala foi i le salatupe e le silia ma le tasi le tausaga i le toese.

Ina ua teena e Satele le moliaga a le malo faasaga ia te ia, ua faatulaga ai loa lana uluai iloiloga e faia lea i le aso 23 Mati i le itula e 8:30 i le taeao. O le alii loia ia Tala Uiagalelei o loo tulai mo Satele, ae o Camille Phillippe o loo tulai mo le itu a le malo.

O le mataupu o loo tuuaia ai Satele na afua mai i se faalavelave na tulai mai i totonu lava o le afioaga o Vailoa i le tausaga na tea nei, lea o loo tuuaia ai e le o loo tagi le faatonu e le ua molia o ni matai se toalua ina ia faaleaga le tuugamau a lona tuaa.

O le tausaga na tea nei na uluai faila ai e le malo lenei mataupu, ma tuuaia ai Satele i lona faatonuina lea o nisi e faatino se solitulafono, ae o matai e toalua  e aofia ai Muliaga Muliaga ma Popese Tupea na tuuaia i le faaleaga meatotino ma le tu fua i le fanua o le isi tagata e aunoa ma se faatanaga.

Peitai ina ua maea iloiloga sa faia, na toe faila ai e le malo sa latou talosaga i le faamasinoga ina ia solofua moliaga faasaga ia Satele ma i laua e toalua.

Fai mai faamaumauga a le faamasinoga, ina ua iloa e le alii o loo tagi ua faaleaga e nisi le tuugamau a lona tuaa, sa la fetaui ai ma Satele ma faailoa atu ai e Satele ia te ia, o ia na faaleagaina le tuugamau a lona tuaa, ina ua ia faatonu ni matai e faatino lea gaioiga.

Fai mai le malo, sa le fiafia Satele i le auala na fausia ai le  tuugamau o le tuaa a le alii o loo tagi, ona o le a maualuga  atu i tuugamau a ona tuaa.

Ina ua fofogaina le mataupu a Satele i le taeao ananafi, na faailoa atu ai e lana loia i luma o le faamasinoga e faapea, o tuuaiga ua faia faasaga ia Satele, ua na o ni tuuaiga lava ma ni tala faalogo, peitai o le a i ai le aso e tulai ai Satele mo le tuuina atu o lana tali e uiga i nei tuuaiga, ma ua la sauni foi mo lea aso.

Ao faatalitali ai le aso lea ua faatulaga e toe fofogaina ai lenei mataupu, ua fautuaina e le afioga i le alii faamasino ia John Ward II le ua molia ina ia tausi le filemu i totonu o le nuu, ma aua nei ona toe soliina se isi tulafono ao faatalitali ai le isi aso o lana iloiloga.