E 30 aso le umi lea ua fa’amalolo le tumau ai le ali’i leoleo o le toese i Tafuna o Rocky Tua mai lana galuega e aunoa ma sona totogi e maua, ma le faamoemoe a toe fo’i atu o ia i lana galuega, o le a maua atoa lona totogi mo masina na fa’amalolo ai o ia a’o fa’agasolo le suesueina o le mataupu sa tuuaia ai o ia e le malo.

O lea tulaga na faamaonia mai e le Komesina o Leoleo ia William E. Haleck i le Samoa News i le amataga o le vaiaso nei.

E silia i le tausaga talu ona faamalolo Tua mai lana galuega, a’o faagasolo ai le mataupu na tuuaia ai o ia e le malo, i lona faataga lea o ni pagota e o i tua ma le toese e fai mai lana fa’atau, peitai o ia tuuaiga e le i mafai ona fa’amaonia e le vaega iloilo iuga ina ua faataunuu le faamasinoga autu a Tua i le tausaga na te’a nei.

E tusa ai ma faamaumauga a le fa’amasinoga, o le masina o Oketopa 2012 na faila ai e le malo moliaga fa’asaga ia Tua.

O se iloiloga sa faia i le va o le malo ma Tua i luma o le Fa’amasinoga o Mataupu Tau Pulega i le amataga o le masina lenei, na faia ai loa se maliliega i le va o itu e lua, o le a faamalolo le tumau Tua mo le umi e 30 aso ae a mae’a lea fa’asalaga, ona toe fo’i lea o Tua i lana galuega, o le a toe maua atoa fo’i lona totogi mo le umi na faamalolo ai o ia.

O le aso 6 Mati 2014 ina ua mae’a le iloiloga mulimuli a Tua ma le malo i luma o le fa’amasinoga o Mataupu tau Pulega, na tusia ai loa e le Faatonusili o le Matagaluega o Tagata Faigaluega a le malo ia Sonny L. Thompson se tusi e tuuina atu ia Tua, e fa’ailoa atu ai le faaiuga ina ia fa’amalolo le tumau o ia mai lana galuega.

Na taua e Thompson i lana tusi ia Tua e faapea, e tusa ai ma vaega o le tulafono 7.0802 atoa ai ma le 4.0801, ua tuuina atu ai le faaiuga ina ia faamalolo o ia mai lana galuega mo le umi e 30 aso, amata mai i le aso 10 Mati 2014.

“O lea faaiuga o lo o faavae lea i luga o se fautuaga sa tuuina mai e le Komesina o Leoleo ia William E. Haleck, lea fo’i ua ou taliaina,” o se vaega lea o le tusi a Thompson ia Tua.

Na taua e Haleck i le Samoa News, o le aso 11 Aperila 2014 e mae’a ai le fa’asalaga le tumau a Tua, ona toe fo’i atu loa lea i lana galuega.

I se vaega o le tusi a Thompson ia Tua, sa ia taua ai e fa’apea, e tusa ai ma le tulafono 7.0802, sa ia iloilo ai ma le toto’a se fautuaga sa tuuina atu e le komesina o leoleo ia te ia, atoa ai ma le ripoti o se suesuega faalotoifale sa faia a le Ofisa o Leoleo, lea o lo o taua ai vaega o solitulafono faatinoina e le alii leoleo.

I le aso 19 Iulai 2012 e pei ona taua e Thompson i lana tusi ia Tua pe tusa o le itula e 7:00 i le afiafi a’o fa’atinoina ai tiute o Tua o se ali’i leoleo i le toese i Tafuna, sa ia faatamala ai e faatino ona tiute tauave, ina ua ia tuuina atu le ki o se sela i le alii pagota o Va Ofoia o lo o tuli sona faasalaga faafalepuipui ona o le tapele fale.

“Sa e faatonuina le alii pagota o Ofoia e alu e tatala le sela o lo o loka ai le alii pagota o Veli Tagaleoo, ae fai i ai e alu atu e vaai oe, ma o lou faia o lea gaioiga ua e le usitaia ai le faatonuga a le Pule o le toese ina ia oo atu i le itula e 6:00 i le afiafi ua loka uma pagota i totonu o a latou sela, faatoa toe tatala lava i fafo i le itula e 6:00 o le taeao e sosoo ai, sei vagana ai pagota ua tofia e kuka e mafai ona tatala i le 5:00 i le vaveao,” o se vaega lea o le tusi a Thompson ia Tua.

Ina ua tatala i tua le alii pagota o Veli, sa faatonuina loa o ia e Tua e alu i le faleoloa e faatau mai ni pia, ae o le taimi lea o lo o taofia Veli i le toese mo le tuliina o sona faasalaga faafalepuipui, ma sa usita’i Veli i le faatonuga a Tua ma alu ai loa i le faleoloa e faatau.

“O lou tatalaina o Veli i tua e alu e faatau, ua e le usitaia ai le poloaiga a le faamasinoga e faasa ai ona tatala le alii pagota i tua, sei vagana o se poloaiga mai le faamasinoga po o le auina atu fo’i o ia e vaai se foma’i,” o le isi lea vaega o le tusi a Thompson ia Tua.

Ao i ai Veli i le faleoloa o Pio’s Store i Nuuuli pe tusa o le itula e 7:40, sa la fetaui ai ma le isi leoleo o le falepuipui ia Mokiana Yandall, ona fesili lea o Yandall ia Veli poo a ana mea e fai i le faleoloa, ae na tali Veli na faataga o ia e Tua e alu i le faleoloa.

I se taimi o le po lava lea e pei ona taua i le tusi, sa toe faataga ai fo’i e Tua le alii pagota o Jason Te’i poo Pili foi e pei ona iloa ai, e alu i le faleoloa e faatau mai ni isi pia, ma o lea gaioiga ua soli ai foi e Tua le tulafono.