Ads by Google Ads by Google

Toe faamanino le uiga moni o le polokalama ‘1602’

O le feiloaiga a le komiti a le Senate mo le Faagaioiga o le malo, ma sui o le Faletupe o Atina’e a Amerika Samoa (DBAS) i le Aso Faraile na te’a nei, na mafai ai ona faamalamalama auiliili e le tofa i le tootoo ia Lolo M. Moliga, lea sa avea ma peresetene o le DBAS, le aano moni na mafua ai ona aumai le polokalama ua taua o le ‘1602’ i le teritori, lea e pei ona vava o i ai le atunuu, atoa ai ma ituaiga tagata e mafai ona agavaa i lea polokalama.

O lenei polokalama sa faatupe mai e le malo tele o Amerika, ae sa tuuina atu i lalo o le faatautaiga a le DBAS, le tusa ma le $30 miliona na aumai e faatupe ai le polokalama.

O lea iloiloga na valaauina ina ua lomia i le Samoa News i le vaiaso na te’a nei se vaega o le ripoti a le Ofisa o lo o vaavaaia tupe na aumai e le feterale, e fesoasoani ai i le toe faaleleia o le tamaoaiga ma le atinae o le teritori, le American Samoa Economy Stimulus and Recovery Office (ASESRO).

O tusitusiga a le Samoa News o lo o faavae lea i luga o se vaega o le ‘draft report’ a le ASESRO, ma o nisi o vaega o lea draft report o loo taua ai le le lelei o le iloiloina o talosaga sa tuuina atu a nisi sa faamanuiaina i le polokalame, atoa ai ma le agavaa ai o le toatele o tagata e i ai o latou piitaga i le komiti faafoe ma le pulega a le Faletupe o Atina’e sa faatautaia le polokalame.

O nisi o tuuaiga e aofia ai le faamanuiaina o taitoalua o nisi o le komiti faafoe, o latou uso atoa ai ma o latou aiga.

I le saunoaga a  Lolo sa ia taua ai e faapea, o le aano autu na mafua ai ona aumai le polokalama, ina ia manuia ai tagata o Amerika Samoa, ma fesoasoani ai i fale mo i latou e vaivai ma maualalo le tamaoaiga.

Sa ia taua e faapea, e lata i le lima tausaga o taatia pea le polokalama lenei e le’i faagaioia, ae o le taimi lava na tofia ai o ia e avea ma peresetene o le DBAS, o le vaega muamua lava lea na fautua atu ai le alii kovana ia te ia, “Lolo, vaai pe mafai ona aumai le polokalame lenei,” o lea na o latou galulue ai loa ma le Faletupe i le aumaia o le polokalame i le atunuu.

“O le polokalama o le ‘1602’ , lea e fausia ai e i latou e agavaa i le polokalama ma malolosi lo latou tamaoaiga, fale e aumau ma nonofo ai i latou e maualalo lo latou tamaoaiga, sa tuuina mai fo’i ma le faamoemoe ia manuia ai tagata o le atunuu, peitai o faamatalaga ua faasalalau e le nusipepa e uiga i le ripoti a le Ofisa, e le sa’o, e le gata o lapisi uma, ae o le pola foi e motu i tua, e le tatau i le maota ona atugalu i ai, leaga e afaina ai le aganuu ma afaina ai le soifua fealofani o le atunuu.”

O le polokalama la o le ‘1602’ e pei ona taua e sui o le Faletupe, e mafai ai ona talosaga i latou e gafatia ona fausia fale e mautotogi ai i latou e maualalo tulaga o le tamaoaiga i o latou aiga.

Na faapupula atili e le tofa Malemo i luma o le komiti e faapea, ina ua faatoa tuuina mai le polokalame lenei i Amerika Samoa, sa latou galulue faatasi ma Lolo ma sui o le Komiti Faafoe saili auala e faafoe ai, ona o le faanaunautaiga e tasi sa i o latou manatu, “ia manuia ai le atunuu i le faafoeina o le polokalame,” peitai o faaupuga ua sau i luga o le nusipepa, ua afaina ai fua le taitai komiti a le faletupe (o Malemo o le taitai komiti), “ae o le mea mea moni le maota, e leai se isi o gaoia ni tupe, ae afai ua avea faasalalauga i luga o le nusipepa ua afaina ai nisi o loo foufou i le tofi, o loo silasila le Atua.”

Na fesili le afioga ia Fuamatu J.V Fuamatu ia Lolo pe toafia nisi na faamanuiaina i le polokalame, ae na tali Lolo, “e toa 132.”

O lea aofai e pei ona taua e molimau, e eseese uma lava aofai o tupe sa faamanuiaina ai i latou. O le polokalame lenei, sa mulimulita’i lava i tulafono ma ta’iala na aumai e faatautaia ai, ma le talitonuga o molimau e pei ona o latou faailoa i luma o le komiti, e leai se taiala poo ni tulafono na aumai mo le polokalame ua latou soliina.

E le o se taimi muamua lenei na fesiligia ai e le Fono le mataupu e uiga i le polokalama lenei, ina ua mapuna a’e foi nisi o tuuaiga i le tutu lea o nisi o fale sa faatupe i le polokalama ua le mae’a.

I le talitonuga o sui o le Fono, o le polokalame lenei faatoa maea i le aso 31 Tesema 2012, ma e i ai lo latou talitonuga o le taimi lea e alaga tatau ai loa ona saili se ripoti mautu e faatatau i le polokalama.

I le uluai feiloaiga a le maota o sui ma le tofa Lolo e uiga i le polokalame lenei, na taua ai e le tootoo e faapea, afai e i ai ni vaega o galuega o fale o aiga e toe faaopoopo, e ese mai i le ata sa pasia ma faatupe atu i lalo o le polokalama, o le faaopoopoga lena e faatupe lava e le tagata e ana le galuega, ona o le isi lea mataupu o loo fesiligia e le toatele, pe aisea ua tutu ai fale a nisi ua le mae’a.