O siitaga uma lava o totogi a ni isi o tagata faigaluega a le malo na faia i le ogatotonu o le tausaga na te’a nei, ae le o aofia ai i totonu o le Paketi o le Tausaga Tupe 201-13, ua faia le faaiuga ina ia taofia uma ia siitaga ae toe faafo’i totogi o tagata faigaluega i le tulaga tuai sa i ai muamua.

O se tasi lea o mataupu na faamamafa e le afioga i le kovana sili ia Lolo Matalasi Moliga i le fonotaga a le kapeneta i le aso Faraile na te’a nei, ina ua maua lona avanoa e saunoa ai i luma o Faatonu o Ofisa ma Matagaluega a le malo.

O le ulua’i taimi fo’i lea i le tala faasolopito o le faiga malo a Amerika Samoa ua maua ai se avanoa o tusitala e auai i fonotaga a le kapeneta ma faafofoga i mataupu o lo o talanoaina ai.

Saunoa le alii kovana sili e faapea, ua uma ona ia fautuaina le Faatonusili o le Matagaluega o Tagata Faigaluega a le malo, ina ia aveese uma siitaga i totogi o ni isi o tagata faigaluega a le malo sa faia i le ogatotonu o le tausaga na te’a nei, e le o aofia ai i totonu o le Paketi o le 2013, ae toe faafo’i i tua o latou totogi i le tulaga tuai sa i ai.

I se tusi na tuuina atu e le Faatonusili o le Matagaluega o Tagata Faigaluega a le malo ia Le’i Sonny Thompson, i ni isi o Faatonu o Ofisa a le malo o lo o aafia a latou tagata faigaluega i le tulaga lea, o lo o faamanino ai e Le’i le faaiuga ua faia e lona ofisa i totogi o i latou o lo o aafia i lenei mataupu.

Na taua e Le’i i lana tusi i le aso 7 Fepuari, 2013 e faapea, talu ai o se fautuaga mai le alii kovana e tusa ai o sana Poloaiga Faalauaitele i le aso 4 Ianuari, 2013 e faatatau i le sailia o auala e ‘faaitiitia ai tupe faaalu’ a le malo, o le a amata atu i le aso totogi o le malo na te’a nei ona toe faafo’i totogi o tagata faigaluega o lo o aafia i lenei suiga i le tulaga tuai sa i ai.

O ia suiga e aofia ai tagata faigaluega fou sa faa faigaluega i totonu o le 6 masina mulimuli o le tausaga na tea nei, faapea ai siitaga o totogi sa faia ai e le o aofia i totonu o le Paketi a le malo ua maea ona pasia mo le tausaga tupe lenei.

Na faapipi’i atu i le kopi o le tusi a Le’i i ni isi o Faatonusili lisi o tagata faigaluega o lo o aafia i lenei suiga. Saunoa le tofa Le’i, e lata i le to’a 100 le aofai o tagata faigaluega ua toe faafo’i uma i tua o latou totogi, ae pito maualuga ai lava le siitaga sa faia i se tasi o tagata faigaluega a le Matagaluega o Leoleo i le aofa’i e $11,000.

“O siitaga uma lava e le o i totonu o le Paketi o le 2013, e tatau ona faafo’i i le tulaga tuai sa i ai,” o le saunoaga lea a Le’i.

Saunoa kovana Lolo i luma o lana kapeneta e faapea, o siitaga uma o totogi a tagata faigaluega sa faia i le tausaga na te’a nei o lo o soli ai le tulafono, ua faia lana faatonugaina ia toe faafo’i uma i le tulaga tuai sa i ai.

Na faaaoga e le alii kovana le Ofisa o Leoleo e fai ma faataitaiga o lana saunoaga ma ia taua ai e faapea, e i ai tagata faigaluega a le Ofisa o Leoleo sa $20,000 lona totogi sa i ai peitai o suiga sa faia ua oso faafuase’i ai i luga i le $40,000, ma o lea siitaga e le o aofia ai i totonu o le Paketi mo le 2013.

“O la’u fautuaga ua tuuina atu ia te outou uma o Faatonu o Ofisa a le malo, afai o tagata faigaluega a lou Ofisa o lo o totogi i le tupe a le feterale, ia tumau ai pea i le tulaga o lo o totogi ai, ae le o le taumafai e suia e avea ma tagata faigaluega tumau a le malo, e le o se mea sa’o lena faiga,” o le saunoaga lea a Lolo.

O le isi vaega sa faamamafa i lana saunoaga, o le taumafai lea o taitai ma tagata faigaluega uma a le malo e tausisi i tulafono i soo se taimi e faatino ai a latou galuega, ina ia mautinoa e leai se tulafono e soli e le faigamalo.

I tulaga i paketi ma tupe faasoasoa, sa ia fautuaina faatonuina ina ia fesootai ma lana aufaigaluega i le tele o taimi, ina ia iloa e le faatonu galuega a lana aufaigaluega, ma malamalama i le tulaga ua oo i ai lana tupe faasoasoa.

“O se tasi o mafuaaga e ala ai ona soli le tulafono e leai o se ata faataoto (plan) a le matagaluega e taula’i i ai ana galuega faatino, aemaise lava i le faaaogaina o tupe mai fafo (federal grants), ma mafua ai loa ona tula’i mai tulaga faaletonu i tupe na (high risk), ae afai e faataoto e le ofisa le alafua e faatino ai ana galuega ma mulimuli i ai, ma te talitonu ma Lemanu e le toe tupu lena faaletonu na tula’i mai i tausaga ua te’a,” o le isi lea saunoaga a Lolo i le kapeneta.

O le isi fonotaga a le kapeneta o le a sosoo ai, o le a faia i le potufono a le Matagaluega o Faatoaga i le isi 2 vaiaso o lo o muamua.