Ads by Google Ads by Google

Toe Fa’asa ‘Leota Itu’au Ale’ ma Solosolo

I le talitonuga o le pulega ali’i ma faipule o le afio’aga o Solosolo, ua toe pelogia fo’i le afio’aga e le matai sili o le afio’aga, o le sa avea ma Fofoga Fetalai o le Palemene, ma ua finagalo autasia le afio’aga, ia fa’ate’a atoa le afioga Leota Ituau Ale ma lona aiga mai le afio’aga, ua fa’asa ai fo’i ona toe o’o atu i lona fale, fa’atasi ai ma lona to’alua ma le fanau.

O le tagi na fa’aulu a le afioga Leota Ale e fa’asaga i le fa’ai’uga a le afio’aga ua faia ia te ia ma le aiga, na amata fa’afofogaina e le fa’amasinoga i le aso Gafua o le vaiaso nei, i Mulinu’u.

O le fa’ai’uga na faia e le afio’aga o Solosolo i lenei matai ma le aiga, na tamaua lea i le aso 10 Tesema,2011. O le mataupu lenei ua i a’ao nei o le Sui Peresetene Seveali’i Panapa ma fa’amasino Samoa o Luamanuvae Paleso’o ma Fa’amatuainu Saivaega Vasa ma sui su’esu’e o le Fa’amasinoga Su’a Pi ma Tofa Eteuati.

O se augani mai a le afioga Leota Itu’au Ale, “Ua ou mana’o lava ou te toe fo’i i lo’u aiga ma le nu’u.”

I sana tala na fa’amaumau i tusitusiga, na fa’amatala ai e Leone i le fa’amasinoga, e le o i ai lava sona sese i luma o le afio’aga, o le a fa’apea ai se fa’ai’uga e tu’uina mai e lona nu’u ia te ia.

“O se i si mea e matua leaga ai lenei fa’ai’uga ua faia, aua e na’o le fa lava vaiaso a’o le’i fa’ao’o maia lenei fa’ai’uga ia te a’u ma si o’u aiga, sa matou fa’alelei ai ma le afio’aga, e pei lava ona fa’atonuina ai a’u e le Fa’amasinoga.”
Na ia fa’ailoa i le fa’amasinoga, o le fa’ai’uga o lea taumafaiga tele, o le tala a le afio’aga ua toe lelei mea uma, ua toe ulufale o ia i le nu’u ia Oketopa 28, 2011. Na ia fa’aalia e silia ma le $20,000. sa ia fa’aalua mo le tapenaga atoa o le fagaina o le afio’aga, o sua na matua lanu ai le pulega a Ali’i ma faipule o le nu’u e o’o lava i le vasega o faletua ma tausi ma le aumaga ma le malosi o le nu’u i talavou.

Peita’i, ina ua o i ai o ia i Savai’i, ae fa’aali atu e se tasi o tulafale o le nu’u le fa’ai’uga a le afio’aga ua matua toe fa’asaina lava o ia mai le nu’u, fa’atasi ai ma lona to’alua ma le fanau.

O lea fa’ai’uga na fa’ao’o atu e ala i se tasi o tina o le aiga, Ututa’aloga Paiau, ma o ia fo’i lea o lo’o avea ma molimau i lenei fa’amasinoga. O le mea na tupu, na sau lelei lava se tasi o matai tulafale o Solosolo Nua fa’ailoa mai ia Ututa’aloga, e fa’ao’o atu ia Leota le fa’ai’uga a Matai o le nu’u ua matua faasaina lava o ia ma lana fanau mai le nu’u.
Afai fo’i ae maliu o ia, ‘aua ne’i manatu se tasi e fa’ao’o mai sona tino maliu e tanumia i le afio’aga.

I lana tala tusia i le fa’amasinoga, ua ia fa’ailoa ai, o lo’o i ai le tete’ega o le pulega o le afio’aga, ua manatu ai i latou, o lo ua pelogia fa’aono e lona sui le afio’aga, ma e afua lea ona ua na le tatalaina i tua ana tagi o lo’o i ai i le fa’amasinoga e fa’asaga i nisi o aiga i totonu o le afio’aga.
O le latou mau e fa’apea, “Na matou tu’utala ma Leota ma lona aiga ia Oketopa o le tausaga ua te’a, e tatau ona ia tatalaina i tua tagi e fa’asaga i nisi o aiga o le afio’aga, ona fa’ataga lea o ia i totonu o le nu’u, ma o le a le toe amana’ia e se tasi mea na tutupu muamua.”

E mafua lea tulaga, ona e leai se mea e mafai ona to’afilemu pe afai o lo’o i ai nei mataupu e fa’atupu vevesi i mafaufau o tagata i le fa’amasinoga. 
Na talitonu le afio’aga, o lo ua malamalama lelei le afioga Leota i lea mataupu ma lona fa’ai’uga ua i ai ona maua lea o le leleiga.

I le fonotaga muamua sa faia i le va o le afio’aga ma Leota Itu’au, na talosaga ane ai le afio’aga ia Leota ina ia fa’auia mai i tua mataupu nei ua fa’ao’o i le fa’amasinoga.

Na talia e Leota le fanoga o le afio’aga, peita’i, e ao ina soalaupule o ia ma si ona aiga potopoto i nei mataupu, pe a mae’a e fa’ao’o e ia le fanoga ua agiga e le afio’aga. O le afuaga lea o lona ave’esea o le tagi e tasi na fa’aulu, ae o lo’o totoe pea le isi vaega lea ua ta’u pelogia ai o ia e le nu’u.

O le manatu lea ua autasia i ai le pulega a le afio’aga o Solosolo, ua ou pelogia fo’i i latou, ma ua le fai tasi pe lua lea tulaga, ae ua fai so’o. I le fa’atatau a le afio’aga, o se sala sili lea ona matuia ia i latou, o le taumafai lea o se matai e pelogia le saofa’iga tupu ma e’e o le afio’aga.

“Ua pelogia lava e Leota le nu’u, ua pepelo fo’i o ia i le Atua.” O se tala lea ua fa’amatamata tetele i le folasaga a le saofa’iga o le afio’aga o Solosolo ua fa’amauina lea mo lenei fa’amasinoga.

Ina ua fesiligia sa’o lava e le ali’i fa’amasino samoa le afioga Leota Itu’au Ale. “Na e ioe i le afioaga o le a avea i tua au tagi?”

O le tali mai a Leota i lea fesili o le Leai. “E silafia e le Atua ou te le o malie i lea ituaiga o aiaiga!”

O lana tala mai, e tasi lava lana tala sa fai i le matai na alu atu e fa’ao’o atu le fa’ai’uga a le afio’aga, “Ia tu’u mai ia te a’u, aua e le faigofie.” I lona iloa, e le mafai ona ia faia na’o ia lea ituaiga o fa’ai’uga, ae o lo’o i ai lona aiga potopoto e ao ina mua’i talanoaina mea fa’apea.

I le talitonuga o le afioga Leota, ua ia fa’ailoa ai, o se fa’ai’uga maualuga tele ma le ogaoga ona a’afiaga i le soifua o le tagata ua faia e lona nu’u i lea aso ia te ia ma le aiga. Ua ia augani fo’i i le fa’amasinoga, ua na matua leiloa lava, se mea ua afua ai ona fa’a’ese mai le faiga o ia e lona afio’aga, aua o lo’o tele lava fo’i isi aiga, o lo’o i ai latou mataupu i totonu o le Fa’amasinoga Maualuga a Samoa, i tulaga o Suafa Matai ma Fanua.

O lo’o fa’aauau lea fa’amasinoga i le aso ananafi.

saunia: Leua Aiono Frost