Ads by Google Ads by Google

Toe fa’aopoopo isi moliaga o Paul Solofa

Na fa’aalia e loia feterale e fa’apea, ae e le’i a’afia le ali’i o Paul Solofa, i taupulepulega fa’asolitulafono lea e a’afia ai pasi a’oga, sa muamua ona a’afia o ia i ni taupulepulega fa’asolitulafono, i le totogia o ovataimi a inisinia (mechanics) ma isi tagata faigaluega a le ofisa o a’oga, e gafa ma pasi a’oga.

O le Aso Lua na se’i mavae atu nei, na talosagaina ai e loia feterale ia le fa’amasinoga feterale i le laumua i Uasigitone, ina ia fa’atagaina ona fa’afofoga vaega iloilo o fa’amasinoga (jury), i le molimau a Gustav Nauer, i le taimi e fa’agasolo ai le fa’amasinoga o Solofa, i le fa’ai’uga o le masina nei, e tusa ai ma le taupulepulega mo le totogia o ovataimi, fa’apea ai taupulepulega a Solofa, ina ia tu’uina atu se konakarate mai i le ofisa o taumafa mo fanau aoga (SLP) i se kamupani, o lo o a’afia ai o ia.

O lo o molia Solofa i le faitauga e tasi, i lona fa’alavelave i le fa’atinoga o tiute a vaega su’esu’e a le malo fa’apea ma lona taumafai e fa’alavelave i se tasi o molimau, a’o faia su’esu’ega i lona a’afiaga i taupulepulega fa’asolitulafono, e fa’asaga i le okaina ma le totogia o totoga o pasi aoga, a’o avea o ia ma fa’auluuluga o le ofisa tau pisinisi a le Ofisa o Aoga i ni nai tausaga ua mavae.

O le vaitaimi lava lea e tasi, o lo o masalomia e le ofisa loia feterale, na tula’i mai ai fo’i ma isi fa’afitauli lea ua molia ai nei Solofa.

TAUPULEPULEGA FA’ASOLITULAFONO I LE TOTOGIINA O OVATAIMI

Ua ofoina atu e loia feterale, e ala i sa latou talosaga tusitusia, ia ni fa’amaoniga, e tauala mai lea i le molimau a Nauer, lona talosagaina o se fesoasoani mai ia Solofa, ina ia mau totogi mo ovataimi a lana aufaigaluega.

Ma e tupu lea tulaga, ae tula’i mulimuli le fa’afitauli i tulaga e fa’atatau i pasi a’oga lea o lo o totonugalemu i le fa’amasinoga o Solofa.

Na fa’aalia e loia feterale e fa’apea, o le a fa’amanino e Nauer ia le umi ona fa’atali e ave pasi ma inisinia ia le totogia o a latou ovataimi, e ui i le sa’o ma tonu o le fa’auluina o a latou pepa po o taimi.  Ma o le a molimau fo’i Nauer, i le fa’amaonia mai e Solofa ia te ia, lona fesoasoani e fofoina lea fa’afitauli, ae o le a ia mana’omia se fesoasoani mai ia Nauer i se taimi mulimuli ane.

O lea fesoasoani, o le taupulepulega po o se maliliega, sa faia e Solofa ma Nauer, e maua ai e Solofa se vaega o le siaki mo ovataimi a Nauer, ae o le a u’una’i e Solofa ina ia maua vave totogi mo ovataimi a Nauer ma lana aufaigaluega.

O lo o ta’ua fo’i e loia feterale, le tele o peimeni na maua e Solofa mai ia Nauer, ae na fa’ato’a taofia lea tulaga, ina ua amata ona fa’agasolo taupulepulega fa’asolitulafono ia na a’afia ai pasi aoga.

Ma o lo o ta’ua e loia feterale, o se fa’amalamalamaga taua lenei i le amataga o le mafutaga fa’asolitulafono a Nauer ma Solofa.

O lo o finau loia feterale i le tatau ona tu’uina mai o le fa’atagana a le fa’amasinoga, e mafai ai ona faia se molimau a Nauer, e tusa ai ma le la mafutaga ma Solofa.  E le i fa’ailoa mai i totonu o le talosaga tusitusia a le malo feterale, pe fia se tupe o lo o masalomia na maua e Solofa.

TAUPULEPULEGA IA MAUA E SANA KAMUPANI SE KONAKARATE

O lo o ua talosaga fo’i loia feterale, ina ia fa’atagaina e le fa’amasinoga feterale e avea ma molimau, ia se fa’amatalaga a Solofa i vaega suesue a le malo feterale, na ia fa’amaonia ai lona faia o se gaioiga e maua ai sona lava manuia, e ala i lona tu’uina atu o se konakarate mai i le polokalama o taumafa mo fanau aoga (SLP), i se kamupani o lo o avea ai o ia ma se tasi o pa’aga.  (E le i ta’ua le igoa o le kamupani i totonu o le talosaga tusia a le malo).

O se fa’atalanoaga a sui o vaega su’esu’e a le malo feterale, ia Tesema 1, 2009, o lo o ta’ua e loia feterale, na ta’ua ai e Solofa e fa’apea, i le avea ai o ia ma le sa fa’auluulu iai le Ofisa Pisinisi a le Ofisa o Aoga, na ia taulimaina ai se vaegatupe mo lana vaega i totonu o taupulepulega fa’asolitulafono, lea na a’afia ai pasi aoga.

 O lo o taofi foi ia loia feterale, o lea lava fa’atalanoaga, na fa’amaonia ai foi e Solofa, lona fa’atonuina o seisi na o latou ‘aufa’atasia i nei taupulepulega fa’asolitulafono, ina ia fa’atama’ia ni fa’amaumauga, sa taumafai sui iloilo o fa’amasinoga feterale ina ia maua atu.

E le gata fo’i i lea, o lo o taofi loia feterale, sa fa’amaonia e Solofa, e ese mai i taupulepulega fa’asolitulafono lea na a’afia ai le okaina o totoga o pasi a’oga, ae sa avea fo’i Solofa ma pa’aga o se kamupani i’a, lea na sapalaia i’a i le polokalama taumafa mo fanau a’oga (SLP), ma na i ai fo’i o ia i le komiti fa’afoe a le Ofisa o A’oga, lea na filifilia le kamupani e ave i ai le konakarate.

O lo o molia fo’i le fa’amatalaina e Solofa i vaega su’esu’e a le malo feterale, lona fesoasoani i le tu’ufa’atasia o le tauofoga a lea kamupani, mo le konakarate mai i le SLP, ma sa ia nanaina lona a’afiaga ma le kamupani.