O le isi ali’i mai le pisinisi a ‘Le Aute Sports Bar’ i Malaeloa, lea e to’afa i ai i latou o lo o tu’uaia i le tafanaina o le lala o le Ofisa o Leoleo i Leone, ua fa’atonu e le fa’amasinoga maualuga i le vaiaso nei, na te tuua le teritori o Amerika Samoa ae toe fo’i atu i Samoa, ma nofo ai i fafo atu o le atunu’u mo le 5 tausaga.

O lea poloaiga ua tu’uina atu e le fa’amasinoga i le ali’i o Tuliese Taliu, po o “DUKIE” e pei ona iloa ai o ia e le to’atele, o se tasi lea o tuutuuga o lana nofovaavaaia e 5 tausaga, ina ua ta’usala o ia e le fa’amasinoga i le moliaga mamafa o lona umia fa’asolitulafono o vaega o le laau faasaina o le mariuana, atoa ai ma le moliaga o lona umia fa’asolitulafono o se a’upega e lei lesitalaina.

O le mataupu ua fa’asala ai Taliu na afua mai i le tausaga na te’a nei, ina ua taofi e leoleo na ave e Taliu, ina ua ia tipi ni ta’avale se lua i luga o le vaega o le alatele e le fa’ataga ona faia ai lea ituaiga gaioiga.

Na taofi e leoleo le ta’avale a Taliu ina ua maua ane e leai sona laisene po o se pepa fo’i e fa’amaonia ai o ia, ae ina ua saili e leoleo le ta’avale, sa maua ai se sikaleti mariuana, pulufana, atoa ai ma mea e fa’aaoga e tagata latou te tagofia fualaau fa’asaina.

A o le i tu’uina atu le fa’asalaga a le fa’amasinoga fa’asaga ia Taliu, na fa’atoese le ua molia e tusa ai o lana solitulafono sa fai, ma ia taua ai lona matua salamo moni mai le sese sa ia faia.

Na fa’atoese fo’i Taliu i lona aiga ina ia fa’amagalo o ia e tusa ai o le solitulafono sa ia faia, ua mafua ai ona ta’uvalea le igoa o le aiga.

I le fa’aiuga o lana fa’atoesega, e le gata sa ia ta’utino i le aoga o lona aumau ai i le toese ua mafai ai ona ia toe a’oa’oina se isi lesona taua mo lona olaga, ae sa ia talosaga fo’i i le fa’amasinoga mo se avanoa, se’i toe fo’i atu ai i tua e tausi ona matua ma fesoasoani i le atina’eina o lona aiga.

Na taua e le loia a Taliu ia Douglas Fiaui e fa’apea, o taimi uma lava la te talanoa ai ma lenei ali’i ao fa’agasolo mai ai taualumaga o lana mataupu, na te ta’utino atu ai lava ia te ia, o ia ua matua salamo moni e tusa ai o le solitulafono sa ia faia.

Na taua fo’i e Fiaui i le fa’amasinoga e faapea, e na o le tasi le sikaleti mariuana ma ni pulu fana sa maua ia Taliu, ma o lea ituaiga solitulafono, e fa’atulagaina o se solitulafono mama i ni isi vaega o le malo tele o Amerika.

I le fa’aiuga o le fa’afinauga a Fiaui, na ia talosagaina ai le fa’amasinoga ina ia nofovaavaaia Taliu, ae ua lava le umi lea ua mae’a ona taofia ai o ia i le toese e avea ma ana fa’asalaga i lenei mataupu, peita’i o lea fa’afinauga na matua tete’e i ai le loia a le malo ia Russel Smith.

Na taua e Smith e fa’apea, o pulu fana sa maua ia Taliu, o se pulu fana o le ituaiga o le .22 ma le .38. O le pulu fana o le .38 sa maua ia Taliu e pei ona finau Smith, e fa’aaoga e se tagata lea ituaiga fana e puipui ai o ia ma isi tagata, ae o se fana fo’i e le fa’ataga ona laisene i Amerika Samoa.

Na faamanino atili e Smith i le fa’amasinoga e faapea, e sili atu ona matuia le ituaiga solitulafono lenei, pe afai ae maua fa’atasi i se tagata le ituaiga pulu fana o le ‘.38’ ma fualaau fa’asaina, aua o ituaiga solitulafono ia e o fa’atasi lava.

Na finau Smith i le fa’amasinoga ina ia talia le fautuaga a le Ofisa Nofovaavaaia, ina ia fa’asala Taliu i le toese i Tafuna mo le 20 masina, o se tasi lea o tuutuuga o lana nofovaavaaia e 5 tausaga.

E lima tausaga na manatu le fa’amasinoga e fa’asala ai Taliu i le toese mo le solitulafono o le umia o vaega o fualaau fa’asaina, atoa ai ma le isi tausaga e tasi i totonu o le toese mo le solitulafono o le umia o se fana e le i lesitalaina, peita’i ua manatu ali’i fa’amasino, o le a fa’amalumalu le tuliina e Taliu o lea fa’asalaga fa’a falepuipui, ae o le a nofovaavaaia o ia mo le 5 tausaga i lalo o poloaiga e ao ona ia usita’i i ai.

O ni isi o ia poloaiga e aofia ai le avea o le umi lea ua mae’a ona ia tuliina i le toese, e fai ma ana fa’asalaga i lenei mataupu, ae o le a taofia pea o ia i le toese i Tafuna e fa’atali ai le taimi e mae’a ai ona fa’agaioi e le malo ona pepa malaga atoa ai ma le totogiina o lona pasese, ona ia tuua loa lea o le teritori ma aumau ai i fafo atu o le atunu’u mo le umi e 5 tausaga o lana nofovaavaaia.

E ui o lea ua poloaina e le fa’amasinoga Taliu na te tuua le teritori, o le a i ai pea o ia i le toese mo sina taimi umi, se’i fa’atali le fa’aiuga o le mataupu fou lea ua tu’uaia ai o ia e le malo ma isi ali’i e to’atolu, e mafua mai i le fa’alavelave na tafana ai le ofisa o leoleo i Leone i le masina o Novema 2014.

I le mataupu fou lea, e tolu moliaga mama o lo o tu’uaia ai e le malo ia Taliu, e aofia ai moliaga e lua o lona fesoasoani e fa’atino le solitulafono o le fa’ao’olima, atoa ai ma le moliaga e tasi o lona fesoasoani e fa’atino le solitulafono o le fa’aleaga meatotino.

Na taua e ni molimau i leoleo e fa’apea, i le po na tula’i mai ai le fa’alavelave i le ofisa o leoleo i Leone, sa latou vaaia ai Taliu o savali aga’i atu i se ta’avale ma se fana o lo o afifi i se ie lavalava.