Ua toe amataina nei le auaunaga masani a le Vaega Tosovaa a le malo i Satala, le Ronald Reagan Marine Railways e pei ona i ai le latou ulua’i va’a sa faia i ai galuega lipea i le vaiaso na te’a nei, e pei ona faamaonia mai e le Ta’ita’ifono o le Komiti Faafoe i le Samoa News, susuga David Robinson.

O nisi o galuega toe faalelei sa faagasolo mo le Vaega Tosovaa a le malo i ni nai vaiaso ua tuana’i atu, e aofia ai le faafouina o le filifili lea e fesoasoani i le tosoina mai o le vaega e tosovaa i luga, sa moomia le faaleleia mai le tele o tausaga ua mavae.

Ina ua fesiligia e le Samoa News, na taua ai e Robinson e faapea, e tusa ma le $400,000 le tau atoa o galuega sa latou faatinoina, e aofia ai le toe faafouina o vaega uma sa moomia le toe faaleleia mo le Vaega Tosovaa.

“O lo o i ai isi galuega laiti e moomia le fia faaleleia i vaega o le vaega tosovaa, ae le avea lea tulaga ma itu e taofia ai matou mai le amataina o le tautua masani, e ala i le tosoina lea o vaa fagota i luga o le vaega tosovaa, talu mai vaiaso e ono na amata faatino mai ai lenei galuega,” o le saunoaga lea a Robinson.

O le aso Lua na te’a nei e pei ona saunoa Robinson na toso ai i luga o le vaega tosovaa le vaa fagota muamua mo le lipeaina, talu ona ona maea galuega toe faaleleia sa galulue i ai le aufaigaluega.

Sa ia faafetaia le fesoasoani sa mafai ona tuuina mai e alii inisinia a le Grandalls Dry Dock mai Amerika, lea sa latou galulue mo le taimi atoa o le galuega.

“La te le’i faatonutonuina le faatinoina o le galuega, ae sa galulue faatasi ma le aufaigaluega i le faatinoina o le galuega, ma ua penefiti mai ai la matou aufaigaluega i le tomai na faasoa mai e i laua nei,” o le isi lea saunoaga a Robinson.

I le toe faaauau ai o le auaunaga masani a le Vaega Tosovaa, ua faaalia ai e Robinson le pisi o galuega ua faatoai atu mo le faatinoina, ma ua oo atu lava i le masina o Mati o le tausaga fou le umi lea ua faatoai atu ai galuega mo le lipeaina o vaa, ma ua sauni foi le aufaigaluega e tali atu i lenei lu’itau.

faaliliu Ausage Fausia