Ads by Google Ads by Google

Toe amata a’oga aveta’avale mo laisene aveta’avale

O le siitia o le tulaga o le saogalemu i luga o le alatele mo so’o se ave taavale, ua fa’atautaia ai e le Ofisa o Taavale Afi se tasi o la’asaga o lo o manaomia ona fa’atinoina i le tulafono, e faia ai a’oa’oga faapitoa mo i latou e fa’ato’a talosaga ni a latou laisene aveta’avale.

O le vaiaso nei o lo o fa’agasolo ai i le OMV i Tafuna nisi o a’oa’oga i luga o le malae mo i latou uma fa’atoa talosaga ni laisene aveta’avale, e aofia ai laisene aveta’avale la’upasese po o ta’avale tetele, lea o lo o fa’atautaia e leoleo mai le Matagaluega o le Puipuiga o le Saogalemu Lautele.

“Afai e te fia talosaga mo se laisene ave taavale fou, poo se laisene ave taavale e faaaoga i taavale laupasese ma taavale tetele, ua i ai se tasi o suiga ua faaopoopo i le su’eina o le suega, e pei o le faia lea o se aoaoga e faatautaia e alii ma tamaitai Leoleo, ina ia mautinoa o loo e mulimulita’i i tulaga uma e pei ona manaomia mai e le tulafono,” o le saunoaga lea a le afioga i le Pule o le OMV, afioga Faamausili Mau Jr i se feiloaiga ma le Samoa News i le taeao ananafi.

Na faamanino e Faamausili e faapea, o le aoaoga e pei ona faia e alii ma tamaitai leoleo i le vaiaso nei, sa faatinoina foi i ni tausaga ua te’a, ma le toe faaauauina mai ai i nisi o tausaga na soso’o mai ai, peitai i lona talitonuga, e tatau lava ona mulimulitai ma usitaia tulaga uma o le tulafono ina ia mautinoa le saogalemu o tagata uma i luga o le alatele.

“Afai e maea ona su’e lau suega, o le vaega e sosoo ai o le faataunuu lea o itula e 30 e faia ai aoga ma leoleo i luga o le malae, ina ia mautinoa ua lelei atoatoa le tagata ua talosaga mo le laisene ave taavale fou,” o le saunoaga lea a Faamausili.

E lata i le toa 50 alii ma tamaitai na auai i le aoaoga sa faia i le aso ananafi, lea e aofia ai i latou faatoa talosaga mo se laisene ave taavale mo le taimi muamua, faapea ai ma nisi o loo talosaga mo laisene ave taavale mo taavale la’upasese ma isi taavale tetele.

O nisi o vaega taua sa faatauaina i aoaoga sa gafa ma leoleo i le aso ananafi, o le mautinoa e lelei le vaai a le taavale, malammalama i faailoilo i luga o le alatele, ma ia usitai i soo se faailoilo o loo i luga o le alatele.

“E taua tele le aoaoga lenei mo a’u ua ou iloa ai nisi o vaega e tatau ona ou faia pe afai ou te aveina se taavale i luga o le alatele, aua e ese lava taimi e aoga ai ese le taimi e alu mo’i ai loa i luga o le auala,” o le molimau lea a le tamaitai o Carol Fiu, 18 tausaga mai Tafuna, o se tasi o le silia i le toa 50 na auai i aoaoga ananafi.

Na taua e le alii o Felise Mikaele o Iliili e faapea, ua 5 tausaga talu ona avea o ia ma ave taavale, ae o lana talosaga mo se laisene ave pasi lea ua mafua ai ona auai i le aoaoga ananafi.

“E taua le aoaoga lenei mo au, e faaleleia atili ai le malamalama ma le iloa o tulafono i luga o le alatele,” o faamatalaga lea a le alii o Mikaele.

E tatau ona 18 tausaga o se tasi e tuuina atu i ai le pemita ave taavale faataitai e pei ona faailoa mai e le tulafono (learner’s permit). Ia pasi foi i le suega e aoaoina ai le faamasani i faailoilo i luga o le alatele, e tatau foi ona ia feaveaiina le pemita i le taimi e ao ai lana ave taavale, ma ia la toalua ma se tagata ua i ai sona laisene ave taavale.

Ae mo i latou e lei agavaa ona tuuina atu i ai se laisene ave taavale (private driver’s license), e tatau ona laisene i Amerika Samoa o se tasi o loo ia umia le ituaiga laisene ave taavale o le ‘provisional driver’.

Saunoa Faamausili, e oo lava foi i tagata ave taavale ua i ai laisene ae ua atoa point e faasala ai, e manaomia le toe aooga.