E toavalu alii ma tamaitai leoleo o le Matagaluega o Leoleo ua faamanuiaina i faailoga o le ‘Leoleo o le Kuata’, e pei ona faalauiloa i le faapinega sa faia i le Aso Faraile o le vaiaso ua tuana’i i se sauniga puupuu.

Na tofu ofisa leoleo i Fagaitua, Fagatogo, Tafuna ma sui na faapineina i faailoga taualoa, faatasi ai ma le toatolu mai i le ofisa fou i Leone.

O isi leoleo e toalua sa faamanuiaina na aofia ai Nancy Soloava mai le vaega a le Traffic Division ma Det. Vasa Wells mai le Vaega e Suesueina mataupu tau solitulafono mamafa (CID Divison).

O lenei polokalama sa amataina e le tofa Tuaolo M. Fruean, a’o avea ma Komesina o Leoleo i le nofoaiga ua mavae atu i sona naunauga ina ia aloaia le tautua matavela a alii ma tamaitai leoleo.

E filifilia se tasi e avea ma leoleo o le kuata pe afai e maitauina le maualuga o le tulaga sa i ai lana auaunaga i le vaega o lo o galue ai, faamaoni, galue malosi, e le tia’i galuega, o se tasi foi e mataalia i soo se taimi e faatinoina ai lana auaunaga mo le 24 itula o aso e 7 o lo o galulue ai.

“O le isi autu o lenei faamoemoe e pei ona faaauau mai e le Matagaluega o Leoleo, ia iloa ai e alii ma tamaitai leoleo o lo o faataua e le matagaluega la latou tautua i soo se aso,” o le saunoaga lea a le Sui Komesina o Leoleo ia Leseiau Laumoli i le tatala aloaia o le sauniga i le Aso Faraile na te’a nei.

 Na faaalia e le afioga i le alii komesina ia William Haleck lona fiafia tele ina ua mafai ona auai i le ulua’i faapinega talu ona tofia o ia e fai ma komesina o leoleo.

“O se lagona fiafia ia te a’u lo’u auai e molimauina lenei aso taua, e le gata o le ulua’i faapinega lenei talu ona ou nofoia le nofoa, ae ou te manatu o se faamoemoe e tatau ona faaauau pea, ina ia mafai ai ona tuu atu le faafetai a le matagaluega i leoleo uma ua filifilia e tusa ai o la outou tautua matavela,” o le saunoaga lea a le alii komesina.

E le gata i le finagalo o le alii komesina e faaauau lenei polokalame, ae tatau foi ona i ai ni isi faailoga e sili atu ina ia unaia ai loto o isi leoleo e lei faapineina i le polokalame lenei e galulue faamalosi ma fai le mea sili, ina ia mafai ai ona faapaleina o ia i se taimi o i luma i ni isi o nei faailoga taualoa.

O le Taitai Leoleo ia Cpt. Vai Maiava na tolaulauina suafa o leoleo ua filifilia mo le kuata muamua o le tausaga 2013, lea na aofia ai Ianuari e oo mai ia Mati.

O le taitai o le Traffic Divison ia Capt. Taaloloioufaiva John Cendrowski na faalauiloaina le leoleo o le kuata mo lana vaega, ae o le leoleo o le masina o le CID Division na faalauiloa e le taitai o lea vaega, tofa Comndr. Lavata’i Ta’ase Sagapoluele.

Na taua e Sagapolutele e faapea, sa faigata ona filifili se leoleo o le kuata mo lana vaega, ona o le maualuluga ma le lelei o togi na galuega na mafai ona ausia e i latou uma o lo o  galulue ai, peitai i le faaiuga a le vaega sa faia le filiiliga, na faamanuiaina ai loa le tamaitai leoleo suesue ia Det. Wells i le faailoga.

O isi vaega e le’i faalauiloaina ni a latou leoleo o le kuata e aofia ai le Patrol Division; Marine Patrol Division ma le Fire Services Division.

O leoleo na faamanuiaina e aofia ai Off. Sevaaetasi: Off. Mamea: Off. Moeoge: Off. Saifoloi: Off. Godinet:. Off Matau: Off. Soloava ma Det. Wells.