E toatolu totino o le Komiti Faafoe a le Faalapotopotoga o le Eletise ma le Suavai (ASPA) na pasia e le Senate i le taeao ananafi, e aofia ai Perelini Perelini o le ta’ita’ifono, Peter Crispin ma Vaa Sokelati Fala.

O le faaiuga a le senate ua taoto, sa faia ina ua maea ona latou fesiligia molimau e tusa ai o latou agavaa e pei ona tofia ai i latou e le kovana.  O ni isi o mataupu na tele i ai fesili a afioga i senatoa, o auala e faaitiitia ai le tau o le eletise ma le suavai, atoa ai ma ni fuafuaga faataoto a le ASPA mo le lumana’i o lana tautua i le atunuu, aemaise ai o ni isi o ana galuega e pei o le aoina o le lapisi lea ua faasoa atu i ni isi o kamupani tua i le atunuu.

Na faamanino e Perelini i le komiti a le ASPA/TEO a le senate e faapea, e i ai ni isi o kamupani tua ua faasoa atu i ai e le ASPA le galuega mo le aoina o le lapisi, ona o ni isi o kamupani tua nei o lo o i ai a latou taavale ma masini e mafai ona faatino ai lea galuega, ona o lo o faaletonu ni isi o taavale a le ASPA.

“O le agaga moni o lo o i le ASPA, ia faasoa atu ni isi o nei tauta i kamupani tua e galulue  mai ai, ina ia tofu maua uma e kamupani tua ma le ASPA tulaga o tupe mai lenei auaunaga, ae maua ai loa ma le avanoa o le ASPA e taula’i ai lana vaai i le faatinoina o ana galuega o lo o faatulaga mai e le tulafono,” o le saunoaga lea a Perelini.

O tautua na taua e Perelini o lo o faatulaga mai e le tulafono e ao i le ASPA ona ave i ai lana faamuamua e aofia ai le eletise, suavai, vai lafoa’i ma le lapisi.

Talu ai ni isi o feeseeseaiga na tulai mai i le va o le senate ma le komiti faafoe tuai a le ASPA ua tuana’i atu, e faatatau i le puleaina o le paketi a le ASPA, na mafua ai ona fesili le alii senatoa ia Mauga Tasi Asuega ia Perelini poo ai e pule i le paketi a le ASPA, ae na tali Perelini, “e pei ona masani mai ai le ASPA i taimi ua tuana’i, o le fono e avatu ai le faaiuga mo lana paketi, ma o le tulaga fo’i lena o le a matou tausisi i ai.”

Na fautua le alii sui peresetene ia Nuanuaolefeagaiga T. Saoluaga i sui o le komiti, ina ia silasila toto’a i auala e mafai ai ona faaaoga le malosi o le la ma le savili e gaosi mai ai le eletise, ina ia faaitiitia ai le tulaga pagatia o lo o feagai ma le atunuu i le taimi nei, i le maualuga o le tau o le eletise e mafua mai ona o le taugata o le suauu o lo o gaosi mai ai.

Ae na taua e le alii senatoa ia Faletagoai Iati Tuiolemotu e faapea, o se tasi o tautua a le ASPA sa fesoasoani malosi ai i nai aiga lima vaivai, o le recycle lea ua taofia nei.

I lana tautua, e tatau ona toe faaauau lea tautua ina ia mafai ai ona maua se isi fesoasoani mo nai aiga lima vaivai o le atunuu.

I tulaga pagatia o lo o feagai pea ma motu e pei o Manu’a ma Aunuu, na talosaga ai le alii senatoa ia Saole Mila i sui o le komiti, ina ia silasila toto’a i le afi o lo o mumu ai tagata Aunuu i le taimi nei, e toeititi lava o aso uma e fai ma pe ai, ma ua avea lea ma mafuaaga ua tele ai mea totino a tagata ua faaletonu e pei o pusaaisa, e mafua mai i le motusia soo o le eletise.

O ananafi ina ua maea le tauaofiaga a le maota o sui, na faataunuuina ai la latou iloiloga mo le fesiligiaina o totino ia e toatolu o le komiti faafoe a le ASPA, ma ua faamoemoe o le taeao nei e tuuina atu ai suafa o i latou nei mo le palotaina.

O sui e le’i auai i le iloiloga e aofia ai Isabel Hudson ma Daniel King.