Ads by Google Ads by Google

Toatele ua malaga e fesoaosani i aiga i Samoa

O le toatele o tagata ia na malaga i le Lady Naomi mo Apia i le faaiuga o le vaiaso na te’a nei, e tasi lava le autu o le malaga atu i Samoa, o le fia fesoasoani lea i nai aiga ua pagatia ma mafatia ona o le afa o Evan na afatia ai le atunuu i le vaiaso na te’a nei.

E ui o tafaoga o le kerisimasi ma le tausaga fou sa autu i ai faigamalaga a ni isi o i latou nei, peitai ina ua tulai mai le faalavelave faalenatura lea ua aafia ai Samoa, na o latou taua ai loa i le Samoa News e faapea, o le a ave lava le faamuamua i le faia o galuega fesoasoani mo aiga ua pagatia.

O le toatele o tagata malaga sa o ma ave uta o faamomoli mo aiga i Samoa e aofia ai meaai tuuapa, taga alaisa faapea ai ma le tupe e faatagataga i le taga mo ni isi manaoga e tulai mai i Samoa.

Na taua e Vaimalu Aiono o Lelata e faapea, ua tala feagai lava la latou malaga ma lona toalua ma le la fanau, ma tulai mai o le faalavelave e pei ona pagatia ai lona aiga i Lelata, aemaise ai, o lona tuagane matua le isi lea o lo o aofia i le lisi o tagata o lo o tau sailia i le taimi nei.

“Sa ma talanoa ma lo’u uso ma faailoa mai ai, o lo’u tuagane matua le isi lea o lo o aofia i le lisi o tagata o lo o leiloloa talu mai le taimi o le afå, ma o se tala faanoanoa lea mo a’u ma lo’u aiga,” o le saunoaga lea a Vaimalu ma ona loimata ina ua fesiligia e le Samoa News.

“Afai ae tulai mai se faalavelave i lo’u tuagane, o se kerisimasi pito sili lenei ona faanoanoa ia te a’u ma lo’u aiga atoa,” o le isi lea saunoaga a Vaimalu, ao ia uu le lima o lana tama tama e 8 tausaga le matua, lea o lo o faaigoa i lona tuagane o lo o tau sailia nei.

O le isi tina sa malaga i le vaa na fesiligia e le Samoa News, o Margret Lautala mai le itumalo o Pauli i Savaii ma Palisi i Upolu.

Na taua e Margret e faapea, ina ua logo mai e lona aiga i Samoa tulaga pagatia ua feagai ma i latou, sa ia faaaluina ai se vaega tupe tele e faatau ai le tele o oloa e manaomia i Samoa i le taimi nei, ma tuu faatasi i luga o le pailate.

O ni isi o ia oloa e aofia ai pusa faguvai, o le anoanoa’i o meaai tuuapa, o nai lavalava ma mea e faaaoga i le kukaina o taumafa.

Ae na taua e le alii o Fred Vaifale e faapea, o ia na sau i le masina o Setema e tafao mai i lona uso matua ma lona aiga i Tutuila nei, peitai o se fiafiaga ina ua maua le avanoa e toe foi atu ai i lona aiga i Leauva’a, e vaai pe i ai se galuega e fesoasoani ai i ona matua i le tapenaina o le latou fanua.

Fai mai Fred, sa fia i ai lava i lona aiga i Samoa ina ua ta ta mai le afå o Evan, leaga sa fia vaai pe faapeii le malosi o le afå o Evan.

O isi pasese sa tuu faatasi a latou uta i le pailate e tasi, ina ia taugofie le totogiina ma mafai ai ona ave uma a latou uta i Samoa.

Na maua le avanoa e fesiligia ai e le Samoa News le Komesina Lagolago o le Matagaluega o Leoleo a le malo o Samoa, o ia foi lea o le Sui Sooupu mo le Matagaluega, le afioga Leaupepe Fatu Pula e tusa ai o se tulaga ua i ai le aofai o tagata maliliu talu mai le afå o Evan.

I se talanoaga i luga o le telefoni na faamaonia mai ai e Leaupepe e faapea, e oo mai i le taimi nei, e toa 4 lava tagata ua faamaonia ua maliliu, ma le toa 8 o lo o tau sailia pea i le taimi nei.

“O i latou e toa 4 ua maliliu e aofia ai se tina mai Tufuiopa e 63 tausaga le matua, ae o i latou e toa 8 o lo o tau sailia e o mai i afioaga e pei o Magiagi, Lelata, Vaimoso, Faleasi’u, Poutasi ma Vailele, ma e masalomia sa i ai latou i luga o vaa fagota i le taimi o le afå,” o le saunoaga lea a Leaupepe.

Ua taua foi i ripoti le ova i le toa 4,000 tagata ua leai ni fale e nonofo ai, ina ua faaleagaina o latou fale i le afå.

Ua talosagaina e kovana Togiola Tulafono aiga o lo o ai pea a latou faleie tetele ia na tufatufa atu e le FEMA ina ua maea le galulolo ia Setema 2009, ina ia alolofa ma aumai faleie ia e ave mo nai aiga i Samoa ua leai ni fale e nonofo ai, pe afai ua maea ona toe fausia a latou fale fou e nonofo ai.

Fai mai Togiola, e sili le ave o faleie e faaaoga e nai aiga i Samoa, nai lo le tuu ma pala ai iinei. Ua ia ofo mai foi le fesoasoani a le malo mo le tatalaina i lalo o faleie pe afai e finagalo i ai aiga o le atunuu.