Ads by Google Ads by Google

Toatele tausi ma’i na aloaia latou tautua

E silia i le to’a 60 Tausi Ma’i o lo o galulue i le Falema’i o le LBJ ma le Matagaluega o le Soifua Maloloina na faapaleina i faailoga i le Aso Gafua na te’a nei, e aloaia ai la latou tautua i totonu o le falema’i.

 

O ni isi o i latou na maua faailoga taualoa e aofia ai le tina ia Fa’atigafua Valusaga, LPN, lea na ia maua le faailoga o le tagata ua atoa le 40 tausaga o lana tautua i le falema’i o le LBJ, ae mo i latou ua atoa le ta’i 30 tausaga o le auaunaga i le LBJ e aofia ai Malama Masaniai, RN, Fa’atele Molesi, RN, Tavai Puletasi, LPN ma Simamao Tuato’o, RN, o ia fo’i lea o le sui peresetene o le vaega a le ‘Patient Care Services’ a le LBJ.

 

Na faatumulia le malumalu tapua’i o le falema’i i Fagaalu i taitai o le malo, uo ma aiga aemaise ai tama’ita’i tausi ma’i sa faapitoa i ai lenei sauniga faapitoa.

 

I le saunoaga faapitoa a le alii kovana sili, sa ia faafetaia ai le tautua faaauau a le toatele o tausi ma’i i le atunuu, lea ua molimauina ua tatau ona oo i le taimi e malolo litaea ai, ae o lo o faaauau pea la latou tautua mo le atunuu.

 

“O outou foma’i, na outou soifua mai i le lalolagi o outou o ta’ita’i, aua soo se taimi lava e sulu mai ai le tagata ma’i ia ou aao, latou te mana’omia lau faatonuga ma lau ta’ita’iga, ma o iina e afua mai ai le manatu, o outou o ta’ita’i e le gata mo tagata gasegase ae mo outou lava,” o se vaega lea o le saunoaga a le alii kovana.

 

Na faatepa e le alii kovana le aofia i le tulaga sa soifua mai ai Samoa i tausaga ua mavae, i le naunau o ali’i A’oa’o e faauu mai i aoga faa faifeau e saili ni a latou faletua i tama’ita’i tausi ma’i e galulue i so o se falema’i i totonu o Samoanalua.

 

Fai mai Lolo, o iina e atagia mai ai e i ai le meaalofa faapitoa na tuu e le Atua i tama’ita’i tausi ma’i ua mafua ai ona naunau alii A’oa’o e filifili mai ia te i latou ni o latou faletua.

 

I le faaiuga o lana saunoaga, sa ia unaia ai tupulaga o le atunuu ina ia naunau e aooga faafoma’i, ina ia mafai ona faaauau pea lenei tautua ma toatele ai ni isi o le atunuu e galulue ai i le lumana’i.

 

I le saunoaga ale pule fou o le LBJ ia Joseph Davis-Fleming, sa ia ta’ua ai le naunau o le falema’i e tuuina atu la latou lagolago i le galuega a tausi ma’i, ina ia mautinoa latou te maua le galulue faatasi i taimi ma aso uma mo le manuia o le soifua maloloina o le atunuu.

 

Sa ia talosagaina foi le malo ma le atunuu atoa, ina ia aua nei gata i le vaiaso nei le faamanatuina o le aso mo tama’ita’i tausi ma’i, a ia avea o se mea e faamanatu e tagata uma i aso uma ma taimi uma, ona o le taua o le latou tautua o lo o faia mo le atunuu.

 

Ae i le saunoaga a le Faatonusili o le Matagaluega o le Soifua Maloloina ia Motusa Tuileama Toatolu Nua, sa ia faafetaia ai le galuega soosoo tauau o lo o faia e tama’ita’i tausi ma’i a le LBJ, e ala i le oo atu lea i tua i aiga ma asia tama ma tina matutua o lo o i ai.

 

Na taua e le alii faatonusili e faapea, tusa lava pe leai ni togafitiga e ofoina atu e tamaitai tausi ma’i i le taimi latou te asia ai tama ma tina matutua i tua i aiga, ae o le vailaau sili o lo o latou tuuina atu “o le avatu lea o le leo malu e toe faaola ai lagona o le tagata matua ma maua ai pea lona fiafia i isi aso e tele o lo o totoe o lona ola.”

 

Na fautuaina e Motusa ia tausi ma’i o le LBJ ma le Soifua Maloloina ina ia galulue pea e faatino lea auaunaga.

 

I le saunoaga a le taitaifono o le komiti faafoe a le LBJ ia Tofoitaufa Sandra King-Young, sa ia faamatalaina ai le tautua a tamaitai tausi ma’i, “o se tasi na tuuina atu le ola i le tagata mafatia, aemaise lava i le taimi e lagona ai le ma’i ma le vaivai o le tino.”

 

Na taua e Tofoitaufa e faapea, tusa lava pe taumafai le malo e avatu tupe e tele ina ia foia ai le faafitauli tau tupe o lo o feagai ma le falema’i, ae afai e le faatinoina e tamaitai tausi ma’i a latou tiute i le tausia lelei lea o tagata o le atunuu, e le mafai ona foia faafitauli o lo o tulai mai i le falema’i.

 

O saunoga faaiu e lua o le aso na saunoa i ai le faletua ia Simamao Tuato’o mai le LBJ ma Margret Sesepasara, le Faatonu o Tamaitai Tausi Ma’i i le Matagaluega o le Soifua Maloloina.

 

I le aotelega o a laua saunoaga, na la faafetaia ai le tautua le faalogologotiga a tamaitai tausi ma’i uma i totonu o Amerika Samoa, ona o le galuega lelei o lo o latou ofoina atu i le atunuu.

 

E le gata i le faafetaia o le tautua a tamaitai tausi ma’i uma i le atunuu i soo se taimi e manaomia ai e tagata taitoatasi se fesoasoani, ae na la fautuaina foi i latou uma ina ia faaauau pea la latou tautua lelei mo le atunuu.