Ads by Google Ads by Google

TOATELE TAMA’ITA’I UA MOLIA I LE LIMA TAGOVALE

AISEA UA MOLIA AI TAMA’ITA’I I SOLITULAFONO TAU TUPE?

O le to’atele o tama’ita’i ua molia ma ta’usala e le faamasinoga i solitulafono e aafia ai tupe, na mafua ai ona fesili le alii Faamasino Sili i le aso ananafi i le loia a se tina talavou sa tuuaia i lona gaoiina lea o se credit card a se olomatua, pe aisea ua saoasaoa ma televave ai le faatupulaia o lenei solitulafono i tina ma tamaitai o le atunuu i aso nei.

Saunoa le alii faamasino sili ia Michael Kruse e faapea, o le aafia o tama’ita’i i solitulafono e aofia ai le ave faagaoi o tupe ma isi lava ituaiga gaioia e maua ai tupe, o se mea ua tupu so’o ma ua faigata ai ona manino le silasila a le faamasinoga i sana faaiuga e tuuina atu, e tusa ai o talosaga a loia mo se faamama sala mo i latou ua molia.

Pe oo i le taimi o le a lau ai le faasalaga, ona finau lea o loia a tamaitai o lo o molia i le faamasinoga, mo se faasalaga mama e tuu atu ia i latou nei ua molia, ona o le taimi muamua lea ua aafia ai i latou i ni solitulafono, a le o lena foi, e auala atu talosaga i fanau.

Saunoa Kruse, o le aafia o tamaitai i solitulafono o le lima tagovale, o se tulaga ua maitauina le faatupulaia, peitai pe a oo i le taimi e lau ai le faaiuga a le faamasinoga, e ao i Faamasino ona silasila i le isi itu i manaoga o tagata lautele, atoa ai ma se faasalaga ina ia aua ai ne’i toe tulai mai lenei solitulafono.

O ni isi o tamaitai e molia ma faamaonia a latou solitulafono e le faamasinoga, o ni isi o itu latou te faailoa i le faamasinoga e fai ma faamama avega mo se faasalaga, o le tausiga lea o  a latou fanau.

Ae na faamanino e Kruse ina ua lau le faasalaga a se tasi o tina na faamaoia lona gaoiina o se vaega tupe tele mai le kamupani sa galue ai, afai e taua i le tina lana fanau, aisea e lei magafagafa ai i lana fanau ma lona aiga i le taimi sa ia faatinoina ai le solitulafono?

Saunoa Kruse i le mataupu lea e faapea, e lua itu o lo o aafia i le taimi na faia ai e lea tina le  solitulafono, e le gata o lo o aafia le kamupani sa galue ai, ae i le isi itu, o lo o aafia, mafatia ma pagatia lona aiga i lona toalua ma lana fanau, ina ua motusia le mafutaga ao tuli ai faasalaga.

I le lua masina talu ai, na maitauina ai le toatele o tamaitai na loka e leoleo ma molia e le malo i solitulafono e aofia ai le gaoi, ave faagaoi o tupe, faia o faamaumauga taufaasese ina ia maua ai tupe, atoa ai ma le ave faagaoi o ATM card ma credit card ina ia mafai ai ona latou maua ni tupe, ma o ni isi o i latou nei o ni tamaitai se toatolu sa galulue i ni kamupani Inisiua i le atunuu.

O le isi toalua sa la ave faagaoi le silia i le $10,000 o tupe sa totogi atu e tagata mo inisiua o a latou taavale, ae o le isi toatasi sa ia faaaogaina tupe sa totogi atu e tagata mo inisiua a latou matua, e aunoa ma lona tuuina i totonu o faamaumauga a le kamupani Inisiua o ia tupe.

O tamaitai e toalua e aofia ai Herema Taupau ma Pricilla Toeleiu lea ua faamoemoe fofogaina a laua faasalaga i le vaiaso, ina ua la ioeina moliaga o le ave faagaoi o tupe a le kamupani Inisiua sa la galulue muamua ai.

O se tasi o tamaitai e tolu mataupu tau solitulafono eseese ua tuuaia ai o ia e le malo, ma o lo o taumafai le malo e tuu faatasi mataupu uma ia e tolu i se mataupu se tasi, e ala i se maliliega latou sainia ma tuuina atu i le faamasinoga, o ia lea o Katerina Siliga.

O le mataupu muamua na tuuaia ai Siliga i lona aia o tupe sa totogi atu e ona uso mo le Inisiua a o latou matua, ina ua fesiligia e leoleo, sa ioeina ai e lea tamaitai lona faaaogaina o se vaega tupe e silia i le $3,000

O le mataupu lona lua o lo o tuuaia ai o ia i lona aia lea o le silia i le $4,000 sa totogi atu e se alii mo le Inisiua a  lona tama, ina ua fesiligia e leoleo sa ioeina ai e Siliga lona faaaogaina o le tupe, ma le mataupu lona tolu, o lo o tuuaia ai o ia i lona aia o le silia i le $900 sa tuu atu e sana uo e totogi ai a latou pasese i le Hawaiian Air.

I ni tausaga e lei mamao atu, na faasala ai e le faamasinoga ni tamaitai se toatolu sa galulue i le lala o le faletupe o le ANZ Amerika Samoa Bank i Manu’a, ina ua faamaonia lo latou gaoia o se vaega tupe e silia i le $100,000 mai le faletupe.

I le faasolo mai ai i le 2010 ma le tausaga na te’a nei, sa faaauau ai pea ona tutulai ni tamaitai i luma o le faamasinoga, ona o moliaga e aafia ai le lima tagovale i tupe a kamupani sa galulue ai.

O ni isi o i latou e tuuaia i lo latou saini faagaoi o siaki a kamupani ae tala i faleoloa, ae o isi latou te sainia siaki o lo o latou iloa e leai se tupe o i totonu o lea teugatupe.

O le vaiaso nei foi na faatulaga e lau ai le faasalaga a le tina lea na faamaonia lona ave faagaoi o tupe a le kamupani vaalele a le Polynesia Airlines sa galue ai, peitai ua toe tolopo le lauina o lona faasalaga i le aso 11 Tesema.

E ova i le $11,000 le tupe na ave faagaoi e Judy Mata’utia ao avea ai o ia ma pule i se tasi o vaega o le ofisa a le kamupani vaalele.

O le aso la ananafi na sauni ai le faamasinoga e lau le faasalaga a se tina talavou ua tausala i le moliaga o lona taumafai lea e faaaoga faasolitulafono se credit card sa ia gaioiina, e fai ai sana faatau e aunoa ma se faatanaga a le tagata e ana le card, o ia lea o Naomi Mavaega.

Saunoa Kruse, o le mataupu e pei ona molia ai Mavaega na afua mai i le taimi sa nofonofo ai i totonu o le potu e faatali ai ma’i a le LBJ i Fagaalu, lea foi sa nofo atu ai i ona tafatafa ma se tina matua na alu atu e vaai le fomai.

O le mea na tupu, ina ua tatagi le telefoni a le maula lea, sa tu ai loa i luga o le a alu i fafo, ma ia vaaia ai le ato tupe a si olomatua o lo o totonu o lana ato, o lea na ia tago atu ma gaoi mai le ato ma savali ma ia i fafo.

E na o le $40 sa i totonu o le ato a si olomatua, faatasi ai ma lana credit card lea na taumafai Mavaega e faaaoga e faatau mai ai se seti o pa’u taavale mai le kamupani taavale a le ASCO Motors, e totogi ai le tupe e $450 o lo o nofo aitalafu i le pule o le kamupani taxi lea e tu ai le taxi o lo o fealua’i ai lona to’alua.

Ina ua uma ona faaaoga e Mavaega le $40 sa i totonu o le ato tupe atoa ai ma lona aveeseina o le credit card, na ia tia’i ai loa le ato tupe i le ma’umaga, peita’i na toe maua e leoleo le ato tupe ma ua toe faafoi atu nei i aao o le tina matua e ana ia lea meatotino.

I luma o le faamasinoga maualuga i le aso ananafi, na finau ai le loia a Mavaega o Leslie Cardin i le faamasinoga ina ia tuuina atu se faasalaga mama mo lenei tina talavou.

Fai mai Cardin, atonu ua tele mea ua popole ai Mavaega i le itu tau tupe, e le gata o lana aitalafu i le pule o le fale taxi, o le tausiga o si ana tama pepe o lo o i ai, ae faapea ai foi le tausiga o le aiga ma tau totogi pili.

Sa talosaga foi Cardin i le faamasinoga maualuga, ina ia silasila toto’a i le tulaga o le pepe a Mavaega, pe faapefea ona tausi ma fafaga o ia pe afai ae manatu le faamasinoga e loka o ia.

Fai mai Cardin, e tatau ona mafuta Mavaega ma lana pepe ina ia mautinoa o lo o mafai ona fafaga ma ia tausia o ia.

Na fesili le alii faamasino i le loia a le malo o Kimberly Hyde, pe o le a sona manatu i le faafinauga a le loia a Mavaega, pe mafai e le malo ona saili se auala e mafai ai e le ua molia onma tausi lana pepe ao taofia ai o ia i le falepuipui, peitai na tali le loia a le malo, e tatau lava ona inu le ua molia i le totogi o lana solitulafono, afai ua ia soli le tulafono, e tatau foi ona sauni e talia aafiaga o lana gaioiga sa faia, e aofia ai ma le saili lava e ia o se auala e mafai ai ona tausi lana tama ao tuli ai lana faasalaga.

Ua toe tolopo le mataupu e Mavaega e toe valaau i le aso Lua o le vaiaso fou, ina ia maua ai le avanoa o le Faamasinoga ma le Ofisa Faanofovaavaaia, e suesue ai ni auala e mafai ai ona tali le manaoga ua faatulai mai e le loia a Mavaega.