Ads by Google Ads by Google

Toatele le atunuu naunau e fia faatutu ni a latou lava pisinisi

O le toatele o le atunuu lea na lolofi atu i se semina sa faatautaia e le malo ma Asosi o le Aufaipisinisi i le vaiaso na te’a nei, sa o latou taua lo latou naunau e fia faatutu ni a latou lava pisinisi i le atunuu, e saili ai se isi vaega tupe faaopoopo mo le lumana’i o aiga, a’o i ai le atunuu i tulaga faaletonu o lona tamaoaiga i le taimi nei.

 

O lenei aoaoga sa faatautaia e le Asosi a le Aufaipisinisi; Matagaluega o Fefaatauaiga ma Alamanuia (DOC), atoa ai ma sui o le Faletupe o Atina’e a le malo, ma sa maua le avanoa o le mamalu o le atunuu na auai i lenei aoaoga e faafofoga ai i aoaoga ma faamatalaga eseese e faatatau i auala e mafai ai ona atina’e ma faatu se pisinisi faatoa amata.

 

I lenei aoaoga, sa mafai ai ona faailoa ma fesiligia e ni isi o le atunuu sa auai, ni isi o mataupu e mafua ai ona faafaigata ona amataina ni a latou pisinisi.

 

Na taua e le susuga a Tapu Vainuupo, 42 tausaga mai Aua e faapea, o se tasi o faafitauli o lo o ia maitauina i le taimi nei, e faigata tele i tagata lima vaivai pei o ia ona agavaa i ni nonogatupe mai faletupe, e amata ai se pisinisi mo lona aiga.

 

“E i ai aiaiga ma ta’iala e manaomia e le faletupe mo le tagata ina ia agavaa ai e talosaga, lona uiga afai e le agavaa a’u ma la’u talosaga, ua le tini la’u moemitiga o lo o i ai, o le fia faatu lea o sa’u pisinisi fou,” o le saunoaga lea a Tapu i le taimi o le aoaoga.

 

Ae na taua e Lynn Tuugasolo o Tafuna e faapea, o le isi mataupu o lo o avea ma faa faigata mo ia i le tau amataina o sana pisinisi, o le talosagaina lea o se laisene, ona e tele manaoga e tatau ona ausia ona faatoa mafai lea ona talia le talosaga, aemaise lava i tulaga o le pemita mo le faaaogaina o le fanua atoa ai ma le faatanaga mai le matai o le aiga.

 

O le susuga a Brian Ifopo o Fagaalu, sa ia fesiligia le mafuaaga e ala ai ona tuai talosaga mo laisene pisinisi.

 

Na taua e lea alii e faapea, o le tele o lavelave i talosaga mo laisene pisinisi, o isi ia mafuaga e ala ai ona toe solomuli le tagata o lo o fia faatu sana pisinisi, ona o le tele o le mau feuiaiga ma le lavelave e tatau ona uia muamua, ona faatoa mafai lea ona amata le pisinisi.

 

“Afai ae tele pisinisi i le atunuu, o le malosi foi lena o le tamaoaiga o le malo ma tele galuega mo nai o tatou tagata, ae afai e le lava pisinisi e faapena foi ona laititi le tupe e taamilo i le tamaoaiga, e tau leai foi ni galuega e maua e tagata,” o le saunoaga lea a Ifopo.

 

O ni isi o tagata sa auai, na o latou fesiligia sui o faletupe i ni auala e mafai ai ona fesoasoani ia te i latou mo ni nonogatupe e amata ai le pisinisi, ae o a foi auala e faa faigofie ai ona agavaa i latou e talosaga.

 

O ni isi o vaega o lenei aoaoga sa mafai ona faalauiloa i le silia i le toa 200 tagata sa mafai ona auai atu e faalogologo, o auala e mafai ai ona amata se pisinisi, atoa ai ma metotia e mafai ai ona faaauau ma faatumauina le manuia ma le lelei o le pisinisi.

 

O ni isi o tagata o le atunuu, e iloa amata ma faavae le pisinisi ae faa faigata ona latou sailiina ni auala e faamausali ai tulaga manuia o le pisinisi.

 

O ni isi o taiala sa mafai ona faailoa i le atunuu sa lolofi atu i lenei aoaoga, ia iloa ona faatulaga lelei le amataina o le pisinisi, iloa faasoasoa tupe mo le pisinisi, ma ia ulu pisinisi foi le tagata lea ua sauni e taitaia le pisinisi.

 

Sa auai foi i lenei aoaoga ni isi o tagata faipisinisi ua tele tausaga o faipisinisi, ma ua vaaia le tulaga manuia o a latou pisinisi.

 

Na taua e le faletua ia Merita Lafaele e o Nuuuli e faapea, o ni isi o tagata faipisinisi e lelei o latou mafaufau i le amataina o le pisinisi, peitai e faigata ona o latou puipuia tulaga o tupe mai le soona faaaogaina.

 

“O isi tagata faipisinisi e maua loa tupe ona faaalu lea i auala e le fesootai ma le pisinisi, mo se faataitaiga, e faaalu tupe i faalavelave ma isi manaoga o le olaga, ae sa tatau ona faaalu le tupe e faaola ma faaleleia atili ai le pisinisi, sei mautu ma lelei ona faatoa mafai lea ona laa atu i le isi laasaga,” o le molimau lea a Merita.

 

I le faaiuga o le aoaoga, sa mafai ai ona tuu faatasia fautuaga ma manatu faaalia o le atunuu, ina ia avea ma auala e faaleleia atili ai ni isi aoaoga o le a fuafua e toe faia mo le mataupu i pisinisi i le lumana’i.