E tusa ai o se molimau a se sui o le Matagaluega o Fa’atoaga i luma o le Senate i le taeao ananafi, e pito sili atu ona to’atele tagata faitogalaau aina mai Asia nai lo Amerika Samoa ma na ta’ua ai foi i lea iloiloga le faafaigata ona faamalamalama i faifaatoaga Asia ia auala e sui ai vailaau o lo o latou fa’aaogaina i a latou faatoaga.

Na taua e le susuga Manu Tui lea na fai ma sui o le Faatonusili o le Ofisa o Faatoaga i le iloiloga ananafi, o vailaau uma ia e fa’aaoga i le tausia ma le faaleleia o fa’atoaga laau aina o lo o ulufale mai i le teritori, o lo o faatagaina e le Ofisa a le US-EPA po o le ofisa e gafa ma le puipuiga o le siomaga, ae pau le latou galuega e fai o le asi o nofoaga o lo o i ai faatoaga ina ia mautinoa o lo o mulimulita’i le aufai faatoaga i le malosi e tatau ona sui ai vailaau e pei ona tusia i faatonuga o lo o faapipii i tino o vailaau.

O le iloiloga lenei na valaauina e le komiti o Faatoaga a le Senate, ona o ni atugaluga a ni isi o Senatoa i le tele o fualaau aina mai faatoaga a tagata Asia ua vaaia le faatau savali solo i totonu o nuu ma tafatafa o le alatele, ae o lo o masalomia le faaaoga o vailaau e le o faatagaina e tausi ma faalapopo’a ai.

O sui na auai i le iloiloga na aofia ai le Faatonusili o le AS-EPA, o Manu mai le Ofisa o Fa’atoaga, ae o le iloiloga na taitaia e le afioga i le alii senatoa ia LeAtualevao S. Asifoa, o le taitaifono lea o le komiti o faatoaga a le maota.

Na ta’ua e Manu ina ua fesiligia e Mauga Tasi Asuega, o le matafaioi a le matagaluega o faatoaga, o le asi o nofoaga o lo o i ai faatoaga togalaau aina eseese ina ia mautinoa o lo o talafeagai le malolosi o vailaau o lo o sui ma faatonuga o lo o aumai.

Ae peitai e faigofie atu ona malamalama tagata fai faatoaga Samoa i faatonuga nai lo tagata fai faatoaga Asia, ona o le toatele o i latou nei e le malamalama i le gagana faaperetania.

Ae na saunoa Laolagi Fonoti Savali Vaeao e faapea, afai e i ai ni tagata fai faatoaga Asia e le malamalama i le gagana faaperetania, e tatau la ona galulue faatasi le ofisa o faatoaga ma le Vaega o Femalagaaiga, ina ia siaki pepa nofomau po o talafeagai lo latou nonofo ai i le atunuu.

Na taua e Manu e faapea, o vailaau uma ia o lo o aumai fafo e faaleleia ai faatoaga, e leai ma se vailaau o lesitala i Amerika Samoa nei, ae o lo o lesitala mai i fafo e le vaega a le US-EPA, o lona uiga o latou ma le AS-EPA e galulue faatasi e siaki nei vailaau ina ia talafeagai ma le tulafono.

O se tasi o faafitauli na faatula’i, o le eseesega o iniseti po o manu nini’i i Amerika ma Amerika Samoa ona o le eseese o le tau, lea e i ai ni isi taimi e le gafatia e vailaau mai Amerika ona tineia ni isi o iniseti po o manu nini’i o lo o maua i totonu o le teritori.

Sa saunoa Soliai Tuipine Fuimaono e faapea, e masalosalo o ia e i ai vailaau oona o lo o tausi ai faatoaga a tagata Asia, ona e lapopo’a ese ai lava a latou fua o faatoaga i lo o fua o faatoaga a tagata samoa.

“Pau lava le mea o lo o taua i tagata fai faatoaga mai Asia, ia maua le latou tupe ae o se upu i le popole i le soifua maloloina o tagata o le atunuu e misi atoa,” o le saunoaga lea a le Soliai.

Saunoa foi Soliai e faapea, e tatau ona i ai se fale suesue e ave fualaau aina a tagata Asia e suesue ai ina ia mautinoa e le o ova le vailaau o lo o fana ma tausi ai ina ne’i aafia ai se soifua maloloinao se tasi.

Ae na saunoa senatoa Avegalio Aigamaua e faapea, e le tatau i le atunuu ona ita fua i nai tagata fai faatoaga Asia, aua o lo o lelei le latou galuega o lo o faia o lo o maua ai le isi fesoasoani mo le malo.