TIPOTI LE ALII AMIO VALEA

O le alii lea na ia ave se tama’ita’i e laititi i lalo o le tulafono i totonu o lona potu ma fai i ai ni uiga mataga, ua poloaina e le faamasinoga maualuga e faapea, a maea ona tuli lana faasalaga faafalepuipui e 28 masina i le toese i Tafuna, ona ia tuua lea o le teritori ae toe foi atu i le atunuu na sau ai mo tausaga e 7 ua faanofovaavaaia ai o ia.

 

O le faasalaga a le faamasinoga maualuga ua tuuina atu i le alii o Eti Ponali i le aso ananafi, na faia lea ina ua ta’usala le ua molia i moliaga mamafa e lua o le faia lea o uiga mataga faafeusuaiga i se tama’ita’i laititi, atoa ai ma lona tagofia o itutinosa o se tama’ita’i e le i faaipoipo i ai.

 

Na faatoese le ua molia i le faamasinoga ma le malo o Amerika Samoa e tusa ai o lana solitulafono sa fai. Sa ia faatoese foi i lona aiga, o le aiga o le tamaitai na aafia faapea ai lana sponsor, ina ia faamagalo o ia e tusa ai o lana solitulafono sa fai.

 

Na taua e le ua molia e faapea, o aso uma na taofia ai o ia i le toese, sa ia lagona ai le sese o lana gaioiga sa faia, ma ua ia lagona foi le salamo moni.

 

Na talosaga le loia a Ponali ia Michael White i le faamasinoga ina ia nofovaavaaia le ua molia. Na taua foi e White e faapea, o aso uma na te asia ai lenei alii i le toese, na te faailoa ane ai ia te ia lona matua salamo e tusa ai o lana mea sese sa fai.

 

Na finau White e faapea, o le solitulafono na faia e Ponali, e na o le faatasi lava ona tupu ae na avea lea faatasi ma itu na maua ai o ia ma mafua ai loa ona molia o ia e le malo. O se tasi o itu na silasila i ai le faamasinoga, o Ponali o lo o over stayer i le teritori.

 

E 7 tausaga na manatu le faamasinoga e loka ai le ua molia i le toese, peitai ua faamalumalu lona tuliina o lea faasalaga, ae nofovaavaaia o ia mo le 7 tausaga i lalo o poloaiga a le faamasinoga.

 

O ni isi o ia poloaiga e aofia ai lona tuliina o masina e 28 i le toese i Tafuna, e aofia ai ma masina e 6 lea ua maea ona ia tuliina e o o mai i le taimi nei, a maea, ona ia tuua lea o le teritori ae toe foi atu i lona atunuu na sau ai, sei vagana ua maea tausaga e 7 o lana nofovaavaaia ona faatoa mafai lea ona toe ulufale mai i le teritori.

 

Ua poloaina foi o ia ina ia lesitala lona igoa i le lisi o tagata ua tausala i le faia o uiga mataga i fanau laiti, ma ia faia se suega i lona tino po o ia tauaveina siama o le faama’i o le HIV.

 

Ua faasa foi e le faamasinoga le ua molia ona ia toe taumafai e faafesootai le tamaitai na aafia i lenei mataupu i so o se auala lava.

 

O le aso 21 Mati o le tausaga nei na tulai mai ai lenei faalavelave, ina ua fiu le aiga o le tamaitai na aafia e saili o ia, ae maua ane sa faiaiga ma le ua molia i totonu o lona potu.

Comment Here