Tineia fa’atauma’oia o fanau & ma’itaga le fuafuaina

“O fanau o le tofi lea mai le Atua,” o se fa’amamafa lea a le tama’ita’i o Celestine Faumuina-Nix i lana folasaga amata e fa’afeiloa’ia ma fa’afetaia ai le pa’au atu o sui na vala’aulia fa’apitoa mo le fa’amoemoe o le Matagaluega o Alagamanuia ma Tautua Lautele (DHSS) i lona vaega o Tautua Fealoa’i mo Fanau ma Aiga, e fa’ataua ai Aperila o le masina mo galuega tima’i ina ia taofia pe “matua tineia le fa’atauma’oi o fanau ma ma’itaga le fuafuaina.”

 

O auaunaga uma ua ofo mai e lea vaega o le matagaluega, ua aumaia ai se fe’au alofa mo fanau uma a le atunu’u, ae toe timata ai le upega fa’autaga mo matua o fanau uma, o lau fanau, o lou tofi moni mai le Atua.

 

O le toe augani mai ma le talosaga sa molia e le Faifea’au EFKAS i Pago Pago, Rev. Fa’atauva’a Talamoni, na toe fa’amamafa atili ai lea lava tofi o matua, ina ia toe taga’i ane lava i le afuaga tonu, o ma’itaga le fuafauina i fanau, fa’atasi ai ma isi mau fa’afitauli ua a’afia ai olaga talavou o fanau a le atunu’u, “Pe le o ta’ua lava e pa’u i ai lea tulaga, ona ua sasi lau va’ai ma lau puipuigamalu, ae tainane fo’i, ua e so’ona leotele ma avaavau i lou to’atama’i, ua afua ai ona le fa’alogo le fanau?”

 

E pau la tatou mau e fai fa’atasi i lenei matagaluega o le malo, “O le fa’afetai! Fa’afetai i le toe fafagu ma le toe tima’i mai, e fa’amanatu ai lo ta’ua tofi e le o faia ia taunu’u lelei olaga o le fanau, ma ia faia ia mautinoa ua fafau sa’o o latou olaga,” o a Talamoni lea.

 

“O pepe ua toe fananau mai a latou pepe, o fea ea se vaifofo? O le a se mafaufau tonu i le pepe tina e mafai ona fa’atonu ai le pepe fou ua fanau mai? O afuaga nei o omiga i olaga talavou o le fanau, ma faigata atili ai o latou lumana’i.”

 

O se sao lea o le fa’afeagaiga a’o le’i tatalo e molita’i le fa’amoemoe o le Matagaluega i le Atua, ia fesoasoani mai i o latou a’ao, o latou mafaufau, ae maise o sui o latou tautuaina, ia aoga se tima’i e suia ai lagona ma olaga o le fanau.

 

Na tolaulauina le Poloa’iga fa’alaua’itele a le afioga le Kovana Sili, e auga uma i ai taumafaiga o lenei masina, ina ia fa’ao’o tautua aoga mo i latou o i ai le mana’omia mo nei fesoasoani taua.

 

O sui fa’apitoa o pa’aga o lo’o galulue fa’atasi ma le DHSS i a latou tautua mo le fanau ma latou aiga, sa vala’aulia fa’apitoa mo le tutuina o moliga’o o lea lava sauniga taua. O nisi o sui talavou ua aoga i ai nei tautua sa vala’auina mo moliga’o e tolu na muamua mai: Aioli, Samoa ma Gella, ae o le moliga’o lona fa na tutuina lea e le susuga le Komesina o Leoleo William Haleck, ma le toe moliga’o sa tutuina lea e le sui mai le LBJ Social Services Ele Malae.

 

O le saunoaga a le Fa’atou sili Taeaoafua Meki Solomona sa toe fa’atepa ai pea matua, “O au o matua fanau! Ae afai tatou te le faia mea uma e fa’ailo ai lea fa’alagiga, masalo ua tatou fa’atamala i o tatou tofi mai le Atua.”

 

Sa ia tima’ia le fanau teine talavou o le atunu’u, “Se’i e mua’i va’ai mamao ma fa’ataua si ou aiga  na e tupuga mai ai, e te fa’atasiga i ou lagona tuinanau ae e te le’i malamalama lelei i ai. Aua le fa’ataute’e i matua, ae sapai le fa’atonuga mai ia te’i latou e te manuia ai. Afai ua e iloa ua e sasi, aua le te’ena tautua e aoga mo outou, tula’i ma saili le fesoasoani e tatau ma agava’a mo outou e toe fa’aleleia ai le olaga, ae ia outou ola fa’amagalo.”

 

O lana fa’afetai fo’i i a latou pa’aga mo le tausaga atoa o galuega na fa’atino fa’atasi, sa tausoa tiute ina ia fa’ao’o le tautua mo le fanau, e pei ona tatou ofo atu mo i latou. Fa’afetaia le Matagaluega o le Puipuiga o le Saogalemu Lautele, aua o i latou e sili ona tula’i muamua atu e fa’atino se auaunaga mo le fanau, ona fa’ato’a fa’ato’ai atu ai lea i lana matagaluega mo isi galuega fa’aopoopo e tausoa ai pagatia o ola ai fanau sauaina.

 

“Ia tatou galulue e fa’atino nei mea uma, ma ia fa’ailoa atu i le mamalu lautele o le atunu’u, e le na’o se fa’ataunu’u o tiute, ae o le auaunaga atoa ia atoatoa ona faia e pei lava ona tatou tinou e faia i aso uma,” o sana lea toe upu.

Comment Here