E 38 potua’oga na aofia i le polokalama na fa’atino a le Vaega o A’oa’oga Fa’apisinisi a Tafuna High School, ma sa avea ai le to’atele o sui iloga mai matata eseese i le atunu’u, e avea ma faia’oga mo piliota e tolu i a’oa’oga o le taeao a lea a’oga.

E tusa ai ma se fa’amatalaga aloaia a le susuga Ben Te’o, sa ia fa’ailoa mai ai, “O le taumafaiga lenei, sa taumafai e tu’ufa’atasia mai ai fanau a’oga mai isi a’oga maualuluga uma lava o le teritori, peita’i, ua taga’i i ai le matagaluega o a’oga i lea talosaga, ma sa latou fai mai, “E matua leai lava se mea fa’apeana e mafai ona faia e outou i Tafuna High School, ae le o se mea leaga, o se mea lelei na’ua!”

O sui mai matagaluega eseese o le Malo na auai e fa’ailoa ma tima’i le fanau i ituaiga a’oa’oga ma tomai e mo’omia mo a latou galuega fa’atino i totonu o latou matagaluega ta’itasi, sa aofia ai: Vaega o Fa’ato’aga, Vaega o Fefa’ataua’iga, Vaega o A’oga, Vaega o Fa’amasinoga,Vaega EMS, Vaega Fono, Vaega o le Saogalemu Fa’alotoifale, Vaega o Tagata Faigaluega a le Malo, Vaega a le Land Grant, Vaega o le Falema’i LBJ Dental, Vaega e Puipuiga o le Vaomatua & le Gataifale, Vaega a le NOAA, Vaega o Oloa a le malo, Vaega o le Puipuiga o le Saogalemu Lautele, Vaega o Mataupu Tau Samoa, Vaega e Va’ai le Tupe Fa’asoa ma Tupe Fa’aalu a le Malo.

Na auai mai fo’i le vaega a le Kolisi Tu’ufa’atasi a Amerika Samoa, Vaega fa’apitoa mai le Iunivesite o BYU Hawaii, Vaega a le Remington College. Na auai mai sui patino a le Vaega Au - US Army.

E ese mai lea sa vala’aulia fa’apitoa mai fo’i Sui mai Fa’alapotopotoga Eseese e aofia ai le Alofa Tunoa Peentekoso Pr. Heinrich Tavai, o sui fo’i mai le Vasega fa’au’u mai THS i le tausaga e 2002. Na vala’aulia le paga a Faoa ma Taufete’e ma sa o’o atu i la’ua nei e talia fa’afesili a le fanau e tusa ai o le la’ua polokalama mo a’oga a i latou, ae maise o avanoa mo i latou e aga’i atu ai i fafo i ni sikolasipi a le Malo.

Na vala’aulia fo’i le vaega a Lolo Moliga ma Lemanu Mauga peita’i, sa masi’i atu ai le tama’ita’i o Oreta Mapu Crichton, ina ia talia fesili a le fanau. Na auai atu sui o le Malaeimi Culinary School, o sui fo’i le MASI po’o le Miss American Samoa Inc. ae maise o sui mamalu mai le SOFIA po’o le sosaiete o Fa’afafine I Amerika Samoa.

E le’i misia le vaega o pisinisi tumaoti a le atunu’u i o latou sui na auai atu mo folasaga eseese e aoga e fa’atupu manatu mo le fanau, ina ia tausaili tomai mo’omia e ia, a’o a’otauina mo sona avanoa e manatu e fia tautua ma galue ai i lo tatou malo, pe fa’aauau ai ana a’oa’oga maualuluga i Kolisi ma Iunivesite.

O i latou mai le ASPA mo ituaiga galuega ma tomai e ao ina e atamai ai, e saili ai sau galuega i lea vaega tele o le Malo. O le vaega o le Fale telefoni a le tatou malo le ASTCA, na auai atu fo’i sui mai le ASCO Motors, o sui mai le Faletupe o ANZ Amerika Samoa, sui iloga mai le Bank of Hawaii, sui mai le CBT True Value, o sui mai le Faletupe o Atina’e a Amerika Samoa, DDW Don’t Drink the Water, le vaega a le Health Fitness Promoter, JIP Auto Mechanic, KHJ93.1 Radio Station, Origin Gas, Steven & Sons Inc., o le tama’ita’i o Tisa Fa’amuli mai le Tisa’s Barefoot Bar & Grill i Alega, ae maise le sui mai le tatou Nusipepa nei a le Samoa Daily News.

O sui uma nei sa latou fa’atautaia lesona aoga mo le fanau, e le’i faigofie lava lea tolu vasega, ae na matua iloga le tele o fetufa’iga i le va o le fanau ma i latou na o atu, aua o lea ua manino nei i le fanau nisi o ituaiga a’oa’oga, e ao ina mua’i a’otauina ai i latou, ona fa’ato’a mafai lea ona mautinoa so latou avanoa e faigaluega ai i le tele o ni avanoa i totonu o nei Ofisa.

Na mua’i faia le malu taeao, ma tima’ia le au faia’oga i o latou potu ma latou taimi e fesuia’i mai ai vasega, ona fa’ato’a ta’ape ai lea i potu a’oga e 38  e aofia ai ma le fale ta’alo sa fa’atautaia ai le a’oa’oga fa’aleoleo mai sui o lea Matagaluega o le Puipuiga o le Saogalemu Lautele, EMS, Saogalemu Fa’alotoifale, ma le Puipuiga o le Soifua Maloloina Lelei.

Vasega o Tusitala - KHJ 93.1 & Samoa News:

Tutula’i le tama’ita’i DJ o Sia Sagapolutele Atofau mo le fa’apupulaga o ituaiga o galuega e mafai ona e talosaga atu ai i le latou fo’i itu o le Au Fa’asalalau. Na ia fa’ailoa mai le matagofie o le galuega tau DJ po’o le Fofoga Taulogologo lea i luga o le ea.

“E te le tau pasia ni kosi e te a’oga ai i le Iunivesite mo lea ituaiga o avanoa, pau le mea e ao ina e lelei ai, o lou naunau e te fia iloa ona tu’ufa’atasia au polokalama fa’asolo, ia lelei lau fa’afoea o lau masini e fa’aaoga mo au fa’asalalauga, ae lona tolu loa, ia e lelei i tulaga o ituaiga o musika e te fiafia i ai, ma fiafia fo’i i ai isi ituaiga o tagata uma lava i le tatou atunu’u o Samoa.”

E to’atele na’ua i latou na si’ilima e fiafia i lea itu o le tautua e ala i fa’asalalauga i luga o le Ea.

E i ai nisi sa faitio i ituaiga o tala e fa’asalalau i luga o le ea ma le nusipepa e fa’atatau i ni mea na tutupu, ae maise misa ma tala o fa’amasinoga, ona sa a’afia ai lagona o nisi o latou aiga!

O lea itu sa tali i ai le sui o le Nusipepa ma fa’aalia, “E tele o tala o fa’amasinoga, o lipoti o lo’o fa’amauina e leoleo, ma fa’ao’o atu i le Ofisa o fa’amasinoga, lea e fa’aaoga e tusia ai tala nei, ma e le mafai ona fete’ena’i se tala tusia a le tusitala ma le fa’amaumauga ua i ai i le lipoti lea ua taofia e le fa’amasinoga.”

E le’i to’atele nisi sa si’i a’ao e fia avea ma tusitala i nusipepa, ae sa tima’ia le fanau, “O le tusitusi, o le ala lea e matua saili e le tele o galuega lelei, aua e mautinoa ai, ua agava’a i le tele o faiva o so’o se ituaiga galuega Ofisa, o le ala fo’i lea e su’e ai su’ega ulufale, e saili i le tusitusi fa’aperetania ma le numera, leai loa, saili mai sua galuega i le maso!”