Ads by Google Ads by Google

TEUTUPE: Leai ma se tupe o le Pone o teu e le malo

E ui i le tele o tala tuu mumusu a le atunu’u fa’apea ai isi sui o le Fono Faitulafono i lo latou nonofo popole, pe o fa’afefea ona teu ma fa’asoasoa e le malo le lata i le $79 miliona o tupe o le aitalafu o le Pone ua maua mai e fa’atino ai galuega ma atina’e tetele a le malo, peita’i na fa’amanino e le Teutupe a le malo i le vaiaso nei, o ia fo’i lea o le Taitaifono o le Komiti o le Pone, “e leai se sene apa se tasi o tupe o le Pone o umia po o teu fo’i e le malo.”

 

Ina ua fesiligia e le afioga i le ali’i faipule ia Timusa Tini Lam Yuen le Teutupe a le malo po o fea la o lo o teu ai tupe o le Pone, na tali Ueligitone Tonumaipe’a, “o tupe o le Pone o lo o teu e i latou o lo o puipuia tupe (trustee) i Amerika ma fa’asoasoa mai ai, e leai ma se tupe o teu e le malo i Amerika Samoa”.

 

Saunoa Tonumaipe’a e fa’apea, e taua atugaluga o le atunu’u e fa’atatau i le tatau lea ona malu puipuia tupe o le Pone a le malo, ae ao fo’i ona silafia e le atunu’u ma le Fono Faitulafono, ina ua fa’agasolo talanoaga ma feutanaiga a le malo ma i latou o lo o fa’atauina tupe o le Pone i auala e fa’aaoga ma fa’asoasoa i ai tupe, sa aofia ai i nei talanoaga ia maliliega i auala e fa’asoasoa mai ai tupe o le Pone i Amerika Samoa.

 

Na fa’amanino atili e le Teutupe e fa’apea, o lo o i ai fo’i le fa’amalumaluga a le malo feterale i tupe o le Pone, ma, so o se taimi e tula’i mai ai se fa’aletonu i le fa’aaogaina o tupe o le Pone, e fa’afuase’i lava ona tulioso mai le feterale ma fa’ataunu’u loa se su’egatusi ina ia fa’amaonia ai auala sa fa’aaoga ia i tupe o le Pone.

 

“O puipuiga uma nei ua mafai ona tu’uina atu e le malo fa’apea ai ma i latou o lo o fa’atauina tupe o le Pone, ina ia mautinoa e saogalemu ma lelei le fa’aaogaina o tupe mo le atina’e o le malo”, o le saunoaga lea a Tonumaipe’a i luma o le iloiloga sa fa’atautaia e le Komiti o le Tamaoaiga a le maota o sui i le vaiaso nei, lea sa fesiligia ai ni isi o mataupu e feso’ota’i ma tupe o le Pone.

 

O se tasi o mataupu na fesiligia i le taimi o le iloiloga, o se auala lea e mafai ai ona toe fa’aopoopo ni isi galuega e totogi i tupe o le Pone, e pei la o se vaega tupe e tu’uina atu mo le Falema’i o le LBJ i Faga’alu, lea sa fesiligia e le afioga i le tama’ita’i faipule ia Vui Florence Saulo.

 

Ae na fa’amanino e Tonumaipe’a e fa’apea, e le mafai ona toe faia se suiga i galuega ma atina’e e faatupe i le Pone, ona ua uma ona pasia le tulafono i mea sa finagalo le malo e ave i ai le fa’amuamua, lea fo’i sa iloilo e i latou sa fa’atauina le Pone ma latou malilie atoatoa i ai, o atina’e taua nei mo Amerika Samoa.

 

Na toe fesili Vui ia Tonumaipe’a pe i ai la se auala e mafai ai e le malo ona totogi vaega tupe ia ua fa’atulaga mai i le tulafono e totogi i le falema’i (subsidy), peita’i na saunoa le Teutupe, e fuafua lava le totogiina atu e le malo o tupe nei i le tulaga lelei o tupe a le malo.

 

“Afai e lava tupe a le malo ma tele, ona mafai fo’i lea ona totogi atu tupe nei i vaega e pei ona talosaga mai, ae afai e le lava tupe a le malo, e faigata fo’i ona fa’ataunu’u na manaoga,” o le saunoaga lea a Tonumaipe’a.

 

Na toe tali fuaitau Vui e faapea, e ui lava o galuega ia ua fa’amoemoe e fa’atupe i le Pone ua mae’a ona pasia e le Fono Faitulafono, peitai o popolega o lo o tula’i mai i le taimi nei, o ni fa’aletonu e ono fetaia’i ma le malo pe afai ae tapunia fa’afuase’i kamupani i’a i le atunu’u, ona o tulaga fa’afitauli ua maitauina i le taimi nei.

 

Ae na taua e le Teutupe e fa’apea, e leai se afaina tele o fuafuaga o le Pone pe afai ae tapunia kamupani i’a, aua e le o i ai se lafoga a kamupani i’a o totogi aga’i i le malo, o lea fo’i e tagi lava le malo i lima e fa’atino ai ana fuafuaga, peita’i na fa’auilavea le afioga i le ali’i faipule ia Larry Sanitoa ma ia saunoa e fa’apea, e ui lava e le o totogia se lafoga a kamupani i’a i le malo, peita’i o galuega o lo o maua e le to’atele o le atunu’u mai le kamupani, o lo o fa’aaoga e fa’atau ai oloa ia e maua mai ai lafoga a le malo e totogi ai le Pone, afai la e tapuni kamupani i’a ma le toe maua ni galuega a le to’atele o tagata, o le a tau leai fo’i ni isi o le atunu’u e fa’atauina oloa ia e maua mai ai lafoga o lo o totogi ai le Pone, ma tula’i mai ai loa le fa’aletonu lea o lo o atugalu i ai le atunu’u ma afioga i Faipule.

 

Saunoa atili Sanitoa e fa’apea, e le o se mataupu faigofie fo’i le mataupu lenei i le Pone, pe a fuafua atu i le $149 miliona lea ua sauni atu le malo e toe totogi, ae na toe saunoa fo’i le Teutupe e fa’apea, afai ae tula’i mai se fa’afitauli i le totogiina o le Pone, e le o tupe uma ma meatotino a le malo e o mai kamupani sa latou fa’atauina le Pone ma aveese, ae ave lava na o le 25% o tupe a le malo ua uma ona polomisi i totonu o le tulafono sa fa’atula’i mai ai le mataupu o le Pone.