Ads by Google Ads by Google

TETE’E TOEAINA 62 NA TE LEI FAAMALOSIA TEINEITIITI 16 TAUSAGA

O le toeaina e 62 tausaga le matua lea o loo tuuaia sa ia faamalosia se teineititi e 16 tausaga la te faiaiga, ma i’u ina maitaga ai lea tamaitai, sa ia teena moliaga o loo tuuaia ai o ia e le malo i luma o le faamasinoga maualuga i le taeao ananafi.

I lona teena ai o tuuaiga faasaga ia te ia, ua faatulaga ai loa lana ulua’i iloiloga e faia pe a tuanai aso e 60, e pei ona talosagaina e lana loia fautua o Sharron Rancourt.

Fai mai le malo, o le toeaina lenei o loo tuuaia faatasi ma se alii talavou e 22 tausaga le matua, i lo la faia lea o se gaioiga le alofa e ala i lo la faiaiga lea i le teineititi na aafia ma i’u ina maitaga ai o ia.

O le mataupu lenei na afua mai ina ua agai atu se sui o le aiga o le teineititi na aafia ma ripoti i leoleo lenei mataupu, ona o le faalavelave lea ua mafua ai ona maitaga le tamaitai o loo aafia.

I faamaumauga a le faamasinoga o loo taua ai e faapea, o le aso 27 Fepuari 2012 na faafesootai ai e se tasi o le aiga o le teineititi na aafia le ofisa o leoleo, ma logo i ai le faalavelave lea ua mafua ai ona ma’itaga lenei teineititi.

Na fesiligia e leoleo le teineititi na aafia ma ia faamaonia ai, sa latou faiaiga ma i laua e toalua, ma i’u ina aafia ai loa o ia i le ma’itaga.

Na faailoa e le teineititi na aafia i leoleo igoa o i laua sa latou faiaiga atoa ai ma o la tausaga, ma o i laua ia e aofia ai le alii e 22 tausaga ma le toeaina e 62 tausaga le matutua.

Na taua e le teineititi i leoleo e faapea, o le masina o Tesema 2011 na amata ai ona la masani ma le alii e 22 tausaga, peitai na faatoa la faiaiga i le masina o Ianuari 2012, ae  o le toeaina 62 tausaga sa la faiaiga i le masina o Tesema 2011.

Fai mai le teineititi na aafia, ina ua maea ona la faiaiga ma le toeaina 62 tausaga le matua, sa fai atu ia te ia e aua ne’i ona talanoa i se isi e uiga i le mea ua tupu ia te i laua.

E tusa ai ma faamaumauga a le faamasinoga o loo taua ai, o le toeaina 62 tausaga le matua, o le sponsor lea a le aiga o le teineititi o loo aafia, ae o le matai foi lea o le latou aiga.

Ina ua faailoa e le teineititi na aafia le mea ua tupu i lona tina, sa alu lona tina ma talanoa i le toalua a le ua molia e tusa ai o le mea ua tupu, ma faatoese ai le toalua a le ua molia i le tina o le teineititi na aafia ona o le mea ua tupu.

Na talanoa foi le tama o le teineititi ua aafia i le ua molia e uiga i lenei mataupu, lea foi na faatoese ai le ua molia ma ia faailoa i ai, ua malosi le tiapolo ua mafua ai ona tulai mai lenei faafitauli.

E lei mana’o le toeaina e 62 tausaga e fai sana faamatalaga, peitai na ioeina e le alii e 22 tausaga i leoleo tulaga e uiga i le la mafutaga ma le teineititi na aafia, atoa ai ma le taimi sa la faiaiga ai.

Fai mai faamaumauga a le faamasinoga, o le masina o Setema 1997 na tausala ai e le faamasinoga le toeaina 62 tausaga i le moliaga o le faia lea o uiga mataga i se tamaitai.

E $35,000 le tupe na totogi lea ua mafai ai ona tatala le ua molia i tua e faatali ai le isi ana iloiloga i luma o le faamasinoga maualuga, ma o loo i ai foi poloaiga ua tuuina atu e le faamasinoga na te usitaia ao tatala ai o ia i tua.

O le alii e 22 tausaga le matua o loo taofia pea i le toese ina ua le mafai ona ia totogiina le $15,000 na faatulaga e le faamasinoga e tatala ai o ia i tua.

O loo tuuaia i laua uma nei i moliaga taitolu, lea e aofia ai moliaga mamafa e lua o le faiaiga ma se teineititi e laititi i lalo o le tulafono, atoa ai ma le tagofia o itutinosa o se teteineititi e laititi i lalo o le tulafono, ma le moliaga mama o le faia lea o ni gaioiga e ono lamatia ai le soifua maloloina o se fanau e laititi i lalo o le tulafono.