Na fa’aalia e sui o Faletalimalo e tolu i le atunu’u lo latou tete’e i le lafoga e 5% lea ua fuafua le malo e fa’ae’e i le totogi o potu o faletalimalo, i se iloiloga sa faia i luma o le komiti o le Paketi a le Senate i le taeao ananafi.

Na taua e i latou e to’atolu sa molimau e fa’apea, o le lafoga lea ua fuafua le malo e fa’ae’e i totogi o potu o faletalimalo, o se lafoga “e le talafeagai” mo i latou le aufai pisinisi faletalimalo.

Na taua e le Sui Pule a le Tradewinds Hotel, susuga Olataga Toa i lana molimau e fa’apea, afai ae pasia lenei tulafono, o le a tele se a’afiaga i le taumafai e atina’e pisinisi faletalimalo.

Na fa’amanino atili e Toa e fa’apea, e le na o faletalimalo o lo o manuia i le taimi e malaga mai ai tagata turisi i le atunu’u, ae o lo o manuia ai fo’i isi pisinisi e pei o kamupani va’alele, faleaiga, faleoloa, ma le tele lava o isi pisinisi o lo o fa’aalu e turisi a latou tupe e fa’atau mai ai.

I le taumafai ai o Amerika Samoa e fa’aleleia le atina’e o turisi i le atunu’u, na taua ai e Toa e fa’apea, afai ae pasia le lafoga e 5%, o le a atili ai lava ona faigata le atina’eina ma le fa’aleleia o le atina’e tau turisi mo Amerika Samoa.

I tagata o lo o aga’i atu ma nonofo i le Tradewinds Hotel i le tausaga atoa, o le 3% o i latou o tagata turisi mai fafo, ae o le to’atele lava, o tagata faigaluega a le malo e aofia ai le feterale, o lo o aga’i mai mo le faia o a’oa’ogaina i Amerika Samoa nei, ae o isi fo’i o sui mai le Militeli.

O se tasi o fa’afitauli na taua e Toa i luma o le komiti e mafua ai ona latou tete’e i le tulafono lenei, o le to’atele o tagata faigaluega a le feterale aemaise ai sui o le Militeli o lo o autova’a atu ma nonofo i le faletalimalo, ua mae’a lava ona fa’atulaga tau mo a latou potu, ma o se itu e faigata tele mo i latou pe afai ae toe si’i le totogi o potu a le faletalimalo.

Mai potu e 104 o lo o ofo atu e le Tradewinds Hotel, pe a ma le 40% le maualuga e masani ona nofoia e tagata i le tele o taimi.

Na taua e le susuga a Poe Mageo mai le Pago Airport Inn e fa’apea, o le to’atele o tagata o lo o masani ona nofoia potu e 20 a le faletalimalo, o tagata Samoa e malaga mai fafo mo fa’alavelave po o asiasiga i aiga i Samoa nei, ona latou fa’aaoga lea o le latou faletalimalo e nonofo ai.

Na taua e Mageo e fa’apea, o le mea moni lava, afai e taugata totogi o potu o le faletalimalo, o le a leai fo’i ni tagata e fia nonofo ai.

O le lagona fo’i lea na fa’aleo e le pule o le Sadies by the Sea Hotel, susuga Tom Drabble ina ua maua lona avanoa e molimau ai i luma o le komiti.

Na taua e Drabble e fa’apea, so o se taimi lava e fa’aopoopo ai e le malo se tupe i so o se mea i le atunu’u e pei o oloa faapea ai ma potu o faletalimalo, e sili ai fo’i i luga ma le tau o le soifuaga.

Sa ia fa’ailoa i le komiti lona le lagolagoina o lenei tulafono, ona e foliga mai ua fa’apitoa lava na o pisinisi faletalimalo, ae ua le faia se lafoga e aofia ai le atunu’u atoa, ma togi ma’a uma ai tagata i le atina’eina o le malo.

Na fa’alauiloa e le taitaifono o le komiti a le Senate ia Laolagi Fonoti Savali Vaeao e fa’apea, o le a toe taoto lenei tulafono se’i toe iloilo atili e le komiti i le vaiaso fou, ona tu’uina mai ai loa lea o se fa’aiuga mautu.