Ads by Google Ads by Google

TETE’E SE ALI'I SA AVEA MA FAIA'OGA I ONA MOLIAGA

“O BARLOW, O SE TAGATA FA’AFOLIGA E LEAI SE AIGA”

O le ali'i lea sa avea ma faia'oga i le Kolisi Tu'ufa'atasi, sa ia te'ena i le taeao ananafi moliaga e 19 ua tu'uaia ai o ia e le malo, ona o le fa'alavelave lea na tula'i ai i le aso 25 Oketopa 2011, lea  o lo o tu'ua'ia ai o ia i lona fa'atauina atu o ni pia i ni tamaiti a'oga e laiti i lalo o le tulafono, fa'amatamata i laua i ata mataga, atoa ai ma le faia i ai o uiga mataga fa'afeusua'iga.

Na ta'ua e le loia a le malo i luma o le fa'amasinoga fa'aitumalo i le taeao ananafi e fa'apea, o le ali'i lenei o James Barlow, o se ali'i e ola fa'afoliga, ua tu'uaia i lona faia o ni gaoioiga ua sili atu ona mataga ma matuia e fa'aleagaina ai olaga o fanau talavou i le atunu'u.

I le te'ena ai e le ali'i o James Barlow o moliaga fa'asaga ia te ia, na fa'atulaga ai loa e le fa'amasinoga le aso Faraile o le vaiaso fou, lea o le a faia ai lona ulua'i iloiloga i luma o le ali'i fa'amasino lagolago ia John Ward II.

O lea iloiloga e le o se fa'amasinoga, ae ua na o se iloiloga e fesiligia ma su'esu'e ai e le fa'amasinoga mau a le malo, pe sa soli se tulafono, ae po o ia fo'i lea o lo o tu'uaia i le soliina o le tulafono.

E $100,000 le tupe na fa'atulaga e le fa'amasinoga e totogi ona fa'atoa mafai lea  ona tatala Barlow i tua mai le to'ese i Tafuna, peita'i ina ua mae'a ona fa'afinauga a loia mo le fa'aitiitia lea o le tupe taofia, sa toe fa'atumauina ai e le ali'i fa'amasino le tupe e tatala ai

Na finau le loia a le malo o Blak Hanley e fa'apea, o le ali'i ua molia nei o se tagata na te faia amio mataga i fanau tama laiti, o se tagata fai mea valea ua ia faia gaoioiga e fa'aleaga ai olaga o tama talavou, ina ia latou faia ni gaoioiga tau fa'afeusuaiga, e ala i lona tu'uina atu i ai o le 'ava malosi, o tupe  ma fa'amatamata i ata tifaga leaga.

“O se tagata ua matua faia ni gaoioiga e ono a'afia ai olaga o isi fo'i fanau tama i le atunu'u, ma ua tu'uaia nei o ia e le malo i ni moliaga mamafa ma le matuia, ma ua manino mai ai le ono mafai lea ona nofosala o ia i le to'ese mo isi aso o lo o totoe o lona olaga,” o le fa'afinauga lea a Blake.

Na ta'ua e Blakes, o Barlow, e le gata e le o ia o se tagata Amerika Samoa, ua le o toe galue i le kolisi tu'ufa'atasi, ae leai fo'i se fale po o sona aiga e nofo ai i le atunu'u.

Ae i le fa'afinauga a le loia a Barlow o Mark Ude, sa ia finauina ai le fa'amasinoga ina ia fa'aitiitia le tupe e tatala ai le ua molia i tua, ona o tu'uaiga o lo o faia fa'asaga ia te ia ua na o ni tu'uaiga lava.

Saunoa Ward, o fa'afinauga a le malo o lo o atagia mai ai ni itu taua o lenei mata'upu, ma ua alaga tatau ai fo'i ona lagolagoina e le fa'amasinoga le fa'atumauina pea lea o le tupe e tatala ai o ia i tua, peita'i afai e mafai ona tatala Barlow i tua mai le to'ese, ua poloaina e le fa'amasinoga o ia ina ia aua nei ona taumafai e fa'afeso'ota'i tamaiti o lo o a'afia i lenei mata'upu, po o ni isi fo'i o lona aiga.

Ua fa'asa ona ia toe auai i ni gaoioiga po o ni fa'apotopotoga e ia i fanau laiti, aua fo'i nei ona toe soliina se tulafono.

O le mata'upu fa'asaga ia Barlow na amata mai i le tausaga na te'a nei ina ua maua e leoleo o ia ma ni tamaiti a'oga laiti se to'atolu i totonu o lana ta'avale, o lo o latou inupia ai, ma molia ai loa Barlow i le 'ave ta'avale ona ma le fa'aupuga a le malo, o le a fa'aauau a latou su'esu'ega e uiga i tu'uaiga fa'asaga i lona faia lea o  uiga mataga i tamaiti laiti.

O le vaiaso nei la lea na faila ai loa e le malo moliaga e 19 fa'asaga i le ali'i faia'oga ona o amioga mataga o lo o tu'uaia o ia na ia faia.