Ads by Google Ads by Google

TETE’E PULENUU E LE O LANA TUPULAGA FAALEAGAINA SAINI PALOTA

O loo faaauau pea i le taimi nei suesuega a alii ma faipule o le afioaga o Atuu, i le tau sailiina lea o i latou sa faaleagaina le saini a le paga a Faoa/Taufete’e i le vaiaso na te’a nei, faatasi ai ma le latou tautinoga, e le o ni tupulaga a le latou nuu o loo faia uiga mataga nei i totonu o le nuu.

Na taua e le alii pulenuu o le afioaga ia Samuelu Aloali’i e faapea, e le o nofonofo le afioaga i le tau sailiina lea o i latou sa faia lenei gaioiga le manuia, lea ua ta’uleaga atu ai ma le igoa o le afioaga.

“E le o malolo lo matou nuu i le taimi nei i le tau sailiina lea o i latou sa faaleagaina le saini a Faoa/Taufete’e, e oo lava fo’i ia te a’u o le pulenuu, ua uma ona ou savalia aiga uma o le nuu ma ou fesilisili i matua o tamaiti, mo le aoina mai o ni faamatalaga e uiga i lenei mataupu,” o le saunoaga lea a Samuelu i le Samoa News.

E ui i se ripoti na lomia i le Toasavili i le aso Toonai na te’a nei, ma taua ai se faamatalaga a se tina e faapea, o tupulaga lava a le nuu sa vaaia o inupia i le nofoaga sa i ai le saini, peitai na faamanino e le alii pulenuu, e mamalu pulega a le aumaga i afiafi i taimi o Sa, ma e maualuga lona talitonuga e le faia e nisi o lana tupulaga uiga mataga faapea.

“E te silafia lelei lava o le nofoaga lenei o loo fai ma taulaiga o tagata eseese o loo galulue i kamupani, ma e le mafai foi ona mautinoa poo ai sa’o sa faia lenei mea,” o le molimau lea a Samelu.

O le aso Faraile o le vaiaso na te’a nei na faaleaga ai e nisi le saini a Faoa/Taufete’e sa faatu i Atu’u, e ala i le sasae o le saini i lalo toe asu i ai le apa vali samasama, ina ua faatoa maea lava ona faatu le saini i le afiafi o le isi aso.

Na taua e le alii pulenuu, e mamafa le faasalaga e tuu atu i le tagata e faamaonia o ia sa faia le gaioiga lea.

“O afiafi uma lava pe a maea matou leoleoga o le Sa, e faia ai a matou fono ina ia faamalosia le aumaga e faatino a latou tiute i le leoleoina ma le vaaia lelei o le nuu, ma e maualuga lo’u talitonuga e le faia e tupulaga a lo’u nu’u ni uiga mataga faapea, ae o le a le avea lea ma itu e taofia ai suesuega o loo faia,” o le saunoaga lea a le alii pulenuu.

Ua i ai foi le fuafuaga a le alii pulenuu o le a ia savalia taitai o le kamupani a le StarKist Samoa, ina ia fautuaina a latou tagata faigaluega o loo faaaogaina nofoaga e taumafa ai le ava ma malolo ai, ina ia galulue faatasi mo le lelei o le nuu.

Sa i ai nisi o le afioaga na latou faaalia i le Samoa News lo latou le fiafia ina ua alu atu le ripoti ma ta’u ai fua le igoa o le nu’u.

Na faaalia e le afioga i le alii faipule ia Tuumolimoli Saena Moliga lona faanoanoa ina ua taua i lona igoa i le ripoti a le Samoa News, lea na lomia i le aso Toonai na te’a nei, ona e i ai lona talitonuga o mataupu i totonu o le afioaga e gafa ma le alii pulenuu, sei vagana ai mataupu e fesootai ma tulafono ma tulaga i le malo, o mataupu ia e fitoitonu ia te ia.

Saunoa le alii faipule, o loo faatino ona tiute faa faipule mo lona nuu, o loo galue foi mo le manuia o tagata o lona itumalo e pei ona filifilia ai o ia e le itumalo.

O le afioga Tuumolimoli, o ia lea o loo taitai o le Komiti o le Puipuiga o le Saogalemu Lotoifale a le maota o sui, ma ua tele nisi o mataupu taua sa mafai ona laga i iloiloga ua mavae a lana komiti, e uiga i le puipuiga o le saogalemu o le atunuu.

E le gata o loo tau sailia le tagata na faaleagaina le saini a Faoa/Taufete’e, ae na taua foi e le alii pulenuu le tau sailia foi o le tagata na faaleagaina le Sailini o loo i totonu o le nuu.