Ads by Google Ads by Google

Tete’e pule o pasi i tulafono fa’amalosia ai fusipa’u

Na fa’aalia e ni isi o pule o pasi la’u pasese lo latou te’ena o se manatu mai le malo, ina ia fa’amamaluina loa se tulafono sa pasia mai i le tausaga e 1988, e fa’amalosia ai le fai o fusipa’u a ave pasi. O le taeao ananafi na faia ai se iloiloga i le potu fono a le Matagaluega o Fefa’atauaiga ma Alamanuia, e soalaupule ai lea mataupu. Ma na auai ai i lea fonotaga, nisi o le aufai pisinisi pasi ma ta’avale la’u uta tetele, o sui o le komiti o lo o iloiloina lenei mataupu, atoa ai ma le afioga i le ali’i Sui Komesina o Leoleo ia Leseiau Laumoli.O nisi o sui sa auai i lenei iloiloga e aofia ai le afioga i le ali’i faipule ia Vailiuama Steve Leasiolagi, ma nisi o tamali’i sa avea muamua fo’i ma faipule o le maota o sui, le tofa ia Vaiausia Yandall ma Fa’alae Tumupopo.O lenei iloiloga sa valaauina mo le aufai ta’avale la’upasese ma uta, ina ia talanoa ma fetufaa’i i le tulafono lea e fa’amalosia ai le faia uma o fusipa’u mo ave ta’avale o ta’avale la’upasese atoa ai ma ta’avale la’uuta, lea ua fa’amoemoe e fa’amalosia i le aso 1 Ianuari 2012.Na fa’amanino e le ali’i loia a le matagaluega ia Sean Morrison, o se fautuaga na tu’uina mai i le vaega a le feterale lea o lo’o auala mai ai vaega tupe fesoasoani e fa’atino ai tautua nei, le tatau lea ona usitaia tulafono uma a le feterale ma tulafono a Amerika Samoa i taimi nei.Na taua e se tasi o sui sa auai i le fonotaga, o le a to’atele o le a fa’asea ma faitio i le taimi e fa’amalosia ai lenei tulafono, aua e faigata ona fai ni fusipa’u mo ave pasi i ituaiga fausaga pasi ia o lo o feoa’i i totonu o Amerika Samoa, se’i vagana ai ave ta’avale o pasi aoga.Na taua e le isi tamali’i ua silia ma le 30 tausaga o avea o ia ma tagata na te fauina pasi la’upasese i le atunu’u, lea fo’i sa i ai i lenei fonotaga, o le fa’afitauli o lo o tula’i mai, e le mafai ona fa’apipi’i le fusipa’u i laupapa ia o lo’o fa’aaoga e fausia ai pasi la’upasese a Amerika Samoa, ona e aumai lava pasi ia ua mae’a ona aveese vaega e fa’amau i ai le fusipa’u, lea e pei ona vaaia i totonu o ta’avale eseese e aofia ai ma pasi aoga.Na taua e le isi ali’i faipasi, o le fa’afitauli pe afai ae fa’amalosia le tulafono e fa’aaoga ai fusi pa’u e ave pasi, ona o pasi nei o lo o fausia i Amerika Samoa, e tatau fo’i la ona fuafua i ai tulafono a le atunu’u.I le finagalo o le isi tamali’i, afai e taumafai tagata faipasi e fau lava e latou a latou fusipa’u ina ia tausisi ai le tulafono, e ono avea fo’i lea ma itu e auala mai ai se gaioiga le manuia fa’asaga i le ave pasi, aemaise lava le tulaga o le fa’aaoga lea e se tagata o le pasese o le fusipa’u a le ave pasi e titina ai lona ua (tulou).I le mae’a ai ona fa’afofoga o le komiti i fautuaga ma finagalo fa’aalia o sui sa auai, na tu’uina atu ai loa se tasi o fautuaga, i le tatau lea ona galulue le matagaluega ma le Fono Faitulafono mo le fa’atulagaina lea o se suiga i le tulafono, ina ia mafai ai ona fa’aagafua ave pasi mai le faia o a latou fusipa’u.O le isi fautuaga, o se tulaga lelei pe afai e amata fa’amamalu loa e le malo lenei tulafono i le tausaga fou, mo so’o se pasi fou lava e ulufale atu mo le fia faia o se laisene la’upasese, ina ia mautinoa e ausia e le pasi fou lea tulaga uma e pei ona mana’omia mo le saogalemu e aofia ai ma le fusipa’u, ae o pasi la’upasese tuai ua i ai, e tatau ona fa’atulaga se taimi e o’o atu i ai ua uma ona fai fusipa’u e pei ona mana’omia.O lenei mataupu ua taoto atu nei i le komiti ma le matagaluega mo le faia i ai o se fa’aiuga.