Ads by Google Ads by Google

Tete’e malosi Taotasi Soliai pili toe tipi ai lafoga 2%

Na fa’aalia e le afioga i le alii faipule mai le itumalo o Ituau ia Taotasi Archie Soliai lona tete’e i le pili tupe lea ua i luma nei o le maota o sui, e fuafua ai le toe tipi o le lafoga e 2% mai totogi o tagata faigaluega, ae tu’uina atu e fesoasoani ai i le tulaga pagatia tau tupe o lo o feagai ma le falemai o le LBJ i Fagaalu i le taimi nei.

Saunoa le alii faipule, e le talafeagai le toe tipi o le lafoga 2% mai totogi o tagata e maualalo le tamaoaiga o latou aiga, pe afai e faatusatusa i le tagata e maualuga ma lelei lona totogi o lo o maua.

“Afai e toe tipi mai le lafoga lea e 2% i le totogi o le tagata e na o le $200 lona totogi i le vaiaso ae toa 6 tagata o lona aiga o lo o tausi, faatusatusa i le tagata lea e ova atu i le $400 lona totogi i le vaiaso, o se tulaga e matua sili ona eseese, aua e sili atu le pagatia o le tagata o loo maualalo le tamaoaiga na te maua nai lo le tagata e lelei lana tupe maua,” o le saunoaga lea a le alii faipule.

O lea finagalo mai le alii faipule sa ia faasoa mai i le Samoa News ina ua maea se talanoaga sa faia e le komiti o le Paketi a le Maota o Sui i le taeao ananafi, lea sa latou talanoaina ai pili tupe a le Senate lea ua maea ona latou pasia, e tuu atu ai le silia i le $4 miliona mo le falemai.

O pili tupe a le Senate ua pasia e aofia ai le faasoasoa atu o le $253,000, $1.6 miliona ma le $3 miliona mo le falemai o le LBJ, peitai o lea ua faamoemoe le maota o sui e faitautolu  nei tulafono e lua o le $253,000 ma le $1.6  miliona, ae o le tulafono lea e faasoasoa atu ai le $3 miliona, ua faamoemoe le komiti o le a taofi sei fai muamua i ai a latou suiga.

O suiga e pei ona fuafua i ai le komiti o le Paketi i se latou iloiloga i le taeao ananafi, e aofia ai le faaauau pea lea o le tuuina atu o le pili tupe e $3 miliona lea o loo faamoemoe e faatupe mai i Teugatupe mo Taui o Tagata Faigaluega mo le falemai, ae o le a avea o se nonogatupe.

E talitonu le komiti a le maota o sui, e le talafeagai le aumai o tupe mai isi atina’e ma fuafuaga a le malo e faatupe ai isi fuafuaga ma atia’e.

O le $3 miliona la lea ua manatu le komiti e aitalafu mai i le Teugatupe o Taui mo Tagata Faigaluega, o le a toe totogi atu i le tupe lea ua fuafua le malo e maua mai i le lafoga o totogi e 2%, o le tupe e totoe mai ai i le totogiina o le aitalafu lea, fai mai le fautuaga a le alii faipule ia Simei Pulu, e tuu sa’o loa le isi 1% i totonu o teugatupe a le malo, ave le isi afa % i le polokalame o gasegase auina atu i fafo a le falemai, ae o le isi afa % e alu i le faagaioiga o le falemai.

Peitai na saunoa le alii faipule ia Fetu Fetui Jr e faapea, na te le toe lagolagoina le faia o se isi tipi e 2% i le lafoga o totogi mo tagata faigaluega, ona e i ai lona talitonuga ua matua pagatia lava le atunuu i le lafoga lea faatoa maea atu nei, afai foi la e toe amata atu foi ma lea lafoga, o lona uiga ua atili ai le mafatia o tagata.

“Mo a’u lava ia o le lafoga e 2% lea ua tatou talanoaina ua matua mamafa lava mo le atunu, o se matua avega mamafa lava i tagata faigaluega i totonu o le teritori, ua oi nai tagata i le tetele o nei lafoga, o lona uiga afai tatou te toe faaauauina, o le a le maua se mapusaga a le ekalesia,” o le  saunoaga  lea a le alii faipule mai Manu’a ia Fetu Fetui Jr.

O le pili e 2% lea na pasia e le senate i le vaiaso na tea nei, ua faamoemoe e tuu atu i le LBJ e fesoasoani ai i ana faagaioiga, ma o le lafoga  lea e tausaga atoa foi lea ua faamoemoe e faaopoopo atu ai i lafoga e tipi ese mai i totogi o tagata faigaluega.

O se tasi lenei o mataupu na tele i ai saunoaga a le atunuu i luga o le polokalame a le alii faipule ia Faleomavaega Eni i le vaiaso na tea nei, ona o finagalo o nisi o le atunuu e faapea, afai e toe faaauau le lafoga lenei, o le a atili ai lava ona pagatia tagata o loo maualalo le tamaoaiga.